VHARANGAPHANḒA 10 - BIVHILI KHETHWA Mafhungo Madifha

Thola

¹ Musi Abimelekhe o no fa, ha ḓa Thola ṅwana wa Phua, muḓuhulu wa Dodo, a vhofholola Vhaisraele. O vha e wa tsinde ḽa Isakhara, a tshi dzula Shamiri mivhunduni ya Efraimi.

² O vha murangaphanḓa wa Vhaisraele ha vhuya ha fhela miṅwaha ya 23. Zwenezwo a fa, a swiṱwa henefho Shamiri.

Jairi

³ Thola ó no fa murangaphanḓa a vha Jairi a no bva Giliadi. A vha murangaphanḓa wa Vhaisraele ha vhuya ha fhela miṅwaha ya 22.

⁴ O vha e na vhana vha vhatuka vha 30, muṅwe na muṅwe e na donngi yawe. Vho vha vhe na miḓi ya 30 shangoni ḽa Giliadi, ine ya kha ḓi pfi miḓi ya Jairi.

⁵ Jairi a fa, a swiṱwa Kamoni.

Dambudzo ḽo welaho Vhaisraele nga mulandu wa u ṱolou shanduka havho

⁶ Vhaisraele vha dovha vha khakhela Muṋe washu nga u luvha Vhobaali na Vhoashtharotho, na midzimu ya Vhaaramu na ya Sidoni na ya Muaba na ya Vhaamoni na ya Vhafilista. Vha shandukela Muṋe washu, vha si tsha mu luvha.

⁷ Muṋe washu a vha sinyutshela, a vha kumedza zwanḓani zwa Vhafilista na Vhaamoni.

⁸ Vha kandeledza Vhaisraele vhoṱhe vhe vha vha vha tshi dzula shangoni ḽa Vhaamori vhubvaḓuvha ha Jorodani kha ḽa Giliadi, vha vha tambudza, ha vhuya ha fhela miṅwaha ya 18.

⁹ Vhaamoni vha ita na u wela mulambo wa Jorodani uri vha yo dia matsinde a Juda na Benyamini na Efraimi. Vhaisraele vho vha khomboni khulu.

¹⁰ Ndi hone Vhaisraele vha tshi lilela Muṋe washu vha ri, “Ro u khakhela ra u shandukela Iwe Mudzimu washu, ra luvha Vhobaali.”

¹¹ Muṋe washu a vha fhindula a ri, “Vhaegipita na Vhaamori na Vhaamoni na Vhafilista

¹² na Vhasidoni na Vhaamaleke na Vhamaoni vho ni kandeledza kale, inwi na nndilela. A tho ngo ni lamukisa khavho naa?

¹³ Hone inwi na ḓi nṱutshela na yo luvha miṅwe midzimu, zwenezwo a thi tsha ḓo dovha nda ni lamulela.

¹⁴ Iyani ni lilele midzimu ye na i nanga. Yone nga i ni lamulele musi no wela khomboni.”

¹⁵ Hone Vhaisraele vha vhudza Muṋe washu vha ri, “Ro tshinya. Ri ite zwine wa vhona zwo tea, tenda wa ri lamulela ṋamusi.”

¹⁶ Ndi hone vha tshi laṱa midzimu yavho isili vha luvha Muṋe washu, zwa vho mu dina a tshi vhona Vhaisraele vha tshi tambula.

Jefutha (10:17 – 12:7)

¹⁷ Ndi hone Vhaamoni vha tshi ramba tshira, vha ṱoka mishasha Giliadi. Vhaisraele vha kuvhangana, vha ṱoka mishasha Mitsipha kha ḽa Giliadi.

¹⁸ Henefho vhahulwane vha Giliadi vha vhudzisana vha ri, “Ndi nnyi a no ḓo ri ranga phanḓa ri tshi yo lwa na Vhaamoni? Ane a nga zwi kona u ḓo vha murangaphanḓa wa vhoṱhe fhano Giliadi.”