YESAYA 14 - BIVHILI KHETHWA Mafhungo Madifha

U wa ha khosi ya Babele

¹ Muṋe washu u ḓo dovha a khathutshela vhaḓuhulu vha Jakopo, a dovha a nanga Vhaisraele, a vha vhuedzedza shangoni ḽavho vha awela. Na vhatsinda vha ḓo ḓa vha dzula navho henefho, vha ṱangana na vha nnḓu ya Jakopo.

² Tshakha dzi ḓo endedza Vhaisraele uri vha humele shangoni ḽa havho. Henefho shangoni ḽa Muṋe washu ndi hune tshakha dza ḓo shumela Israele dzi dziphuli; vhe vha vhuya vha thuba Israele, vha vho ḓo thubiwa nga Israele; ndi hone vhathu vha Israele vha tshi ḓo vhusa vhe vha vhuya vha vha kandeledza.

³ Hee Israele, musi une Muṋe washu a ḓo u awedza wa si tsha tambula, wa si tsha salwa murahu, a u bvisa vhupulini hau ha tshiṱuhu,

⁴ ndi hone u tshi ḓo rovhedza khosi ya Babele, wa ri, “Khosi ya tshiṱuhu zwo i fhelela! Ha tsha ḓo dovha a kandeledza muthu.

⁵ Muṋe washu o vunḓa mbuno ya vhavhi; o konyola luḓo lwa vhavhusi,

⁶ lwe mahosi a rwa ngalwo vhathu ó sinyuwa a tshi vha bumudza a sa imi, a luvhisa dzitshakha o sinyuwa, a levha a sa humi.

⁷ Zwino ndi hone shango ḽoṱhe ḽo awela, ḽo lala, vhathu vha a fhululedza;

⁸ misese na mikedara ya Libanoni i fhululedza u wa hau, ya ri, ‘Koṱo, zwino wo wiswa! A hu tshee na ane a ḓo ri rema!’

⁹ “Vhudzulavhafu ngei fhasi ho rithea, ho ḓilugisela u u ṱanganedza; vhu vusa mimuya ya vho faho uri i u reshe u tshi swika; vhoṱhe vhonkhwalasambi vha shango, vhoṱhe vhe vha vha vhe mahosi a dzitshakha, vhu vha vusa kha khuluṋoni dzavho.

¹⁰ Vhoṱhe vha ḓo u goḓa vha ri, ‘Khefha na iwe-vho u tshi vho shaya nungo unga riṋe! Ri vho fana muhali.

¹¹ A u tsha lidzelwa mbila; vhugala hau hoṱhe wo tsela naho vhudzulavhafu; thovho yau ndi mbundudzi, u vho fuka mbungu.

¹² Iwe Masase i penyaho, ṅwana wa mapfuvhi, wo wa hani u tshi bva ṱaḓulu! Zwiḽa kale wo kunda dzitshakha, fhedzi zwino na iwe wo poswa fhasi.

¹³ Wo vha u tshi vhona unga u ḓo gonya makoleni, wa vhea khuluṋoni yau nṱha-nṱha ha ṋaledzi dza Mudzimu, wa dzula thavhani ya midzimu devhula kule-kule na rera noṱhe milandu,

¹⁴ wa namela miṱumba ya makole, wa ḓiita Waṱaḓuluṱaḓulu.

¹⁵ Zwino khezwi, wo godimiselwa fhasi-fhasi dindini.’

¹⁶ Vhoṱhe vhane vha u vhona vha ḓo u ṱalela, vha elekanya zwo u welaho, vha ri, ‘Nṋa uyu ndi ene uḽa munna we a vhuya a dzinginyisa ḽifhasi, a tshi ri u swika, mivhuso ya tetemela.

¹⁷ Nṋa ndi ene we a lozwa miḓi, shango ḽa sala ḽi phanga? Ndi ene uḽa we a si vhuye a vhofholola mathubwa uri vha humela hayani?’

¹⁸ Mahosi oṱhe a dzitshakha o lala zwavhuḓi, muṅwe na muṅwe u na tshalo tshawe,

¹⁹ fhedzi iwe a u na tshalo, wo kudzwa nnḓa, unga davhi ḽo laṱwaho; wo fukedzwa nga zwitumbu zwa vho vhulawaho, vho faho vha tshi rungwa nga pfumo, vha poswa dindini ḽa matombo unga tshitumbu tsho kandekanywaho.

²⁰ Vhunga wo ṱahadza shango ḽau, wa vhulaha vhathu vha hau, a u nga swiṱwi unga maṅwe mahosi; u muvhi, a hu na na ṅwana wau na muthihi ane a ḓo sala a tshi pfala.

²¹ Bulayo nga ḽi thome! Vhana vhawe nga vha iswe vungani vha vhulawe, vha fele milandu ya vhomakhulukuku wavho, muṅwe wavho a sa ḓo dovha a vhusa shango a ḽi ḓadza miḓi yawe.”

Mudzimu u ḓo lozwa Babele

²² Muṋe washu Mulangazwoṱhe u ri, “Ndi ḓo vha vutshela, nda phusukanya Babele, dzina ḽawo ḽa si tsha pfala. A thi nga sii tshithu – a thi nga sii vhana, a thi nga sii na muthihi. Ho amba Nṋe Yahavee.

²³ Ndi ḓo hu ita maṱafa, ha sala hu vhudzulo ha magwitha. Ndi ḓo swiela Babele nga luswielo lu no swielela zwoṱhe kule.” Ho amba Muṋe washu Mulangazwoṱhe.

U lozwiwa ha Ashuru

²⁴ Muṋe washu Mulangazwoṱhe o ana a ri, “Vhukumakuma zwe nda dzudzanya zwi ḓo itea; zwe nda ḓiimisela u zwi ita zwi ḓo khunyelela:

²⁵ Ndi ḓo lozwa Vhaashuru shangoni ḽanga ḽa Israele, nda vha kandekanya thavhani dzanga. Ndi ḓo vhofholola vhathu vhanga dzhogoni ya Vhaashuru, nda vha rula muhwalo we vha vha hwesa.

²⁶ Heyo ndi yone nzudzanyo yanga ye nda dzudzanyela shango ḽoṱhe; ndo angaladza tshanḓa, ndi ḓo ṱuwa ndi tshi rwa tshakha dzoṱhe.”

²⁷ Muṋe washu Mulangazwoṱhe o humbula a fhedza, ane a nga zwi thutha ndi nnyi? O angaladza tshanḓa, tshi nga humiswa nga nnyi?

U lozwiwa ha Vhafilista

²⁸ Nga ṅwaha we khosi Ahasi a dzama, Mudzimu o ḓivhadza Yesaya ndaedzo heino:

²⁹ Inwi Vhafilista noṱhe, ni songo ri u vhona mbuno ye ya vha i tshi ni rwa yo konyowa na pembela; ho fa vuluvulu, hu ḓo ḓa khangala yo ruḓa maṱo; gumba ḽa ṋowa ḽi thothonya ḓiragoni ḽi fhufhaho.

³⁰ Vhashai vha vhashai vha ḓo wana pfulo; vhaheḓana vha ḓo lala vha sa ofhi tshithu, hone vhana vhaṋu ndi ḓo vha lozwa nga nḓala, nda vhulaha tsalela dzaṋu, ha si sale muthu.

³¹ Inwi vhalindi vha khoro, ongolelani! Iwe muḓi, itou udza! Inwi Vhafilista noṱhe, itonu ṋoka nga nyofho! Hu khou ḓa buluvhutsi ḽi tshi bva devhula – ndi mmbi i si na magoswi.

³² Vhaḓinḓa vha Vhafilista ri tshi vha fhindula ri ḓo ri mini? Ri ḓo ri, “Muṋe washu o tea Tsioni, wa ima wo khwaṱha, vhathu vhawe vha tambulaho vha ḓo shavhela hone.”