VHAHEBERU 7 - BIVHILI KHETHWA Mafhungo Madifha

Vhutshifhe ha Melkitsedeke

¹ Hoyo Melkitsedeke o vha e khosi ya Salema, a dovha a vha tshifhe wa Mudzimu wa ṱaḓulu-ṱaḓulu. Musi Abrahamu a tshi bva nndwani he a kunda aḽa mahosi, Melkitsedeke a ṱangana nae a mu shudufhadza.

² Abrahamu a mu ṋea tshafumi tsha zwoṱhe zwe a thuba. Dzina iḽi ḽi no pfi “Melkitsedeke” tsha u thoma ḽi amba uri “Khosi mbuya”. A dovha a pfi “Khosi ya Salema”, zwine zwa amba uri “Khosi ya mulalo”.

³ Onoyo Melkitsedeke, khotsi awe, kana mme awe, kana makhulu wawe, a vha ḓihwi; hu ḓi nga ḓuvha ḽa u bebwa hawe na ḽa u fa hawe a ḽi ḓihwi. U nga Murwa wa Mudzimu, u dzula e tshifhe lini na lini.

⁴ Ni a zwi vhona uri o vha e muhulu hani? Hufha na Abrahamu makhulukuku washu o mu ṋea tshafumi tsha zwe a thuba.

⁵ Na vhaḓuhulu vha Livi vha re vhotshifhe, Mulayo wo vha tendela u bvisisa lushaka tshafumi naho vhe vhathihi navho, vhe vhaḓuhulu vha Abrahamu vhoṱhe.

⁶ Hone Melkitsedeke o vha a si muḓuhulu wa Livi, Abrahamu e ene we Mudzimu a mu fulufhedzisa zwihulu. Naho zwo ralo Melkitsedeke o ṱanganedza tshafumi kha Abrahamu a dovha a mu shudufhadza.

⁷ Zwi khagala uri muhulwane u shudufhadza muṱuku.

⁸ Kha Vhalivi ri vhona tshafumi tshi tshi bvisiswa nga vhathu zwavho vha faho, hone kha Melkitsedeke Maṅwalo a ṱanziela uri ndi a tshilaho.

⁹ Hezwiḽa Abrahamu a tshi bvisa tshafumi, ndi tshifa na Livi ene o fanelaho u bvisisa, na ene o bvisa,

¹⁰ ngauri o vha a tshee malofhani a makhulukuku wawe Abrahamu zwiḽa a tshi ṱangana na Melkitsedeke.

¹¹ Vhaisraele vha tshi ṋewa Mulayo zwo katela na vhutshifhe ha Vhalivi. Zwino arali vhutshifhe honoho ho vha ho khunyeledza zwoṱhe, khezwi hu tshi kha ḓi ṱoḓea vhuṅwe vhune ha pfi ndi vhu no nga ha Melkitsedeke vhu si ha Aroni?

¹² Zwino musi vhutshifhe vhu tshi fa zwi amba uri na mulayo waho u a fa, a hu na iṅwe nḓila.

¹³ Hafhu Muṋe washu ane hezwi zwoṱhe zwa amba Ene, o vha e wa ḽiṅwe tsinde, ḽi si ḽa Vhalivi, nahone a ho ngo vhuya ha vha na muthihi wa tsinde iḽo ḽa Juda we a shuma zwa vhutshifhe aḽiṱarini.

¹⁴ Khezwo, zwi tou ḓivhea zwavhuḓivhuḓi uri o vha e wa tsinde ḽa Juda. Na Mushe ho ngo vhuya a bula iḽo tsinde musi a tshi amba nga vhutshifhe.

Melkitsedeke wa vhuvhili

¹⁵ Zwino hu tshi vho bvelela muṅwe tshifhe a no nga Melkitsedeke, ndi hone haya mafhungo a tshi vho tou pfalesa-ha.

¹⁶ Ene ho ngo vhumbwa tshifhe nga u tou bebelwa, o vha tshifhe nga maanḓa a vhutshilo vhu sa tshinyali.

¹⁷ Na Maṅwalo a ṱanziela a ri, “U tshifhe wa lini na lini nga vhutshifhe vhu no nga ha Melkitsedeke.”

¹⁸ Zwenezwo mulayo wa kale wo fa ngauri wo vha u tshi leluwa u si tshee na mushumo.

¹⁹ Ndi uri Mulayo wa Mushe wo sia hu si na tshivhuya tsho khunyelelaho. Zwino-ha ro no fulufhedziswa zwifulufhelwa zwa khwiṋe, zwine zwa vho ri swikisa tsini ha Mudzimu.

²⁰ Hafhu izwo a zwo ngo itwa hu si na muano. Vhalivi ndi vhone vho vhumbwaho vhotshifhe hu si na muano,

²¹ hone Yesu o vhumbwa tshifhe nga muano, musi Mudzimu a tshi amba nae a tshi ri, “Muṋe washu o ana, ha nga vhuyi a shanduka, o ri, ‘U tshifhe wa lini na lini!’ ”

²² Zwó ralo Yesu o vha mutiki wa mulanga wa khwiṋe.

²³ Iṅwe phambano hafhu ndi ya uri vhaḽa vhotshifhe vho vha vha tshi tou tevhekana nge vha fa nga muthihi nga muthihi, vha kundwa u isa mushumo wavho phanḓa.

²⁴ Hone Yesu u dzula e hone lini na lini, vhutshifhe hawe a vhu ratheli kha muṅwe.

²⁵ Ndi zwine a kona u tshidza tshoṱhe vhane vha tshi ḓa ha Mudzimu vha ḓa ngae: u dzula e hone a tshi vha pfumelela.

²⁶ Asuyu-ha tshifhe muhulu ane ra mu lila: ndi mukhethwa, ha solisei, ha na zwa dzitshika, ha fani na vhatshinyi, o takulelwa ṱaḓulu ha makole.

²⁷ Ha ngi vhaṅwe vhotshifhe vhahulu vhane tshavho ha vha u thoma u pfumelelwa misi yoṱhe, vhó no ralo vha konou pfumelela lushaka. Ene o ri pfumelela nga u ḓikumedza luthihi fhedzi zwa vha zwo fhela.

²⁸ Vhotshifhe vhane vha vhewa nga Mulayo wa Mushe ndi vhathu zwavho vha shayaho nungo, hone muano wa Mudzimu wo ḓaho vhuimoni ha Mulayo, u vhea Murwa Ene muṋe, a re Tshifhe Muhulu o khunyelelaho wa lini na lini.