VHAROMA 4 - BIVHILI KHETHWA Mafhungo Madifha

Abrahamu a tshi pfi muvhuya

¹ Ri ri mini nga Abrahamu khotsi a lushaka lwashu? Ho itea mini khae?

² Ngavhe o pfi muvhuya nga zwe a shuma, ndi musi nangoho a tshi nga kona u ḓikhoḓa. Hone zwino ha koni u zuwela Mudzimu,

³ vhunga Maṅwalo a tshi ri, “Abrahamu o fulufhela Mudzimu, ndi zwe a pfi muvhuya ngazwo.”

⁴ Ndi uri malamba a mushumi ha ṋewi nga u tou khathutshelwa, ndi o mu fanelaho.

⁵ Huno muthu a si na tshe a shuma, we a tou fulufhela Mudzimu ane a kona u ri mutshinyi ha tshee mutshinyi, onoyo ndi nga u fulufhela hawe a tshi pfi muvhuya.

⁶ Ndi one mashudu a no ambiwa nga Dafita, a tshi ri ndi a uyo we a pfi muvhuya a si na tshe a shuma. Dafita a tshi mu amba u ri,

⁷ “Vha na mashudu ndi avho vhe Mudzimu a vha hangwela zwivhi zwavho, vhe vhutshinyi havho a vhu fukedza.

⁸ Wa mashudu ndi uyo munna ane Mudzimu a si mu vhalele vhutshinyi hawe.”

⁹ Aya mashudu a ambiwaho afha, ndi uri ndi a vho fumbaho fhedzi, kana na vha songo fumbaho vha nga vha nao na? Ndi a vhoṱhe. A thi ri hu pfi ndi nga lutendo Abrahamu a tshi pfi muvhuya?

¹⁰ Zwo tou ḓa hani uri a pfalwo? O pfi muvhuya o no fumba, kana a sa athu? Ndi musi a sa athu fumba.

¹¹ U fumba tsho tou vha tshiga na luswayo lwe a ṋewa ngavhuya, lwa u khwaṱhisa zwe a vha o no ḓi pfi muvhuya kale nga u fulufhela Mudzimu, zwiḽa a sa athu fumba. Ngauralo o ḓo vha khotsi a vhoṱhe vhane vha fulufhela Mudzimu, naho vha songo fumba, uri na vhone vha kone u pfi vhavhuya.

¹² Na vho fumbaho o ḓi vha khotsi avho, fhedzi hu si nge vha fumba; ndi nge vha kanda vhuṱalani ha khotsi ashu Abrahamu zwiḽa a tshi fulufhela Mudzimu a sa athu fumba.

U ṱanganedza nga lutendo zwe Mudzimu a fulufhedzisa

¹³ Hu ḓi nga zwiḽa Mudzimu a tshi fulufhedzisa Abrahamu a ri shango ḽi ḓo vha ifa ḽawe na vhaḓuhulu vhawe, ho ngo zwi ita nge Abrahamu a vha o khunyeledza Mulayo, o zwi ita nge a tou vha na lutendo, a konou pfi muvhuya.

¹⁴ Arali vha tshi ḽa ifa heḽo nga u khunyeledza Mulayo, izwo lutendo a lu tshee na mushumo, na zwe Mudzimu a vha fulufhedzisa a zwi tshee tshithu.

¹⁵ Mulayo hufha u tshi ḓisa ṱhamu ya Mudzimu musi ri tshi u pfuka! Hone hu si na mulayo, na u pfuka a huho.

¹⁶ Ndi zwine ra ri zwi bva kha lutendo fhedzi, uri tshi vhe tshilidzi, vhaḓuhulu vhoṱhe vha Abrahamu vha wane zwe vha fulufhedziswa – vhaḓuhulu ri sa ambi avho fhedzi vho ṋewaho Mulayo, ri amba na avho vha lutendo lwonolwo lwa Abrahamu. Kha Mudzimu Abrahamu ndi khotsi ashu roṱhe,

¹⁷ vhunga ho ṅwaliwa ha pfi, “Ndo ita uri u vhe khotsi a tshakha nnzhi.” Onoyo Mudzimu we Abrahamu a mu fulufhela ndi Ene a no ita uri vho faho vha tshile. Ndi Ene ane nga u tou amba fhedzi, a ita uri zwi siho zwi mbo ḓi vha hone.

¹⁸ Naho zwo vha zwi si tsha fulufhedzisa, Abrahamu a ḓi fulufhela, a dzula o lavhelela; ndi zwe a vha khotsi a tshakha nnzhi ngazwo, vhunga zwo vha zwo ambiwa ha pfi, “Na vhaḓuhulu vhau vha ḓo anda nga u tou rali.”

¹⁹ Nga tshifhinga tshenetsho o vha a tshi vho hovhelela miṅwaha ya ḓana; hone ho ngo ri u vhona a si tsha kona u beba, na Sara o no kegula, lutendo lwawe lwa fhungudzea.

²⁰ Ho ngo vhuya a timatima nga u sa fulufhela zwe Mudzimu a mu fulufhedzisa; lutendo lwawe lwa khwaṱha ha vha u renda Mudzimu.

²¹ A vha na lutendo lwo khwaṱhaho, a tshi ḓivha uri Mudzimu u na maanḓa a u khunyeledza zwoṱhe zwe a fulufhedzisa.

²² Ndi zwe Mudzimu a ri o pfi muvhuya ngazwo.

²³ Zwino heḽi ḽa uri “o pfi muvhuya” a ḽo ngo ṅwalelwa ene fhedzi;

²⁴ ḽo ṅwalelwa na riṋe vhe ra ḓo pfi vhavhuya, riṋe vhe ra fulufhela o vusaho Yesu Muṋe washu vhafuni, Ene Mudzimu.

²⁵ Ene o kumedzwa lufuni nga u khakha hashu, a vuswa uri riṋe ri kone u pfi vhavhuya.