VHARANGAPHANḒA 2 - BIVHILI KHETHWA Mafhungo Madifha

Muruṅwa wa Muṋe washu e Bokhimu

¹ Muruṅwa wa Muṋe washu a bva Giligala a ya Bokhimu a amba na Vhaisraele a ri, “Ndo ni pfulusa Egipita, nda ni ḓisa shangoni ḽe nda fulufhedzisa vhomakhulukuku waṋu. Ndo ri, ‘Ndi nga si vhuye nda vhofholola mulanga we nda vhofha na inwi.

² Inwi ni songo vhofha mulanga na muthihi na vhathu vha no dzula shangoni heḽino. Ni pwasehekanye aḽiṱari dzavho.’ Huno-ha no ita mini zwino? A no ngo tsha ita zwe nda ni vhudza.

³ “Zwino ndi a ni vhudza ndi ri vhathu avha a thi nga vha thathi vha ni shavha. Vha ḓo vha zwikwekwe zwa u ni fasha, midzimu yavho i ḓo vha tshikwekwe tsha u ni fasha.”

⁴ Musi muruṅwa o fhedza u amba zwenezwo, Vhaisraele vhoṱhe vha thoma u lila,

⁵ ndi zwine afho fhethu ha pfi Bokhimu (Zwililo). Henefho vha ṋekedza Muṋe washu zwiṱhavhelo.

Lufu lwa Joshua

⁶ Joshua a onesana na Vhaisraele, muṅwe na muṅwe a yo dzula shangoni ḽe a kovhelwa ḽa vha ḽawe.

⁷ Vhaisraele vha shumela Muṋe washu Joshua a tshi kha ḓi tshila, na musi vharangaphanḓa vha tshi kha ḓi tshila vhe Joshua a fa a vha sia, ndi vhe vha vhona nga avho maṱo mishumo mihulu yoṱhe ye Muṋe washu a itela Vhaisraele.

⁸ Muḓinḓa wa Muṋe washu, Joshua ṅwana wa Nunu, o fa e na miṅwaha ya 110.

⁹ A swiṱwa shangoni ḽe a kovhelwa ḽone muḓini wa Thiminathi Sera mivhunduni ya Efraimi, devhula ha thavha ya Gaashi.

¹⁰ Murafho wonoyo woṱhe na wone wa fa, murafho u tevhelaho wa hangwa Muṋe washu, vha hangwa na zwe a itela Vhaisraele.

U shanduka ha Vhaisraele na kutshilele kwavho Kanana

¹¹ Ndi hone Vhaisraele vha tshi khakhela Muṋe washu, vha thoma u shumela Vhobaali.

¹² Vha litsha u luvha Muṋe washu Mudzimu wa vhomakhulukuku wavho, we a vha pfulusa Egipita, vha thoma u luvha miṅwe midzimu, midzimu ya tshakha dzi re tsini havho. Vha i gwadamela, u ralo ha vha u sinyusa Muṋe washu.

¹³ Vha litsha u luvha Muṋe washu, vha shumela Baali na Ashtharotho.

¹⁴ Ndi zwe Muṋe washu a sinyutshela Vhaisraele, a litsha mavemu a lwa navho a vha ṱangula. Muṋe washu a litsha maswina oṱhe a re tsini havho a tshi vha kunda, Vhaisraele vha si tsha kona u imedzana na maswina avho.

¹⁵ Misi yoṱhe vha tshi bva pfumo, Muṋe washu o vha a tshi lwa navho, sa zwe a vha anela uri u ḓo ita nga u ralo. Vha vhuya vha sala vhe khomboni khulu.

¹⁶ Ndi hone Muṋe washu a tshi ḓi ṋea Vhaisraele vharangaphanḓa vha vha lamukisa kha mavemu.

¹⁷ Hone Vhaisraele vha si thetshelese vharangaphanḓa vhavho. Vhaisraele Muṋe washu o vhona vha sa fulufhedzei, vha tshi luvha miṅwe midzimu. Vhokhotsi avho vho vha vha tshi thetshelesa zwine Muṋe washu a vha laya, hone murafho uyo muswa wa si tsha mu thetshelesa.

¹⁸ Misi yoṱhe musi Muṋe washu a tshi ḓi ṋea Vhaisraele murangaphanḓa muswa, o vha a tshi ḓi mu farisa, a lamukisa vhathu kha maswina avho musi onoyo murangaphanḓa a tshi kha ḓi tshila. Muṋe washu o vha a tshi vha khathutshela, ngauri vho vha vha tshi gomela musi vha tshi tambula vha tshi kandeledzwa.

¹⁹ Hone musi murangaphanḓa uyo a tshi fa, vhathu vho vha vha tshi anzela u humela kha maitele a kale, vha ita zwo vhifhaho u fhira vha murafho wo fhiraho, vha dovha vha shumela miṅwe midzimu vha i luvha, vha si tende u laṱa maitele avho mavhi.

²⁰ Zwenezwo Muṋe washu a sinyutshela Vhaisraele a ri, “Lushaka holu lwo vhofholola mulanga uḽa we nda laya vhomakhulukuku wavho uri vha u tevhedze, vha si tsha nthetshelesa.

²¹ Zwenezwo a thi tsha ḓo thatha na lushaka na luthihi lwo salaho shangoni heḽi musi Joshua a tshi fa.

²² Ndi ḓo linga Vhaisraele ngavho uri ndi vhone arali vha tshi ḓo tevhela nḓila dzanga unga vhomakhulukuku wavho.”

²³ Ndi zwe Muṋe washu a tendela idzo tshakha uri dzi ḓi dzula henefho shangoni; ho ngo ita uri Joshua a vha kunde kathihi, ho ngo vha kumedza zwanḓani zwa Joshua.