VHARANGAPHANḒA 19 - BIVHILI KHETHWA Mafhungo Madifha

Mulivi na musadzi wawe wa phuli

¹ Misi yeneyo, Vhaisraele vha sa athu vha na khosi, ho vha hu na Mulivi a tshi dzula vhukati ha mivhundu ya Efraimi. O dzhia musidzana a no bva Betlehema kha ḽa Juda uri a vhe musadzi wawe wa phuli,

² hone uyo musidzana a luṱana nae, a vhuya vhuhadzi a humela muṱani wa khotsi awe Betlehema, a dzula hone a fhedza miṅwedzi miṋa.

³ Ndi hone uyo munna a tshi mu tevhela a linga u mu kwengweledza uri a vhuye khae. O ṱuwa na mushumi wawe na donngi mbili. Musidzana uyo a swielela munna wawe nḓuni. Musi khotsi a musidzana vha tshi vhona mukwasha vha mu ṱanganedza nga vhuthu.

⁴ Khotsi a musidzana a ri mukwasha a dzule, nangoho a dzula a fhedza maḓuvha mararu a tshi ḓi ḽa, vha tshi nwa, vha tshi eḓela henefho.

⁵ Nga ḓuvha ḽa vhuṋa nga matsheloni vha fhinduwa, vha ḓilugisela u ṱuwa. Huno khotsi a musidzana vha vhudza mukwasha vha ri, “Rangani ni ḽe, ni ḓo pfa no khwaṱha, na ḓo konou ṱuwa.”

⁶ Ndi hone avho vhanna vhavhili vha tshi dzula, vha ḽa, vha nwa vhoṱhe. Khotsi a musidzana vha amba na mukwasha vha ri, “Lalani fhano ni ḓiphiṋe.”

⁷ Mulivi a takuwa uri a ṱuwe, hone makhulu vha mu kwengweledza uri a dzule, a dovha a eḓela henefho.

⁸ Ḽi tshi tsha nga ḓuvha ḽa vhuṱanu a thoma u ṱoḓou ṱuwa, hone khotsi a musidzana vha ri, “Rangani u ḽa nandi. Ni ḓo ṱuwa ḓuvha ḽo no fhambanya.” Ndi hone avho vhanna vhavhili vha tshi ḽa vhoṱhe.

⁹ Musi uyo munna na musadzi wawe wa phuli na mushumi vha tshi thoma u ṱoḓou ṱuwa, makhulu wawe vha ri, “Hufha ḽi tshi vho ṱoḓou kovhela zwino, ni nga ḓi lala fhano. Ḽi ḓo ṱuwa ḽi tshi swifhala, dzulani fhano ni ḓiphiṋe. Matshelo ni nga fhinduwa na fara lwendo na ya hayani.”

¹⁰ Huno uyo munna a vha a si tsha funa a dovha a lala, a ṱuwa na donngi dzawe mbili dzo hweswaho sala na musadzi wawe wa phuli vha livha Jebusi (ndi u ri Jerusalema).

¹¹ Musi vhe tsini ha Jebusi, ḓuvha ḽi tshi vho ṱoḓou kovhela, mushumi a amba na muṋe wawe a ri, “Khezwi ri sa ḓilaleli zwashu afha muḓini wa Vhajebusi?”

¹² Muṋe wawe a fhindula a ri, “Ri nga si dzhene muḓini wa vhatsinda vha si Vhaisraele. Ri ḓo livha Gibia.”

¹³ A dovha a ri, “Nḓarieni, nga ri linge u swika Gibia kana Rama, ri lale huṅwe henefho.”

¹⁴ Ndi hone vha tshi fhirela phanḓa, ḓuvha ḽa kovhela musi vha tshi swika Gibia shangoni ḽa Benyamini.

¹⁵ Vha pambuwa nḓilani vha tshi ri vha yo lala henefho. Vha dzhena muḓini vha dzula khoroni, ha si vhe na we a vha swielela muṱani wawe vha lala hone.

¹⁶ Musi vhe henefho, muṅwe mukalaha a fhira ngaho a tshi bva mushumoni masimuni. Ene o vha o bebelwa mivhunduni ya Efraimi, hone zwino o vha a tshi vho dzula Gibia. (Vhaṅwe vha Gibia vho vha vhe vha tsinde ḽa Benyamini.)

¹⁷ Mukalaha uyo a vhona uyo muendi e khoroni ya muḓi a mu vhudzisa a ri, “Vha bva ngafhi? Vha ya ngafhi?”

¹⁸ Mulivi a fhindula a ri, “Ro vha ro ya Betlehema kha ḽa Juda, zwino ri khou humela hayani vhukatikati ha mivhundu ya Efraimi. A hu na ane a ri swielela ra lala,

¹⁹ naho ri na zwiḽiwa na maṱanga a donngi dzashu, khathihi na vhurotho na waini, zwanga na musadzi wanga na mushumi wanga. A hu na tshine ra shaya.”

²⁰ Mukalaha a ri, “A hu na tshi dinaho muṱani wanga! Ndi ḓo ni londola, hone ni nga si lale khoroni.”

²¹ Ndi hone mukalaha a tshi vha isa hayani hawe, a ṋea donngi dzavho zwiḽiwa, a vha ṱambisa milenzhe, vha lalela, vha nwa.

²² Musi vha tshi khou ḓiphiṋa, vhaṅwe vhanna vha sa ḓivhalekani vha muḓi vha tanga nnḓu. Vha likita vothi, mukalaha muṋe wa nnḓu vha mu ṱavhela mukosi vha ri, “Bvisa munna we wa mu swielela nḓuni yau, ri ṱoḓa u mu ita musadzi!”

²³ Hone mukalaha uyo a bvela nnḓa a amba navho a ri, “Aiwa nandi khonani dzanga, ni songa ita zwithu zwo vhifhaho zwingafha! Munna uyu ndi mueni wanga, ni songo ita zwithu hezwo zwa vhuṱudzi!

²⁴ Ṅwananyana wanga a sa athu ḓivha munna, na musadzi wa uyu munna ngevha. Ndi ḓo ni bvisela vhone zwino na vha tshipa. Vhone vha iteni tshine na funa, hone uyu munna ni songo mu ita vhuṱudzi ho raloho.”

²⁵ Hone vha si mu thetshelese. Ndi hone Mulivi a tshi dzhia musadzi wawe a mu bvisela nnḓa khavho. Vhone vha mu tshipa vha mu tambudza vhusiku hoṱhe, mapfuvhi a tshi tswuka vha mu litsha a ṱuwa.

²⁶ Nga maḓautsha uyo musadzi a wela fhasi henefho muṋangoni wa nnḓu ya mukalaha he munna wawe a vha e hone. A lala henefho ḓuvha la vhuya ḽa bva.

²⁷ Munna wawe a vuwa nga matsheloni, a tshi vula vothi a tshi ri a ṱuwe, a wana musadzi wawe o wa tsini ha vothi, zwanḓa zwawe zwo farelela tshiukhuvha.

²⁸ A ri, “Vuwani ri ṱuwe!” Hone musadzi a si tsha aravha. Munna a mu hwala a mu vhea kha donngi, a fara lwendo a ya hayani.

²⁹ A tshi swika hayani, a dzhena nḓuni a dzhia lufhanga, a dzhia muvhili wa musadzi wawe wa phuli a u pandakula wa bva zwipiḓa zwa 12, tsinde ḽiṅwe na ḽiṅwe ḽa Vhaisraele a ḽi suma nga tshipiḓa tshithihi.

³⁰ Muṅwe na muṅwe we a zwi vhona a ri, “Zwo raliho a ri athu zwi pfa! Zwo raliho a zwi athu vhuya zwa itea tshee Vhaisraele vha pfuluwa Egipita! Humbulani! Elekanyani! Ri vhudzeni uri ri iteni!”