VHAROMA 12 - BIVHILI KHETHWA Mafhungo Madifha

Kutshilele kwa Tshikhriste

¹ Ndi a ni kwengweledza-ha vha hashu, vhunga Mudzimu o ri pfela vhuṱungu vhungafhangafha, ndi ri: ḓikumedzeni tshoṱhe ni vhe nduvho khethwa i tshilaho, i takadzaho Mudzimu. Ndi hone u luvha Mudzimu zwi tshi bva mbiluni.

² Ni songo edzisa matshilele a vha shango ḽino, aiwa, Mudzimu kha a ni fhe mihumbulo miswa, ni shanduke, uri ni kone u ṱalukanya zwine Ene a funa – zwivhuya, zwi mu takadzaho, zwi si tshiṱahe.

³ Mudzimu nga vhuthu hawe o nṋea uri ndi ni laye noṱhe, ndi ri: hu songo vhuya ha vha na muthihi waṋu ane a kalula u ḓifhima. Ndi khwiṋe a tshi ḓiṱukufhadza a tevhedza muelo wa lutendo lwe Mudzimu a mu kovhela.

⁴ Kha muvhili muthihi hu na miraḓo minzhi, miraḓo yone i si vhe na mushumo muthihi;

⁵ sa zwenezwo na riṋe, naho ri vhanzhi ri muvhili muthihi nge ra vha vhathihi na Khristo; ri miraḓo ya muvhili muthihi i angulanaho.

⁶ Ri na mpho dzo fhambanaho nga he Mudzimu a ri kovhela ngaho nga vhuthu hawe. Arali mpho i ya u ḓivhadza vhathu zwine Mudzimu a funa, muthu nga a ḓivhadze zwi anḓanaho na lutendo;

⁷ arali i ya u shumela vhaṅwe nga a vha shumele; arali i ya u funza nga a funze;

⁸ arali i ya u ṱuṱuwedza nga a ṱuṱuwedze; arali i ya u tonda nga a vhe mapakulile; arali i ya u ranga tshivhidzo phanḓa, nga a zwi ite nga mbilu yoṱhe; arali i ya u itela vhaṅwe vhuthu, nga a zwi ite o takala.

Kutshilele kwa lufuno

⁹ Lufuno lwaṋu lu songo vha lwa u hoya; nengwani zwivhi, ni nambatele zwivhuya.

¹⁰ Funanani sa vhana vha musadzi, ni takalelane. Ni pikisane kha u hulisana.

¹¹ Shumelani Muṋe washu ni sa teledzi, no tou ḓifunga nga mbilu yoṱhe.

¹² Vhunga ni na zwe na lavhelela, pembelani; ni si fhele mbilu naho ni tshi tambudzwa; ni dzule ni tshi rabela.

¹³ Vhakhethwa vha Mudzimu vha tshi shaya ni vha kovhele zwine na vha nazwo, ni takalele vhaeni.

¹⁴ Vha ni tovholaho ni songo vha teketela, ni ri zwi vha nakele.

¹⁵ Ni takale na vha takalaho, vha lilaho ni lile navho.

¹⁶ Anḓanani nga tshaṋu; ni songo lilela vhuhulwane, ni ḓiite vhathihi na vhaṱuku; ni songo ḓifhima ni vha ḓivhesaho.

¹⁷ Ni songo lifhedza vhuvhi nga vhuvhi na kathihi. Ḓiimiseleni u ita zwine vhoṱhe vha kona u vhona zwi zwivhuya.

¹⁸ Dzulani ni tshi konana na vhathu vhoṱhe nga hune zwa konadzea, phambano dzi si thome kha inwi.

¹⁹ Vhafunwa, ni songo ḓilifhedzela, khaṱhulo i vhe ya Mudzimu, ngauri zwo ṅwalwa ha pfi, “ ‘U lifhedza ndi hanga, ndi Nṋe ane nda tevhedza,’ hu tshi amba Muṋe washu.”

²⁰ “Swina ḽau ḽí na nḓala u ḽi ṋee ḽi ḽe; ḽí na ḓora ḽi ṋee ḽi nwe. Ndi hone ḽi tshi ḓo tou niwa nga ṱhoni ḽa ḓisola.”

²¹ Ni songo vhuswa nga vhuvhi; ni vhu kunde nga u tonda.