VHAROMA 8 - BIVHILI KHETHWA Mafhungo Madifha

Kutshilele kwa u vhuswa nga Muya Mukhethwa

¹ Zwino-ha vha re vhathihi na Khristo Yesu a vha tsha laṱwa.

² Muya u ri fha vhutshilo nga Khristo Yesu. Vhunga u tshi vho vhuswa nga Ene Muya wo vhofhololwa kha maanḓa a vhutshinyi na lufu.

³ Mudzimu o ita tshe Mulayo wa kundwa u ita nge muthu nga tsiko yawe a shaya nungo. O haṱula vhutshinyi nga u ruma Murwa wawe, uri a ḓe nga tshivhumbeo tsha muthu a vhuswaho nga vhutshinyi, a vhe tshipfumelo tsha vhutshinyi.

⁴ O zwi ita uri riṋe vhane ra tshila ri tshi langwa nga Muya, ri sa langwi nga tsiko yashu, ri vho kona u khunyeledza zwine Mulayo wa ṱoḓa.

⁵ Ndi uri vha no langwa nga tsiko yavho vha dzula vha tshi ṱoḓa zwa yeneyo tsiko; vha no langwa nga Muya vha dzula vha tshi ṱoḓa zwa Muya.

⁶ U livhisa mbilu kha zwa tsiko ya muthu hu isa lufuni; u livhisa mbilu kha zwa Muya hu ḓisa vhutshilo na mulalo.

⁷ U livhisa mbilu kha zwa tsiko yau ndi u vha swina ḽa Mudzimu, ngauri vha u ralo a vha tendi u vhusiwa nga Mulayo wa Mudzimu; na u kona a vha koni.

⁸ Vha no langwa nga tsiko yavho a vha koni u takadza Mudzimu.

⁹ Hone inwi a ni tsha langwa nga tsiko yaṋu, ni vho langwa nga Muya wa Mudzimu, vhunga Ene Muya a tshi dzula kha inwi. Hafhu arali muthu a si na Muya wa Khristo, uyo a si wawe.

¹⁰ Hone arali Khristo e kha inwi, naho muvhili wo fa nga vhutshinyi, Ene Muya u ni fha vhutshilo nge na pfi vhavhuya.

¹¹ Huno arali Muya wa o vusaho Yesu vhafuni a tshi dzula kha inwi, Ene o vusaho Khristo vhafuni, na mivhili yaṋu i faho u ḓo i ṋea vhutshilo nga Muya wawe a no dzula kha inwi.

¹² Zwino-ha vha hashu, a ro ngo ḽa mulandu wa tsiko yashu lune ra nga tshila ri tshi tevhedza yone.

¹³ Arali ni tshi tshila nga u tevhela zwa tsiko yaṋu, tshaṋu ndi u lovha; hone arali ni tshi vhulaha mishumo mivhi ya muvhili nga Muya, ni ḓo tshila.

¹⁴ Vhane vha endedzwa nga Muya wa Mudzimu ndi vhone vhana vha Mudzimu.

¹⁵ Muya we Mudzimu a ni ṋea ha ri iti phuli dzine dza sokou dzula dzi na nyofho, u ri ita vhana vha Mudzimu a ri konisa u vhidzelela ra ri, “Baba, Muṋe wanga!”

¹⁶ Ngauralo Muya wa Mudzimu Ene muṋe u ḓadzisa vhuṱanzi ha mbilu dzashu ha uri ri vhana vha Mudzimu.

¹⁷ Huno arali ri vhana, ri maḽaifa; ri maḽaifa a Mudzimu vhane ifa ra ḽa roṱhe na Khristo. Arali ri tshi tambula ra nga Ene, ri ḓo ṋewa-vho vhugala nae.

Vhugala vhu ḓaho

¹⁸ Nṋe ndi vhona uri u tambula ha tshifhinga tshino hu nga si vhuye ha vhambedzwa na vhugala vhune ra ḓo dzumbululelwa.

¹⁹ Zwisikwa zwoṱhe zwo lavhelela zwa musi Mudzimu a tshi ḓo dzumbulula vhana vhawe.

²⁰ Ndi uri zwisikwa zwoṱhe zwo kumedzwa mahandanani; hu si nga u funa hazwo; ndi Mudzimu o zwi kumedzaho, a dovha a zwi vhetshela tshilavhelelwa

²¹ tsha uri zwi ḓo vhuya zwa vhofhololwa vhupulini ha u lovha, zwa ṋewa vhugala ha vhana vha Mudzimu vho vhofhololwaho.

²² Ri a zwi ḓivha uri tsiko yoṱhe u swika zwino i kha ḓi gomela, ya songololwa sa tshikole tshi tshi vhofholowa.

²³ A si tsiko fhedzi ine ya gomela; na riṋe vha re na tshiranzhe – Ene Muya – na riṋe ri khou fhihamelwa ro lavhelela ḓuvha ḽine Mudzimu a ḓo khunyeledza u ri ita vhana vhawe, ri tshi vhofhololwa – zwoṱhe zwine ra vha zwone.

²⁴ Ndi uri ri tshi tshidzwa ro itelwa zwine ra kha ḓi vha ro lavhelela. Ndi nnyi ane a kha ḓi lavhelela tshe a no ḓi tshi wana?

²⁵ Hone arali ro lavhelela tshine ra sa athu tshi vhona, ndi hone ro tshi ṱulutshela ri sa fheli mbilu.

²⁶ Nga nḓila yeneyo Muya u ri ṱhaḓula kha u shaya nungo hashu. Riṋe a ri ḓivhi u rabela nga nḓila yo fanelaho. Hone Muya Ene muṋe u tou fhihamelwa a tshi swikisedza zwine maipfi ashu a kundwa u bula.

²⁷ Mudzimu Ene ane a sedzesa zwi re mbiluni dza vhathu u ḓivha zwine Muya a amba; ngauri a tshi humbelela vhakhethwa vha Mudzimu u tevhedza zwine Mudzimu a funa.

²⁸ Ri a zwi ḓivha uri vha funaho Mudzimu – vhenevho vhe a vha vhidza nga he a dzula o dzudzanya – avho zwoṱhe zwine vha ṱangana nazwo zwi vha ḓisela tshivhuya,

²⁹ ngauri vhe a dzula o vha nanga, o dzula o vha tela u fana na Murwa wawe, uri Ene a vhe Tanzhe ḽa vharathu vhanzhi.

³⁰ Vhenevho vhe a vha ta, o vha vhidza; vhe a vha vhidza o ri vha pfi vhavhuya; vhe a ri vha pfi vhavhuya o vha ṋea vhugala.

U sa fhandekanywa na lufuno lwa Mudzimu

³¹ Zwino ri nga dovha ra ri mini? Arali Mudzimu a tshi ima na riṋe, ane a nga kha ḓi ri pikisa ndi nnyi?

³² Ene we a si tshivhe na Murwa wawe muthihi fhedzi, a tou mu kovha a tshi ri a fele roṱhe; a tshi ri ṋea Murwa wawe ndi zwine a nga kundwa ngani u ri ṋea zwoṱhe-zwoṱhe naa?

³³ Vhanangiwa vha Mudzimu vha nga hwelelwa nga nnyi? Hufha Ene muṋe o no ḓi amba a ri a vha na mulandu.

³⁴ Ndi nnyi ane a vha laṱa? Hufha Khristo Yesu o fa; hufha na u vuwa o vuwa; hufha e thungo ya tshanḓa tshauḽa tsha Mudzimu a tshi khou ḓi ri pfumelela.

³⁵ Ndi nnyi-ha ane a nga ri fhandekanya na lufuno lwa Khristo? Kani a nga vha vhuleme, kana u tambula, kana u tovholwa, kana nḓala, kana tsiku, kana khombo, kana pfumo naa?

³⁶ Iṱali ho ṅwalwa ha pfi, “Ngau ra vha vhau ri ṱwa ro livhana na lufu; ri fanyiswa na zwikono zwi tshi ya u ṱhavhiwa.”

³⁷ Naho zwo ralo hezwo zwoṱhe ro zwi kunda tshoṱhe nga we a ri funa.

³⁸ Zwenezwo ndo fulufhela uri hu lufu, hu vhutshilo, hu vharuṅwa, hu mivhuso i re ṱaḓulu, hu zwa zwino, hu zwa tshifhinga tshi ḓaho, hu mimuya ya maanḓa,

³⁹ hu zwa ṱaḓulu, hu zwa fhasi, hu tshiṅwe tshisikwa-vho – a tshiho tshine tsha nga ri fhandekanya na lufuno lwa Mudzimu lwe a ri itela nga Khristo Yesu Muṋe washu.