VHAROMA 14 - BIVHILI KHETHWA Mafhungo Madifha

Ri songo haṱulana

¹ A re na valuvalu kha lutendo ni mu ṱanganedze-vho, tenda na si mu ṱaṱise khani nga zwine a humbula.

² Ndi uri muṅwe u tenda uri zwoṱhe zwi a ḽiwa, hone a songo khwaṱhaho kha lutendo u ḽa miroho fhedzi.

³ Zwenezwo-ha a ḽaho zwoṱhe a songo nyadza a ilaho zwiṅwe; zwi ḓi nga a ilaho zwiṅwe a songo vhea mulandu kha a sa ili; hufha Mudzimu o mu ṱanganedza.

⁴ Iwe u nnyi une wa vhea mulandu mulanda wa muṅwe? A nakisa u koniswa nga Muṋe wawe; zwi ḓi nga a kundwa, zwi vhonwa nga Muṋe wawe. Hone u ḓo nakisa, ngauri Muṋe wawe u na maanḓa a u mu konisa.

⁵ Muṅwe u vhona ḓuvha ḽiṅwe ḽi ḽikhethwa, muṅwe a vhona oṱhe a tshi fana. Tenda muṅwe na muṅwe a vhona zwine a ita zwi zwone vhukuma mbiluni yawe ene muṋe.

⁶ Ane a ḽi ita ḽikhethwa u itela u hulisa Muṋe washu; zwi ḓi nga ane a ḽa zwoṱhe, u ḽa a tshi hulisa Muṋe washu, ngauri a tshi ḽa u livhuha Mudzimu. Na ane a ila zwiṅwe, u zwi ila a tshi ri ndi u hulisa Muṋe washu, hu uri na ene u ḓi livhuha Mudzimu.

⁷ Hufha hu si na na muthihi washu ane a ḓitshilela ene muṋe, na ane a ḓifela.

⁸ Ri tshi tshila ri tshilela Muṋe washu, naho ri tshi fa ri fela Muṋe washu. Ndi zwone hu musi ri tshi tshila, hu musi ri tshi fa, ri vha Muṋe washu.

⁹ Ndi zwe Khristo a fa a dovha a vuwa; ho vha u itela uri a ḓo vha Khosi ya vho faho na vha tshilaho.

¹⁰ Zwino inwi-ha, ni ṋetshelani mulandu mukomana waṋu? Inwi-vho, ni nyadzelani murathu waṋu? Hufha roṱhe ri tshi ḓo sengiswa nga Mudzimu.

¹¹ A thi ri ho ṅwalwa ha pfi, “ ‘Ndi ana nga vhutshilo hanga,’ hu tshi amba Muṋe washu, ‘vhathu vhoṱhe vha ḓo nnduvha; vhoṱhe vha ḓo bula vha ri ndi Mudzimu.’ ”

¹² Zwenezwo-ha muṅwe na muṅwe washu u ḓo ḓifhindulela phanḓa ha Mudzimu.

Ri songo wedzana khomboni

¹³ Zwino-ha kha ri litshe u sumbana nga minwe; ndi khwiṋe u vhofha ḽa uri ri songo wedzana khomboni kana u dzhenisana vhutshinyini.

¹⁴ Nge nda vha wa Khristo ndi fulufhela ndi si na valuvalu uri a hu na tshithu na tshithihi tshine tsha pfi tshi na tshika tshone tshiṋe; tshi tou vha tsha tshika kha onoyo a tshi humbulelaho uri tshi na tshika.

¹⁵ Arali murathu wau a tshi pfa vhuṱungu nga u vhona zwine iwe wa ḽa, zwenezwo zwine wa ita a u tsha itiswa nga lufuno. Muthu we Khristo a mu fela a songo lovha nga mulandu wa zwine wa ḽa.

¹⁶ Ni sedze uri zwivhuya zwine na vha nazwo zwi si soliwe,

¹⁷ ngauri muvhuso wa Mudzimu a si mafhungo a u ḽa na u nwa, hai, ndi a vhuvhuya, na a mulalo, na a dakalo zwi bvaho kha Muya Mukhethwa.

¹⁸ Ane a shumela Khristo nga u ralo, Mudzimu u a mu takalela, na vhathu vha a mu hulisa.

¹⁹ Zwino-ha kha ri vhe vha ṱoḓaho zwi ḓisaho mulalo na u fhaṱa.

²⁰ Ni songo thutha mushumo wa Mudzimu ni tshi itiswa nga mafhungo a zwiḽiwa. Zwoṱhe zwi nga ḓi ḽiwa, hone ndi u khakha u ḽa tshithu tshine tsha nga wedza muṅwe khomboni.

²¹ U ita zwone u tshi ḓiilisa ṋama kana waini, kana tshiṅwe-vho arali tshi tshi nga wedza mutendi nga iwe khomboni.

²² Hezwo zwine wa tenda u si na valuvalu nga zwi vhe zwa iwe muṋe na Mudzimu. U na mashudu ane a si ḓivhone mulandu musi a tshi ita zwine a vhona zwi zwone.

²³ Hone ane a ḽa e na valuvalu u na mulandu, nge a ḽa mbilu i sa tendi; huno zwoṱhe zwine wa ita u si na ngoho ndi vhutshinyi.