YESAYA 1 - BIVHILI KHETHWA Mafhungo Madifha

¹ Hezwi ndi zwe Yesaya ṅwana wa Amutsi a dzumbululelwa misi ya Uzia na Jothamu na Ahasi na Hiskia, mahosi a Juda. Zwi amba nga Juda na Jerusalema.

Mvulatswinga ya bugu (1:2-31) Vhaisraele vho hangwa Mudzimu wavho

² Muṋe washu o amba a ri, “Ḽiṱaḓulu nga ḽi thetshelese, ḽifhasi nga ḽi pfe zwine nda amba! Ndo lela vhana, nda ri u vha alusa, vha ntshandukela.

³ Phulu i ḓivha mufuwi wayo, donngi i ḓivha mukungwa wa muṋe wayo, hone Israele ha zwi ḓivhi, vhathu vhanga a vha ṱalukanyi tshithu.”

⁴ Lushaka luvhi lwonolu, vhathu vho hwalaho milandu, vhana vha no ita zwivhi, vho ḓikumedzaho vhutshinyi! Vho landula Muṋe washu, vha nyadza Mukhethwa wa Israele, vha mu furalela.

⁵ Hu tshee ho sala ngafhi hune na nga rwiwa hezwi ni tshi ḓi futelela u shandukela Mudzimu? Hufha ṱhoho yoṱhe yo ḓala mbonzhe, na mbilu i si tshee na nungo.

⁶ U bva kha ṋayo u swika ṱhohoni a hu na muraḓo wo takalaho; ho zwimba, hu na zwilonda na mbonzhe dzi bvuḓaho malofha; a dzo ngo hamulwa, a dzo ngo pombiwa, a dzo ngo shelwa mushonga.

⁷ Shango ḽaṋu ḽo sala ḽi matumba, miḓi yaṋu yo fhiswa, zwe na lima zwo ḽiwa nga vhatsinda nó lavhelesa, vha phusukanya zwoṱhe ha nga ho fhira vhaṱanguli.

⁸ Tsioni musidzana wa lunako, wo sala u tshi nga ḓingo tsimuni ya minḓirivhe, u tshi nga thumba tsimuni ya maranga, u tshi nga muḓi wo govhelwaho.

⁹ Ngavhe Muṋe washu Mulangazwoṱhe a si ri siele vhathu vha si gathi, ndi musi ro lozwiwa tshoṱhe unga Sodoma, ra nga Gomora.

Nduvho dza vha sa thetshelesi Mudzimu a dzi farisi tshithu

¹⁰ Inwi vhavhusi vha Sodoma, ipfani ipfi ḽa Muṋe washu; inwi vhathu vha Gomora, thetshelesani Mudzimu washu a tshi ni laya!

¹¹ U ri, “Zwiṱhavhelo zwaṋu zwi sa fheli zwi na mushumo-ḓe? Zwiṱhavhelo zwa thutha na mapfura a ṋamana a thi tsha zwi ṱoḓa; a thi takaleli malofha a mboho na ngwana na mbokoṱo.

¹² “Ndi nnyi we a ri ni tshi ḓa u nnduvha ni ḓise hezwo zwithu? Hufha hu u sokou kandekanya miṱa ya nnḓu yanga.

¹³ Ni songo tsha nnḓisela nduvho dzaṋu; a dzi na mushumo, mitsi yadzo i a nnengisa! A thi tsha kona u konḓelela vhuṱambo haṋu ha ṅwedzi u tshi dzula, na ha Sabatha, na maguvhangano aṋu a zwa vhurereli; zwoṱhe zwo tshinywa nga vhuvhi haṋu.

¹⁴ Vhuṱambo haṋu ha ṅwedzi u tshi dzula, na ha maḓuvha e na a khethela thungo, ndi zwi vhenga nga mbilu yanga yoṱhe, wo no tou vha muhwalo, wo nnetisa!

¹⁵ Ni tshi imisa zwanḓa ni tshi rabela a thi nga vhuyi nda ni lavhelesa. Nangwe na tou rabela hani a thi nga thetshelesi, hufha zwanḓa zwaṋu zwo ḓala malofha.

¹⁶ Thomani u ṱamba dzitshika; laṱani vhuvhi haṋu ndi si tsha vhu vhona; ni songo tsha tshinya.

¹⁷ Gudani u ita zwivhuya, lusani uri hu itwe zwi re zwone, kaidzani a kandeledzaho muṅwe; sengelani tsiwana, imani na tshilikadzi.”

¹⁸ Muṋe washu u ri, “Iḓani ri sumbedzane! Naho no tswuka nga vhuvhi ni ḓo ṱanzwiwa na sala no tshena unga mahaḓa. Naho vhutshinyi haṋu ho tswuka unga malofha ni ḓo ṱanzwiwa na sala ni tshi nga muḓali.

¹⁹ Arali na nthetshelesa, ndi hone ni tshi ḓo ḽa zwivhuya zwi bveledzwaho nga shango.

²⁰ Hone arali na nndandula, na ḓi futelela u ntshandukela, ni ḓo ḽiwa nga pfumo. Hu amba Nṋe Yahavee!”

Jerusalema wo shandukela Mudzimu

²¹ Muḓi we wa vha u tshi fulufhedzea wo shandukela Mudzimu unga musadzi wa phombwe o shandukela munna; wo vha wo ḓala vha lwelaho zwi re zwone, hu hone he vhuvhuya ha lala hone, hone zwino ho sala dziphondi.

²² Jerusalema, wo vha u tshi nga siliva, hone zwino u vho nga malambelo; wo vha u tshi nga waini i ḓifhaho, hone zwino u vho nga yo vangwaho maḓi.

²³ Vhavhusi vhau ndi mashandukwa, vha konana na mafobvu; vhoṱhe vha funesa tshanḓanguvhoni; vha tshi haṱula vha humbula zwifhiwa. A vha imeleli tsiwana tsengoni, a vha sengi mulandu wa tshilikadzi.

²⁴ Zwino-ha hu amba Muṋe wa zwoṱhe, Muṋe washu Mulangazwoṱhe, Ramaanḓa wa Israele, u ri, “Ndi ḓo laṱisa maswina anga, nda ḓilifhedzela.

²⁵ Ndi ḓo dovha nda angaladza tshanḓa tshanga nda ni rwa; ndi ḓo bvisa malambelo aṋu ṋanḓoni ya mulilo nda ni huṱa dzitshika.

²⁶ Ndi ḓo dovha nda ni fha vhahaṱuli na vhanna vha khoro vha fulufhedzeaho vha no nga vhaḽa vha misi iḽa ya kale. Ndi hone Jerusalema u tshi ḓo pfi muḓi muvhuya u fulufhedzeaho.”

²⁷ Muṋe washu ndi muvhuya, u lwela zwi re zwone; u ḓo vhofholola Tsioni na vhoṱhe henefho vhane vha laṱa vhuvhi havho;

²⁸ hone mashandukwa na vhatshinyi u ḓo vha kuya vhoṱhe; vhane vha landula Muṋe washu vha ḓo lovha.

²⁹ Ni ḓo shona zwe na vhuya na luvha miri; ni ḓo tou niwa nga ṱhoni zwe na vhuya na limela midzimu ngade.

³⁰ Ni ḓo nga muri wa maṱari o putaho, na nga ngade i sa sheledzwi.

³¹ Vha maanḓa vha ḓo lozwiwa nga mishumo yavho mivhi unga vhuṱasana vhu tshi fungwa nga ṱhase nthihi; zwi ḓo swa zwoṱhe ha si vhe na a konaho u dzima mulilo wazwo.