VHAHEBERU 8 - BIVHILI KHETHWA Mafhungo Madifha

Tshifhe Muhulu wa mulanga muswa wa khwiṋe

¹ Mbilu ya mafhungo e ra amba u swika zwino ngei: ri na Tshifhe Muhulu o dzulaho thungo ya tshauḽa ya khuluṋoni ya Ramaanḓa ngei ṱaḓulu vha vhusa vhoṱhe.

² Ndi Tshifhe wa henengei Hukhethwa, denndeni ya ngoho ya Mudzimu, yo akhwaho nga Muṋe washu, hu si nga vhathu.

³ Tshifhe muhulu muṅwe na muṅwe u nangelwa u ṋekedza Mudzimu nduvho na zwiṱhavhelo. Zwi amba uri na hoyu washu u fanela u vha na tshine a ṋekedza.

⁴ Ngavhe e fhano shangoni, na u tou vha tshifhe o vha a tshi ḓo vha a si tshifhe. Hufha vhotshifhe vha ṋekedzaho nduvho nga maitele a Mulayo wa Mushe vhe hone.

⁵ Hone-ha vhutshifhe havho vhu tou vha ha u fanyisedzela zwa ngei ṱaḓulu sa murunzi. A thi ri zwiḽa Mushe a tshi laiwa nga Mudzimu uri a fhaṱe dennde khethwa, ho pfi, “U vhone uri u tshi i fhaṱa u tevhedze nga vhuronwane tshiḽa tshifanyiso tshe nda u sumbedza ngei thavhani”?

⁶ Zwino vhunga Yesu o ri ḓisela mulanga u fhiraho uḽa, wó tewa kha zwe ra fulufhedziswa zwi fhiraho zwiḽa, zwenezwo na vhutshifhe hawe vhu fhira vhuḽa ha Mulayo wa Mushe.

⁷ Arali mulanga uḽa mulala wo vha wo khunyelela ho vha hu si tsha ṱoḓea muṅwe.

⁸ Hone Mudzimu a tshi sola Vhaisraele u ri, “Muṋe washu u ri, ‘Maḓuvha a khou sendela a uri ndi vhofhe mulanga muswa na Vhaisraele na tsinde ḽa Juda.

⁹ A u nga ngi uḽa we nda vhofha na vhomakhulukuku wavho zwiḽa ndi tshi vha endedza nga tshanḓa tshanga nda vha bvisa Egipita; ngauri vho no pambuwa kha hoyo we nda vhofha navho, zwenezwo nda si tsha vha londa.’

¹⁰ Zwino Muṋe washu u ri, ‘Asuyu-ha mulanga une nda ḓo vhofha na Vhaisraele ho no fhela eneo maḓuvha: Ndi ḓo vhea ndaela dzanga mvaloni dzavho nda tou dzi ṅwala mbiluni dzavho, nda vha Mudzimu wavho, vhone vha vha vhathu vhanga.

¹¹ A vha tsha ḓo funzana kana vha vhudzana vha ri: Ḓivhani Muṋe washu! Hufha vhoṱhe vhahulwane na vhaṱuku vha tshi vho ḓo nnḓivha.

¹² Naho vho tshinya ndi ḓo vha khathutshela nda si tsha elelwa vhutshinyi havho na kathihi!’ ”

¹³ Mudzimu a tshi amba mulanga muswa ndi u ri wa u ranga a u tshee na mushumo. Zwino a thi ri tsha kale tshó fhelelwa nga mushumo tshi ḓo ṱuwa tshi tshi ngalangala?