VHAROMA 11 - BIVHILI KHETHWA Mafhungo Madifha

Kugwada kwa Vhaisraele vho tshidzwaho

¹ Zwino ndi ri kani Mudzimu o laṱa vhathu vhawe? Na kathihi! Hufha na nṋe ndi Muisraele muḓuhulu wa Abrahamu, wa tsinde ḽa Benyamini.

² Mudzimu ho ngo laṱa vhathu vhawe vhe a dzula o vha ta. Kani zwine Maṅwalo a amba a ni zwi ḓivhi, fhaḽa he Elia a hwelela Vhaisraele ha Mudzimu a tshi ri,

³ “Muṋe wanga, vho vhulaha vhaporofita vhau, vha thutha aḽiṱari dzau; ndo sala ndi ndoṱhe, na nṋe vha vho ṱoḓa u mmbulaha.”

⁴ Phindulo ya Mudzimu ya ri mini? Ya ri, “Ndo ḓisiela vhanna vha 7 000 vhe vha si gwadamele Baali.”

⁵ Na ṋamusi zwo ralo: ho sala kugwada nga he Mudzimu a ta ngaho nga khathutshelo yawe.

⁶ Arali zwo bva kha khathutshelo, ndi uri a zwo ngo bva kha mishumo ye vha shuma, ndi musi khathutshelo i songo tsha vha khathutshelo.

⁷ Mini-ha zwino? Ndi uri tshine Vhaisraele vha khou ḓi tshi ṱoḓa a vho ngo tshi wana; tsho waniwa nga vhe Mudzimu a vha ta; vhaṅwe vho rindidzwa,

⁸ unga ho ṅwalwa ha pfi, “Mudzimu o eḓedza mimuya yavho, a swingisa maṱo avho, a dzingisa na nḓevhe dzavho, na ṋamusi.”

⁹ Na Dafita u ri, “Vhuḽelo havho nga vhu shanduke, vhu vhe gwekwe, vhu vhe tshifu, vhu vhe tshikhukhuliso na tshilifhedzi.”

¹⁰ “Maṱo avho nga a swingiswe uri vha si vhone, vha si vhuye vha rulwa muhwalo wavho.”

Matavhi o ṱumiwaho

¹¹ Zwino ndi ri kani Vhaisraele vho khukhulwa hu tshi pfi vha we tshoṱhe? Na kathihi! U khakha havho ho vha u itela uri vhannḓa vha tshidzwe, uri vhone vha sale vha tshi zwi tama-vho.

¹² Arali zwino u khakha havho ho pfumisa shango, u shaya havho ho pfumisa vhannḓa, zwino u vhuya havho nga vhuḓalo a zwi nga ḓo pfumisa vhannḓa u fhira na zwiḽa naa?

¹³ Zwino ndi vhudza inwi vhannḓa, vhunga ndi muapostola we a rumiwa ha vhannḓa, ndi ri mushumo uyu wanga a thi tambi ngawo

¹⁴ ndi tshi ri vhaḽa vha re malofha mathihi na nṋe vha tshi zwi vhona vha zwi tame-vho, ndi tshidze vhaṅwe vhavho.

¹⁵ Arali shango ḽo pfumelelwa nga u laṱwa havho, u dovha u ṱanganedzwa havho zwi ḓo vha zwingafhani? A zwi nga ḓo nga vhafu vha tshi dovha vha tshila?

¹⁶ Arali kugaku kwa u thoma kwa vhurotho ku kukhethwa, ndi uri vhuṅwe hoṱhe ndi vhukhethwa; nahone arali mudzi u mukhethwa, na matavhi ndi makhethwa.

¹⁷ Arali zwino maṅwe matavhi a muolivi o tumulwa, vhudzuloni hao ha ṱumiwa iwe we wa vha u muolivi wa ḓaka, wa vha na mukovhe kha mudzi wa muolivi u re na mapfura manzhi,

¹⁸ iwe u songo zuwela matavhi a uyo muri. Hone arali u tshi zuwa, u zwi ḓivhe uri a si iwe we wa tika mudzi, ndi mudzi we wa tika iwe.

¹⁹ U nga ḓi ri, “Hufha ho tumulwa matavhi uri nṋe ndi ṱumiwe henefho.”

²⁰ Ndi zwone. Vho tumulwa nga u shaya lutendo, iwe u henefho nge wa fulufhela. U songo ḓihudza-ha, tshau nga hu vhe u dzula u tshi ofha.

²¹ Arali matavhi vhukuma Mudzimu a songo litsha u a tumula, iwe a nga si u tumule ngani?

²² Edzou vhona uri Mudzimu u na vhulenda vhungafhani, hone zwe a amba zwi sa wi fhasi: vho guneaho ha litshi u vha rwa, iwe a tshi u fara nga vhulenda – arali u sa tambi nga vhulenda hawe; hone arali wa sa ralo na iwe u ḓo u tumulela kule.

²³ Zwi ḓi nga vhaḽa vho tumulwaho, arali vha sa futeleli u sa fulufhela havho vha ḓo ḓi dovha vha ṱumiwa-vho; Mudzimu u na maanḓa a u dovha u vha ṱuma.

²⁴ Arali iwe we nga tsiko yau wa bva kha muolivi wa ḓaka wo ṱuṅwa kha muolivi wavhuḓi, u si mbeu nthihi nawo, avha vha re mbeu nthihi nawo vha nga kundwa ngani u dovha u ṱuṅwa henefho he vha tumulwa hone?

U khathutshelwa ha Israele

²⁵ Vha hashu, hu na tshiphiri tsha Mudzimu tshine nda tama ni tshi tshi ḓivha-vho, uri ni sa ḓo ḓifhima uri ni vhaṱali. Ndi tsha uri vhaṅwe kha Vhaisraele vho omisa ṱhoho, hu vhuye hu khunyelele tshivhalo tsha vhannḓa.

²⁶ Vhaisraele vhoṱhe vha ḓo tshidzwa nga u ralo, “Mutshidzi u ḓo bva Tsioni. U ḓo litshisa Jakopo vhuvhi hawe.

²⁷ Ndi wone mulanga une nda ḓo vhofha navho musi vhutshinyi havho ndi tshi ḓo vhu hangwela.”

²⁸ Nge vha nyadza mafhungo maḓifha vho no vha maswina a Mudzimu, uri inwi vhannḓa zwi ni nakele; hone Mudzimu o dzula o vha ta, ndi zwine a kha ḓi vha funa a tshi elelwa vhomakhulukuku wavho.

²⁹ Arali Mudzimu a vhuya a u fha tshithu a u vhidza, a zwi tsha shanduka.

³⁰ U ḓi nga inwi kale no vha ni sa pfi Mudzimu, zwino no ḓo khathutshelwa nga u sa pfa ha Vhaisraele,

³¹ sa zwenezwo avho vho vhonala vhe vha sa pfi nga u khathutshelwa haṋu, uri zwo no ralo na vhone vha khathutshelwe.

³² Mudzimu o hoṋela vhathu vhoṱhe kha dzhele ya u sa pfa havho, a tshi itela u khathutshela vhoṱhe.

³³ Dzivha wee ḽa lupfumo, ḽa vhuṱali, ḽa nḓivho ya Mudzimu! Nzudzanyo dzawe dzi nga ṱalukanywa nga nnyi? Nḓila dzawe dzi nga londwa nga nnyi?

³⁴ “Ndi nnyi ane a ḓivha mihumbulo ya Muṋe washu? We a mu eletshedza ndi nnyi?”

³⁵ “We a vhuya a tonda Mudzimu ndi nnyi, ane zwino ha pfi a mu lifhele?”

³⁶ Hufha zwithu zwoṱhe zwo simuwa khae, zwi hone ngae, zwo livha khae. Nga hu rendwe Ene lini na lini. Amen.