VHAROMA 16 - BIVHILI KHETHWA Mafhungo Madifha

A u onesa

¹ Ndi khou swikisa Vho-Foivhe , khaladzi ashu. Ndi mushumeli wa tshivhidzo tsha Khengria.

² Ni vha ṱanganedze nga nḓila ine vhakhethwa vha Muṋe washu vha fanela u ṱanganedza muṅwe ngavho; ni vha farise kha tshiṅwe na tshiṅwe tshine vha lila; ndi mutondi wa vhanzhi, na nṋe vho ḓi ntonda.

³ Phriska na Akwila vhe ra shumisana mushumoni wa Khristo Yesu vha vhe hone.

⁴ Ndi vhone vhe vha vhuya vha ḓifunga vha wela khomboni he vha vha vha tshi nga kha ḓi fa, vha tshi itela u ntshidza. A si nṋe fhedzi ane nda vha livhuha kha hezwo; na zwivhidzo zwoṱhe zwa vhannḓa zwi a vha livhuha.

⁵ Na tshivhidzo tshi kuvhanganaho nḓuni yavho tshi vhe hone. Ndi sa hangwi na khonani yanga Ephinethosi ane nda mu funa, ene tanzhe ḽa vha Khristo shangoni ḽa Asia.

⁶ Na Maria a vhe hone, muthu we a ḓinetisa tshoṱhe a tshi ni shumela;

⁷ na Andronikosi na Juniasi, Majuda sa nṋe, vhe nda vha ndi navho dzhele, vhanna vha ḓivheaho kha vhaapostola. Vhone vho vha Vhakhriste nṋe ndi sa athu.

⁸ Na Ampliatosi, khonani yanga nge ra vha vha Muṋe washu roṱhe, a vhe hone,

⁹ na Urbanosi we ra vhuya ra shumisana mushumoni wa Khristo, na Stakisi khonani ine nda i funa.

¹⁰ Ni songo hangwa Apelesi, we a vhonala a tshi fulufhedzea kha u shumela Khristo; na vha ha Aristobulosi;

¹¹ na Herodioni uḽa a re Mujuda sa nṋe; na vha ha Narkisosi vha re vha Muṋe washu;

¹² na Thraifina na Thraifosa, vhashumi vha biko kha zwa u shumela Khristo; na Pheresisi khaladzi anga ane nda mu funa, we a shumela Muṋe washu zwinzhi;

¹³ na Rufasi uḽa Mukhriste a ḓivheaho wa Muṋe washu, khathihi na mme awe vhe vha tou mpfara sa ṅwana wavho.

¹⁴ Na Asinkritosi a vhe hone, na Flegoni na Hermesi, na Phathrobasi, na Hermasi, na vhoṱhe vhatendi vha re navho;

¹⁵ na Filologosi, na Julia, na Neriasi na khaladzi awe, na Olimpasi, na vhakhethwa vhoṱhe vha Mudzimu vha re navho.

¹⁶ Ni reshane nga u kuvhatedzana sa vhatendi. Zwivhidzo zwoṱhe zwa Khristo zwi ri ni vhe hone.

¹⁷ Ndi a ni ṱuṱuwedza vha hashu, ndi ri ni thanyele vhane vha vusa mufhirifhiri na u xedza vhaṅwe; izwo a zwi anḓani na zwe na funzwa. Vhenevho vha tinyeni;

¹⁸ a vha shumeli Muṋe washu Khristo, vha shumela thumbu dzavho. Vha fhura vha si na nzhele nga kuambele kwavho kwa vhuhwavho na zwiambo zwi takadzaho.

¹⁹ Inwi-ha hufha zwo no ḓi pfala hoṱhe uri ni vha thetshelesaho Mudzimu, ndi takadzwa nga zwenezwo, ndi ri ngavhe ni tshi vha vhaṱali kha zwivhuya, kha zwivhi ni si ḓivhe tshithu.

²⁰ Hu si kale Ene Mudzimu Muladzashango u ḓo kuyekanya Saṱhane a mu vhea fhasi ha milenzhe yaṋu. [Ngavhe Muṋe washu Yesu a tshi ni itela vhuthu.]

²¹ Timoti uyu ane nda shuma nae, u ri ni vhe hone. Na Lukiosi, na Jasoni, na Sosipatere, Majuda nga nṋe, vha ralo.

²² Na nṋe Tertiosi ane nda khou ṅwala maipfi a Paulo luṅwaloni luno ndi ni resha nga dzina ḽa Muṋe washu.

²³ Gayosi muṋe wa uno muṱa, une tshivhidzo tshoṱhe tsha ḓi kuvhangana khawo, u ri ni vhe hone; na Erastosi mufaragwama wa uno muḓi, na Kwartosi wa hashu.

U renda Mudzimu

²⁵ Kha hu huliswe Mudzimu ane a kona u ni khwaṱhisa, nga he nda funza mafhungo maḓifha, na ḓivhadzwa a Yesu Khristo, ni tshi dzumbululelwa tshiphiri tsha Mudzimu tshe tsha vha tshi sa buliwi tsha kale na kale,

²⁶ tshe zwino tsha bviselwa khagala nga Maṅwalo a vhaporofita, nga he Mudzimu wa lini na lini a ta ngaho. Zwo itelwa uri tshakha dzoṱhe dzi tshi ḓivhe-vho, dzi tende mafhungo awe dzi mu thetshelese.

²⁷ Vhugala ndi ha Mudzimu, Ramaano e eṱhe, nga Yesu Khristo, lini na lini. Amen.