YESAYA 13 - BIVHILI KHETHWA Mafhungo Madifha

Vhuporofita vhu no amba nga dziṅwe tshakha (13 – 23) Vha Babele zwo vha fhelela!

¹ Haya ndi malaedzwa a no amba Babele. Mudzimu o a dzumbululela Yesaya ṅwana wa Amutsi. O ri,

² “Imisani tshiga tsha nndwa muṱumbani wa tshikwara hu vhonalaho, ni vha vhidzelele. Vha vhidzeni nga tshanḓa, vha dzhene nga khoro dza vhaḓivhalea.

³ Ndo ruma maswole vhe vha ḓikumedza Nṋe; ndo vhidza vhahali vhanga uri vha nndifhedzele; ndi vhane vha pembelela u kunda hanga.”

⁴ Thetshelesani mukosi u pfalaho dzithavhani – mubvumo wa gogo ḽihulu ḽa vhathu, mubvumo wa mivhuso na dzitshakha vha tshi kuvhangana! Muṋe washu Mulangazwoṱhe u khou lugisela mmbi yawe u bva pfumo.

⁵ Vha bva mashangoni a kule, henengei vhusendekamisi. Muṋe washu o sinyuwa, o ḓa na zwihali zwawe u lozwa shango ḽoṱhe.

⁶ Honḓani, ḓuvha ḽa Muṋe washu ḽi tsini; Ramaanḓaoṱhe u ḓo lozwa zwoṱhe.

⁷ Zwanḓa zwoṱhe zwi ḓo kulea nungo, mbilu dzoṱhe dza ṋoka;

⁸ vha ḓo farwa nga nyofho, vha zhakeledzwa nga vhuṱungu vhu no nga ha musadzi e tsini na u vhofholowa; vha ḓo lavhelesana vho hanganea, zwifhaṱuwo zwó tshenuluwa nga ṱhoni.

⁹ Vhonani, ḓuvha ḽa Muṋe washu ḽi khou ḓa, ḓuvha ḽa tshiṱuhu, ḽa mbiti dzawe dzi ofhisaho, ó sinyuwa; ḽifhasi ḽi ḓo sala ḽi soga; u ḓo lozwa vhatshinyi vha re khaḽo.

¹⁰ Ṋaledzi dza lutomboni na mulalavhungu wadzo a zwi tsha ḓo vha na tshedza; ḓuvha ḽi ḓo bva ḽo swifhala, na ṅwedzi a u tsha ḓo penya.

¹¹ Muṋe washu u ri, “Ndi ḓo ṱungufhadza shango nga mulandu wa vhuvhi haḽo, vhavhi nda vha rwela milandu yavho, ndo laṱisa vhane vha ḓihudza, vha tshiṱuhu vha u ḓiḓivha nda vha ṱukufhadza.

¹² Ndi ḓo ita uri vhathu vha sale vha si gathi, vha shaee u fhira musuku wa Ofiri.”

¹³ Muṋe washu Mulangazwoṱhe u ḓo dzinginyisa ḽiṱaḓulu, shango ḽa thengathenga ḽa sudzuluwa vhudzuloni haḽo, musi wonoyo a tshi sumbedza mbiti dzawe dzi ofhisaho.

¹⁴ Tshakha dza vhatsinda vha dzulaho Babele dzi ḓo balangana dza shavhela mashangoni adzo, dza nga phala dzo shushedzwaho, dza nga nngu dzi si na mulisa.

¹⁵ Ane a farwa, tshawe ndi u vhulawa; ane a thubiwa u ḓo ḽiwa nga pfumo.

¹⁶ Tshetshe dzavho dzi ḓo pwashekanywa vho ḓi ṱalela zwavho, nnḓu dzavho dza ṱangulwa, vhasadzi vhavho vha tshipiwa.

¹⁷ Muṋe washu u ri, “Ndi khou ritha Vhamedia uri vha die Babele; vhone siliva a vha i takaleli, na musuku a vha u londi.

¹⁸ Vha ḓo lozwa vhaṱhannga nga vhura na misevhe, na tshetshe a vha nga dzi khathutsheli, na vhana a vha nga vha pfeli vhuṱungu.”

¹⁹ Babele, yone ndalama i fhiraho mivhuso yoṱhe, hone vhugala vhune Vhakhaladia vha ḓihudza ngaho, Mudzimu u ḓo u phusukanya sa zwe a ita Sodoma na Gomora.

²⁰ A hu tsha ḓo vhuya ha dzula muthu, ha vhuya ha fhira mirafho na mirafho; na mutendeleki wa phangani ha nga akhi dennde yawe henefho, na mulisa a nga si vhuye a ladza nngu dzawe henefho.

²¹ Hu ḓo lala phukha dza phangani, matumba a ḓala magwitha, mphwe dza dzula henefho, ha thamuwa madimoni a mbokoṱo,

²² vhudzumbamoni hawo ha lila phele, phunguhwe dza dzula pfamoni dzawo dza vhugala. Ndi hone tshifhinga tsha Babele tsho swika; maḓuvha awo a vho ṱoḓou fhela.