VHAKOLOSA 4 - BIVHILI KHETHWA Mafhungo Madifha

¹ Inwi vhaṋe vha dziphuli, farani phuli dzaṋu zwavhuḓi nga nḓila yo fanelaho, hafhu ni ḓivhe uri na inwi ni na Muṋe waṋu: ndi wa ngei ṱaḓulu.

U lusa thabeloni na u tshila nga vhuṱali

² Ni tou oma kha dzithabelo! Ni rabele no karuwa ni sa litshi u livhuha Mudzimu.

³ Ni ri rabelele-vho uri Mudzimu a ri vulele nḓila, ri kone u ḓivhadza vhathu tshiphiri tsha Khristo tshe nda farelwa tshone zwino.

⁴ Ni nkhumbelele uri ndi kone u tshi ḓivhadza nga nḓila yo fanelaho i pfalaho.

⁵ Ni tshilisane na vhannḓa nga ṱhalukanyo. Ni songo tambisa tshifhinga tshe Mudzimu a ni ṋea.

⁶ Musi ni tshi amba, maipfi aṋu a vhe a vhuthu a fhaṱaho; ni songo vha na ane na kundwa u mu fhindula lu fushaho.

Nyonesano

⁷ Thikhikhosi uyu wa hashu, mushumi nga nṋe a fulufhedzeaho wa Muṋe washu u ḓo ni vhudza uri ndo vuwa hani.

⁸ Ndi tshi mu ruma ngeo ndi u itela uri ni ḓivhe zwa kutshilele kwanga ngeno, na uri a ni ṱuṱuwedze.

⁹ U khou ḓa na Onesimasi wa hashu a fulufhedzeaho ane ra mu funa. Uyo ndi uḽa a bvaho henengeo ha haṋu. Vha ḓo ni vhudza zwoṱhe zwine zwa khou itea ngeno.

¹⁰ Aristhakhosi ane nda vha nae fhano dzhele u ri ni vhe hone, na Markosi muzwala wa Barnabasi u ralo; onoyo ndo no ḓi ni vhudza ngae uri a tshi swika ni mu swielele.

¹¹ Na Joshua ane ḽiṅwe a pfi Justosi u ri ni vhe hone. Avho ndi vhone Majuda vhe vhoṱhe kha vhane ra shumela muvhuso wa Mudzimu roṱhe; ndi tshi vha vhona ndi pfa mbilu yo tou rula.

¹² Ephafrasi uḽa a bvaho henengeo ha haṋu na ene u ri ni vhe hone. Ndi mushumeli wa Khristo Yesu ane a ḓi dzula a tshi ni rabelela nga nungo dzoṱhe uri ni ime no khwaṱha, ni vhe vho vhibvaho, ni khunyeledze zwoṱhe zwine Mudzimu a zwi funa.

¹³ Ndi tshi ni ṱanziela mafhungo awe ndi ri: uyo u tou ḓidinela inwi na vhaḽa vha Laodikia na vha Hierapolisi.

¹⁴ Vhaṅwe ndi Lukasi wa maine, wa hashu ane nda mu funa, na Demasi. Na vhone vha ri ni vhe hone.

¹⁵ Na vha hashu vha ngei Laodikia vha vhe hone, na Nimfasi khathihi na tshivhidzo tshi kuvhanganaho muṱani wawe.

¹⁶ Musi no no vhalelwa holu luṅwalo ni lu fhirisele tshivhidzoni tsha Laodikia uri na vhone vha lu vhale-vho, inwi-vho ni vhale luḽa lwe nda ṅwalela vha Laodikia.

¹⁷ Ni vhudze Akhiphosi ni ri a ḓiṋekedze tshoṱhe kha mushumo we a kumedzwa nga Muṋe washu a u khunyeledze.

¹⁸ Zwino hafha ndi khou tou ṅwala nga tsha vhukoma ndi ri: ni vhe hone! Ni songo nkhangwa ndi fhano dzhele. Muṋe washu ngavhe a tshi ni itela vhuthu.