VHAROMA 10 - BIVHILI KHETHWA Mafhungo Madifha

¹ A vha nṋe vha hashu, zwine mbilu yanga ya tama na zwine nda dzula ndi tshi humbela Mudzimu ndi uri lushaka lwa hashu lwa Vhaisraele lu tshidzwe.

² Ndi a vha vhetshela vhuṱanzi ha uri Mudzimu vha a mu swela mbilu, vha ro sa vha na ṱhalukanyo.

³ U sa ṱalukanya havho ndi ha uri a vha ḓivhi nḓila ye Mudzimu a ri vulela ya u pfi vhavhuya, vha kha ḓi ṱoḓa yavho, ndi zwe vha lamba u pfi vhavhuya nga nḓila ya Mudzimu.

⁴ Matsina Mulayo wo livha kha Khristo, wo guma ngae; roṱhe ri vho pfi vhavhuya nga u fulufhela Ene.

U tshidzwa ha tshakha dzoṱhe

⁵ Mushe a tshi amba zwa u pfi muvhuya nga u khunyeledza Mulayo u ṅwala a ri, “Ane a u khunyeledza u ḓo tshila ngazwo.”

⁶ Hone hu tshi ambiwa zwa u pfi muvhuya nga lutendo hu pfi, “U songo amba nga mbilu wa ri, ‘Hu ḓo gonya nnyi ṱaḓulu?’ ” – ndi uri: u yo dzhia Khristo –

⁷ “kana wa ri, ‘Ndi nnyi ane a ḓo tsela dindini?’ ” – ndi uri: u yo bvisa Khristo henengei vhafuni.

⁸ Mathina hu pfi mini? Hu pfi, “Ipfi ḽi henefho tsini-tsini na iwe; ḽi mulomoni wau na mbiluni yau.” Ndi ḽone ipfi ḽa lutendo ḽine ra ḓivhadza.

⁹ Ḽi ri arali u tshi bula nga mulomo uri Yesu ndi Muṋe washu, u tshi tenda mbiluni uri Mudzimu o mu vusa vhafuni, u ḓo tshidzwa.

¹⁰ Ri tenda nga mbilu ra pfi vhavhuya; ri bula nga mulomo ra tshidzwa.

¹¹ Maṅwalo a ri, “Muṅwe na muṅwe ane a mu fulufhela ha nga shoni.”

¹² A hu na phambano, kana u Mujuda, kana u wannḓa; hufha vhoṱhe vhe vha Muṋe onoyo muthihi; vhoṱhe vha mu rabelaho u vha kovhela lupfumo lwawe.

¹³ Na Maṅwaloni hu pfi, “Muṅwe na muṅwe ane a rabela Muṋe washu u ḓo tshidzwa.”

¹⁴ Zwino-ha, vha nga rabela hani we vha si mu fulufhele? Vha nga fulufhela hani ane vha sa athu pfa a tshi ambiwa? Vha nga pfa hani vha songo ḓivhadzwa?

¹⁵ Vha nga ḓivhadzwa hani hu si na vho rumiwaho khavho? A thi ri ho ṅwalwa ha pfi, “Zwi takadza hani hu tshi swika vhaḓinḓa vha mafhungo maḓifha.”

¹⁶ Hone a si uri vhoṱhe vho tenda mafhungo maḓifha. Hufha na Yesaya a tshi ri, “Muṋe washu, ndi nnyi we a tenda e a pfa kha riṋe?”

¹⁷ Asizwi-ha, u tenda hu bva kha u pfa; a pfiwaho ndi mafhungo a Khristo.

¹⁸ Hone ndi ri kani a vho ngo ḽi pfa? Iina, vho ḽi pfa. Hufha hu tshi pfi, “Ipfi ḽavho ḽo pfala thungo dzoṱhe, maambiwa avho o ya migumoni ya ḽifhasi.”

¹⁹ Hone ndi dovha nda ri kani Vhaisraele a vho ngo zwi ṱalukanya? Hu thoma u fhindula Mushe a tshi ri, “Ndi ḓo ita uri ni vhivhe vhathu vha si lushaka, nda ni sinyusa nga vhathu vha matsilu.”

²⁰ Yesaya a zwi khwaṱhisa a sa tati a tshi ri, “Ndo wanwa nga vhe vha si nṱoḓe, vhe vha si nndonde nda ḓivhonadza khavho.”

²¹ Hone a tshi amba Israele u ri, “Ndi ṱwa ndi tshi vhidza lushaka lu sa pfi, lwa tshipimbi.”