YESAYA 11 - BIVHILI KHETHWA Mafhungo Madifha

Khosi ya mulalo na muvhuso wayo

¹ Lutsinga lwa Dafita lwa vhuhosi lu nga muri wo reṅwaho, hone hu ḓo dovha ha bvelela khosi kha vhaḓuhulu vha Isai, zwa nga ḓadzwane ḽi tshi mela kha tshiguṱe, ḽa aṋwa mitshelo.

² Muya wa Muṋe washu u ḓo dzula khae, a mu ṋea vhuṱali na ṱhalukanyo, a mu funza maano a mu fha maanḓa, a vha na nḓivho, a vhusa a tshi ofha Muṋe washu,

³ u mu ofha ḽa vha ḽone dakalo ḽawe. Ha nga haṱuli nga u sedza tshifhaṱuwo tsha muthu kana nga u tevhela tshele;

⁴ a tshi haṱula ha nga ṱaluli vhaheḓana, u ḓo tsireledza pfanelo dza vhatshinyali; ipfi ḽawe ndi mbuno i rwaho shango; khaṱhulo dzawe dzi vhulaha vhavhi,

⁵ bannda yawe ndi khaṱhulo mbuya; o ḓivhofha khundu nga u fulufhedzea.

⁶ Maṱalerwa na nngu zwi ḓo dzula zwoṱhe nga mulalo, nngwe dza shuvhama na mbudzi, ṋamana dza fula na ndawana, dza liswa nga ṅwana muṱuku;

⁷ kholomo na biara dzi ḓo fula dzoṱhe, vhana vhadzo vha shuvhama vhoṱhe nga mulalo; ndau i ḓo dia muhwane unga kholomo;

⁸ tshixele tshi ḓo tamba tsini ha mulindi wa mbeḓa, ṅwana a longa tshanḓa muinani wa tshitemahe;

⁹ thavhani yanga khethwa a vha tsha ḓo huvhadzana, a vha tsha do lozwana; shango ḽi ḓo ḓala nḓivho ya Muṋe washu unga lwanzhe lwo ḓala maḓi.

U vhuya ha mathubwa

¹⁰ Musi wonoyo Ḓadzwane ḽa Isai ḽi ḓo ima ḽa vha tshiga kha dzitshakha, a ṱoḓwa nga vhoṱhe, vha khunyelela musanda wawe vha mu hulisa.

¹¹ Musi wonoyo Muṋe wa zwoṱhe u ḓo dovha a sumbedza maanḓa awe, a vhuisa tsalela dza vhathu vhawe hayani, a vha pfulusa Ashuru na Egipita na Phathirosi na Kushu na Elamu na Shiniari na Hamathi na mashangoni o tangaho lwanzhe.

¹² U ḓo imisa tshiga tsha u sumbedza dzitshakha uri u khou dovha u kuvhanganya vhathu vha Israele vho balanganaho, a vhuisa vha Juda vhe vha vha vho hasekana khuḓani nṋa dza ḽifhasi.

¹³ Vivho ḽa Efraimi ḽi ḓo fhela, a vha tsha ḓo vhivha Juda; vhuswina ha Juda vhu ḓo guma, a vha tsha ḓo vutshela Efraimi;

¹⁴ vha ḓo ima vhoṱhe, vha tsa na mabama vho livha vhukovhela, vha zhakekanya Vhafilista vha vha zhuvhula unga goni, vha ṱangula na vhathu vha no dzula Vhubvaḓuvha, vha zhongondedza na Edomo na Muaba, Vhaamoni vha luvha.

¹⁵ Muṋe washu u ḓo xisa tshoṱhe ḽigero ḽa lwanzhe lwa Egipita, a angaladza tshanḓa tshawe nṱha ha mulambo wa Yufuratha, wa oma nga muya u fhisaho, a u fhandekanya, wa bva zwidambwana zwiṱanu na zwivhili, muthu a kona u wela, na navhula á songo bvula.

¹⁶ Hu ḓo vha na gondo ḽi bvaho Ashuru, ḽine tsalela dza vhathu vhawe vha vhuya ngaḽo, u ḓi nga ḽiḽa ḽa Vhaisraele vha tshi pfuluwa Egipita.