VHAROMA 3 - BIVHILI KHETHWA Mafhungo Madifha

¹ Majuda izwo vha kha ḓi fhira vhannḓa nga zwifhio? U fumba hu kha ḓi farisani?

² Hu farisa hunzhi na nga nḓila nnzhi. Tshihulwane ndi uri Mudzimu o vha kumedza maipfi awe.

³ Zwi na mini arali vhaṅwe vhavho vho vha vha songo fulufhedzea? Zwi nga amba uri Mudzimu Ene muṋe ha tsha fulufhedzea naa?

⁴ Na kathihi, Mudzimu u ḓi vha wa u fulufhedzea naho vhathu vhoṱhe vha sa fulufhedzei. Ndi zwine Maṅwaloni ha pfi, “U wanale u wa ngoho u tshi ṱanziela, musi hu tshi sengiwa u ḓi wanala u si na mulandu.”

⁵ Zwino hufha u tshinya hashu hu tshi ita uri hu vhonalese vhuvhuya ha Mudzimu. Ri nga ri mini-ha? Ri ḓo ri Mudzimu a tshi ri haṱula ndi u khakha naa? – ndi tshi ralo ndi amba lwa vhathu –

⁶ Na kathihi! Arali zwo vha zwo ralo Mudzimu o vha a tshi ḓo haṱula hani shango?

⁷ Ndi ri ndi kha ḓi haṱulelwani nda pfi ndi mutshinyi? Hufha u sa fulufhedzea hanga hu tshi ita uri hu vhonalese u fulufhedzea ha Mudzimu, ha vha u engedza vhugala hawe.

⁸ Izwo a si khwiṋe u tou ri, “Nga ri ite zwashu zwivhi uri hu bvelele zwivhuya”? Iṱali vhaṅwe vhathu vha tshi nnzwifhelela vha ri ndo ralo. Vhenevho vha ḓo laṱwa nga Mudzimu, vhunga zwi zwone zwo fanelaho.

A hu na muvhuya

⁹ Mini-ha zwino? Kani riṋe Majuda ri fhira vhannḓa? Na kathihi a zwo ngo ralo. Ndo no ḓi sumbedza uri hu Majuda, hu vhannḓa, vhoṱhe vha vhusiwa nga vhutshinyi.

¹⁰ Ndi zwine Maṅwaloni ha pfi: “A hu na na muthihi zwawe a re muvhuya;

¹¹ a hu na a re na ṱhalukanyo; a hu na a no fungelela u ṱoḓa Mudzimu.

¹² Vhoṱhe vho bva nḓilani, a vha tsha ḓivhalea. A hu na a no ita zwivhuya, na muthihi zwawe.”

¹³ “Haṋwani havho hu nga tshalo tshi songo fukedzwaho; ndimi dzavho dzi fhufhuma mazwifhi.” “Maipfi avho a nga vhuṱungu ha vuluvulu.”

¹⁴ “Milomo yavho yo mara maṱamba mavhi.”

¹⁵ “Milenzhe yavho i gidimela u shulula malofha;

¹⁶ hune vha kanda hu sala tshinyalo na zwililo.

¹⁷ Nḓila ya mulalo a vha i ḓivhi.”

¹⁸ “A vha ofhi Mudzimu na zwiṱuku.”

¹⁹ Huno riṋe ri ḓivha uri zwoṱhe zwine Mulayo wa Mudzimu wa amba zwo ambelwa avho vha vhuswaho ngawo, hu u itela uri hu sa ḓo vha na ane a nga ḓiṱamba, shango ḽoṱhe ḽi fanelwe nga khaṱhulo ya Mudzimu.

²⁰ Ngauralo a hu na ane a ḓo pfi muvhuya nga u ita zwine Mulayo wa amba; tshine Mulayo wa ita ndi u sumbedza muthu vhutshinyi hawe.

U pfi vhavhuya nga lutendo

²¹ Hone zwino ho dzumbululwa nḓila ya Mudzimu ya u ri ita vhavhuya, i si ya u khunyeledza Mulayo, naho i tshi ṱanzilelwa Mulayoni na Maṅwaloni a vhaporofita.

²² Ri pfi vhavhuya nga u fulufhela Yesu Khristo, uri vhoṱhe vha mu fulufhelaho vha pfi vhavhuya. Vha a fana;

²³ vhoṱhe vho tshinya, vho ḓikhaukanya na Mudzimu wa vhugala.

²⁴ Vha tshi pfi vhavhuya ndi u tou ṋewa nga fhedzi, ndi u tou khathutshelwa, nge Khristo Yesu a vha vhofholola.

²⁵ Ene, Mudzimu o mu kumedza zwi tshi vhonwa nga muṅwe na muṅwe uri nga lufu lwawe a vhe tshipfumelo tsha vha mu fulufhelaho. Mudzimu a tshi ralo ho vha hu u vhonadza vhuvhuya hawe. Kale o vha a tshi tsinya iṱo

²⁶ a konḓelela vhutshinyi ha vhathu. Hone zwino u vho vhonadza vhuvhuya hawe, uri Ene a vhonale e muvhuya, na zwauri a fulufhelaho Yesu ndi ene ane a pfi muvhuya.

²⁷ Zwino tshine muthu a nga kha ḓi ḓikhoḓa ngatsho a ri: ndo shuma, ndi tshifhio? A hu na. Hufha o tshidzwa nga u tou fulufhela Mudzimu. Zwino a nga kha ḓi zuwa hani mishumo yawe?

²⁸ Ndi uri ri tshi elekanya ri vhona uri muthu u pfi muvhuya nga u fulufhela, hu si nga u khunyeledza zwine Mulayo wa amba.

²⁹ Kani-ha Mudzimu ndi Mudzimu wa Majuda fhedzi? Vhannḓa ha ḓi vha Mudzimu wavho naa? Iina, na vhone ndi Mudzimu wavho,

³⁰ vhunga hu na Mudzimu muthihi fhedzi, huno hu Majuda, hu vhannḓa, u ḓo ri vha pfi vhavhuya nge vha mu fulufhela.

³¹ Zwino zwi amba uri ri khou vhulaha Mulayo nge ha shuma lutendo? Na kathihi! Ndi hone-ha ri tshi khou tou u pfumbisa.