VHARANGAPHANḒA 12 - BIVHILI KHETHWA Mafhungo Madifha

Jefutha na vhathu vha Efraimi

¹ Vhanna vha Efraimi vha rambiwa vha bva pfumo, vha wela Jorodani vha livha Tsafoni, vha sengisa Jefutha vha ri, “Ndi mini vho pfuka masakha vha yo lwa na Vhaamoni vha si ri rambe uri ri ṱuwe roṱhe? Ri ḓo vha fhisedzela nḓuni!”

² Huno Jefutha a vha vhudza a ri, “Vhathu vhanga na nṋe ro luṱana zwihulu na Vhaamoni. Inwi ndo ni vhidza, hone na si nndamulele khavho.

³ Nda ri u vhona uri ni nga si ri phalale, nda ḓifunga nda pfuka masakha u yo lwa navho, Muṋe washu a vha kumedza zwanḓani zwanga. Zwino ni khou ḓa u lwelani na nṋe?”

⁴ Ndi hone Jefutha a tshi ramba vhanna vhoṱhe vha Giliadi, vha lwa na vhanna vha Efraimi, vha vha kunda. (Vha Giliadi vho vha vho dinalea ngauri vha Efraimi vho vha vho ri, “Inwi Vhagiliadi shango ḽaṋu ḽi vhukati ha ḽa Efraimi na ḽa Manase, ni tou vha tshipiḓa tsha ḽa Efraimi!”)

⁵ Vhagiliadi vha linda maḓambuwo a Jorodani uri vha Efraimi vha si shavhe. Musi vha Efraimi vha tshi khou linga u shavha vha tshi humbela thendelo ya u wela, vhanna vha Giliadi vha vha vhudzisa vha ri, “Ni wa Efraimi?” Arali a ri, “Hai,”

⁶ vha mu vhudza uri a ri, “Shibolethe.” Arali a ri, “Sibolethe,” nga u kundwa u bula iḽo ipfi zwavhuḓi, vha mu fara vha mu vhulaha henefho kha ḽiṅwe ḽa maḓambuwo a Jorodani. Misi yeneyo ho vhulawa vhathu vha Efraimi vha 42 000.

⁷ Jefutha o ranga Vhaisraele phanḓa miṅwaha miṱanu na muthihi. Jefutha wa Mugiliadi a fa, a swiṱwa ḓoroboni ya hawe kha ḽa Giliadi.

Ibitsani na Eloni na Abudoni

⁸ Jefutha o ri u fa, Ibitsani a no bva Betlahema a vha ene a no ranga Vhaisraele phanḓa.

⁹ O vha e na vhana vha 30 vha vhatuka na vhananyana vha 30. O dzekisa vhananyana vhawe kha vha si vha mutupo wawe, vhana vhawe vha vhatuka a vha dzetshela vhananyana vha 30 kha vha si vha mutupo wawe. Ibitsani a ranga Vhaisraele phanḓa miṅwaha miṱanu na mivhili,

¹⁰ a fa a swiṱwa Betlahema.

¹¹ Ibitsani a tshi fa, Vhaisraele vha rangwa phanḓa nga Eloni wa Muzebuloni miṅwaha ya fumi.

¹² A tshi fa a swiṱwa Ayaloni shangoni ḽa Zebuloni.

¹³ Eloni a tshi fa, Vhaisraele vha rangwa phanḓa nga Abudoni ṅwana wa Hilele a no bva Phirathoni.

¹⁴ Ene o vha e na vhana vha 40 vha vhatuka na vhaḓuhulu vha 30 vha vhatuka, vha tshi namela donngi dza 70. Abudoni o ranga Vhaisraele phanḓa miṅwaha miṱanu na miraru,

¹⁵ a fa, a swiṱwa Phirathoni shangoni ḽa Efraimi mivhunduni ya Vhaamaleke.