VHARANGAPHANḒA 20 - BIVHILI KHETHWA Mafhungo Madifha

Vhaisraele vha tshi bva pfumo

¹ Zwenezwo Vhaisraele vhoṱhe, u bva Dani thungo ya devhula u swika Bierisheba thungo ya tshipembe, na u bva shangoni ḽa Giliadi thungo ya vhubvaḓuvha, vha bva unga munna muthihi vha kuvhangana phanḓa ha Muṋe washu Mitsipha.

² Vharangaphanḓa vha matsinde oṱhe a Israele vho vha vhe hone hafho guvhanganoni heḽo ḽa vhathu vha Mudzimu, nahone ho vha hu na vhadziammbi vha 400 000 vha tshimbilaho nga milenzhe.

³ Vhathu vha Benyamini vha zwi pfa uri Vhaisraele vhaṅwe vhoṱhe vho kuvhangana Mitsipha. Vhaisraele vha vhudzisa vha ri, “Ri vhudzeni uri izwi zwithu zwi ofhisaho zwo itea hani?”

⁴ Mulivi we musadzi wawe a vhulawa a fhindula a ri, “Nṋe na musadzi wanga ro ṱuwa ra ya Gibia shangoni ḽa Benyamini ra lala hone.

⁵ Vhanna vha Gibia vha ḓa u lwa na nṋe, vha tanga nnḓu vhusiku. Vho vha vha tshi ṱoḓa u mmbulaha, vha vho dzhia musadzi wanga vha mu tshipa a vhuya a fa.

⁶ Nṋe nda dzhia tshitumbu tshawe nda tshi tumukanya nga zwipiḓa, nda suma tsinde ḽiṅwe na ḽiṅwe ḽa Vhaisraele nga tshipiḓa tshithihi. Havho vhathu vho ṱulela Israele.

⁷ Zwino noṱhe inwi Vhaisraele ambani henefhano ni ri vhudze zwine zwa fanela u itwa.”

⁸ Vhathu vhoṱhe vha takuwa vha amba ḽithihi vha ri, “A hu na na muthihi washu a no ḓo humela hayani. Hu songo vha na muthihi washu ane a humela muṱani wawe.

⁹ Zwino-ha, vha Gibia ri ḓo vha ita hezwi: ri ḓo gonya ra yo lwa navho ri tshi tevhedza zwine madeṅwa a amba.

¹⁰ Munna muthihi kha vha fumi kha ḽa Israele u ḓo ya u dzhiela mmbi zwiḽiwa. Vhaṅwe vha ḓo ya u lwa na vha Gibia vha lifhedze vhuṱudzi hovhu he vha vhu ita Israele.”

¹¹ Ndi hone vhanna vhoṱhe vha Israele vha tshi kuvhangana vhe na muhumbulo muthihi wa u dia uyo muḓi.

¹² Maṅwe matsinde a Vhaisraele vha ruma vhaḓinḓa hoṱhe shangoni ḽa tsinde ḽa Benyamini vha ri, “Ndi vhuvhi-ḓe he na ita?

¹³ Ḓisani vhanna havho vhavhi vha re Gibia ri vha vhulahe, ri thuthe vhuvhi vhu re Israele.” Hone vhathu vha Benyamini vha si thetshelese Vhaisraele vha havho vha tshi amba navho.

¹⁴ Vha bva miḓini yoṱhe ya Benyamini vha ḓa u lwa na Vhaisraele.

¹⁵ Vhathu vha Benyamini vha ramba vhanna vha 26 000 vho fara mafumo vha tshi bva miḓini yavho, nga nnḓa ha vhenevho vhanna vha 700 vho nangiwaho kha vha no dzula Gibia.

¹⁶ Vhukati ha vhahali vhenevho vhoṱhe ho vha hu na vhanna vha 700 vho nangiwaho vhe vha vha vha tshi shuma nga tshamonde, muṅwe na muṅwe a tshi kona u posa tombo nga gatho a si buphe na luvhudzi.

¹⁷ Maṅwe matsinde a Israele vha kuvhanganya vhanna vha 400 000 vha re vhahali vha nndwa.

Hu tshi lwiwa na vha Benyamini

¹⁸ Vhaisraele vha ya fhethu hune ha luvhiwa hone Bethele, vhe henefho vha vhudzisa Mudzimu vha ri, “Ndi vha tsinde ḽifhio vhane vha fanela u thoma u lwa na vhathu vha Benyamini?” Muṋe washu a fhindula a ri, “Ndi Juda.”

¹⁹ Ḽi tshi tsha Vhaisraele vha takuwa vha ṱoka mishasha tsini ha muḓi wa Gibia.

²⁰ Vha ṱuwa vha yo dia mmbi ya Benyamini, vha vhea vhahali fhethu ho livhanaho na muḓi.

²¹ Vha Benyamini vha bva muḓini, ḓuvha ḽi sa athu kovhela vha vha vho no vhulaha vhahali vha 22 000 vha Israele.

^22-23 Vhaisraele vha gonya vha yo lila phanḓa ha Muṋe washu ḽa vhuya ḽa kovhela, vha vhudzisa Muṋe washu vha ri, “Ri dovhe ri gonye ri yo lwa na vhathu vha hashu vha Benyamini?” Muṋe washu a fhindula a ri, “Gonyani ni yo lwa navho!” Ndi hone mmbi ya Vhaisraele i tshi pfa vhe na nungo, vha vhea vhahali vhavho henefhaḽa fhethu ha mulovha.

²⁴ Vha dovha vha imedzana na mmbi ya Benyamini lwa vhuvhili.

²⁵ Vha Benyamini vha dovha vha ḓa vha tshi bva Gibia, musi uyo vha vhulaha vhahali vha Israele vha 18 000 vho gudiswaho zwa nndwa.

²⁶ Ndi hone Vhaisraele vhoṱhe vha tshi gonya Bethele vha yo lila vho dzula phanḓa ha Muṋe washu. Musi wonoyo vha ḓidzima zwiḽiwa ḽa vhuya ḽa kovhela, vha ṋekedza Muṋe washu zwiṱhavhelo zwi fhiswaho na nduvho dza vhuthihi.

²⁷ Vhaisraele vha vhudzisa Muṋe washu. Misi yeneyo mbulungelo ya mulanga ya Mudzimu yo vha i henefho,

²⁸ Finiasi ṅwana wa Eliasara ṅwana wa Aroni e ene a shumelaho Muṋe washu henefho. Vha vhudzisa vha ri, “Ri dovhe ri gonye ri yo lwa na vha hashu vhathu vha Benyamini kana ri songo ya naa?” Muṋe washu a fhindula a ri, “Iyani. Matshelo ndi ḓo vha kumedza zwanḓani zwaṋu.”

²⁹ Ndi hone Vhaisraele vha tshi vhea vhahali vha lalela u mona na Gibia.

³⁰ Nga ḓuvha ḽa vhuraru vha gonya vha yo lwa na vhathu vha Benyamini zwa nga zwenezwiḽa zwa u thoma.

³¹ Vhathu vha Benyamini vha bva uri vha ḓe vha lwe navho, vha kungelwa kule ha muḓi. Vha ita zwe vha ranga u zwi ita, vha thoma u vhulaha vhaṅwe Vhaisraele ḓakani na nḓilani ya u ya Bethele na nḓilani ya u ya Gibia, vha vhulaha Vhaisraele vhane vha nga swika 30.

³² Vha Benyamini vha ri, “Ro vha kunda unga zwiḽa u rangani.” Hone Vhaisraele vho vha vho vhamba maano a uri vha shavhe khole-khole, vha vha kungele kule ha muḓi vha ḓe magondoni,

³³ ha pfi vhunzhi ha vha mmbi ya Vhaisraele vha tshi humela murahu, vha ḓo yo kuvhangana Baali Thamara. Vhaḽa vhe vha vha vho lalela u mona na Gibia vha mbo ḓi dzumbuluwa he vha vha vho dzumbana hone zwikwarani zwa Geba.

³⁴ Ha vuwa vhanna vha 10 000 vhe vha tou nanguludzwa kha Vhaisraele vhoṱhe, vha dia Gibia, ngei nndwani hu tshi khou lwiwa lu ofhisaho, vha Benyamini vha sa zwi vhoni uri vha ḓo ṱuwa vha tshi lozwiwa.

³⁵ Muṋe washu a ita uri Vhaisraele vha kunde vha Benyamini. Musi wonoyo Vhaisraele vha vhulaha vha Benyamini vha 25 100 vho faraho mafumo.

³⁶ Ha vha hu hone vha Benyamini vha tshi thoma u zwi vhona uri vho kundwa. Vhanna vha mmbi ya Vhaisraele vho huma vha si tsha imedzana na vha Benyamini nge vha vha vho fulufhela vhanna vhe vha vha vhea uri vha lalele u mona na Gibia.

Nḓila ye Vhaisraele vha kunda ngayo

³⁷ Havho vhanna vho ṱangana vha gidimela Gibia, vha balangana na muḓi, vha vhulaha vhathu vhoṱhe henefho.

³⁸ Vhanna vha Israele vho vha vho pfana na vhanna vho lalelaho uri vha dubise buluvhutsi afho muḓini,

³⁹ zwenezwo Vhaisraele vha pfi vha dzhene nndwa. Tshifhinga tshenetsho vhathu vha Benyamini vho vha vho no ḓi vhulaha Vhaisraele vha 30, vha amba vha ri, “Vhukuma ro vha kunda unga zwiḽa u rangani.”

⁴⁰ Hone musi buluvhutsi ḽi tshi thoma u duba ḽi tshi bva muḓini, vhathu vha Benyamini vha rembuluwa vha vhona buluvhutsi ḽa muḓi woṱhe ḽi tshi khou duba ḽi tshi ya lutomboni.

⁴¹ Ndi hone Vhaisraele vha tshi vha wela, vha Benyamini vha hanganea nge vha vhona uri vha ḓo ṱuwa vha tshi lovha.

⁴² Vha humela Vhaisraele vha shavhela sogani, hone vha tangiwa nga vhaḽa vho phusukanyaho muḓi,

⁴³ vha tangiwa, vha pandamedzwa, vha enda vha tshi vhulawa u bva Nua u swika vhubvaḓuvha ha Gibia,

⁴⁴ ha vhulawa 18 000, vhoṱhe vhe vhahali vha nndwa.

⁴⁵ Ho tou ponyoka vhaṅwe vha shavha vho livha sogani Tomboni ḽa Rimoni, nḓilani Vhaisraele vha vhulaha vhaṅwe vha 5 000, vha tshi vha pandamedza vha dovha vha vhulaha vha no swika 2 000.

⁴⁶ Ha vha uri vha Benyamini vho vhulawaho ndi 25 000 vhó ṱangana, vhoṱhe vhe vhahali vha nndwa.

⁴⁷ Vhe vha kona u ponyoka ndi 600 fhedzi. Avho vho shavhela sogani, vha ya Tomboni ḽa Rimoni, vha dzula henefho vha fhedza miṅwedzi miṋa.

⁴⁸ Vhaisraele vha rembuluwa vha yo lwa na vhaṅwe vhathu vha Benyamini, vha vhulaha vhoṱhe, vhathu na zwifuwo na zwoṱhe zwe vha wana miḓini vha zwi fhisa nga mulilo, vha fhisa na miḓi yoṱhe.