VHAHEBERU 5 - BIVHILI KHETHWA Mafhungo Madifha

¹ A thi ri tshifhe muhulu muṅwe na muṅwe ane a nangiwa kha vhathu u vhetshelwa u vha imela ha Mudzimu nga u ṋekedza nduvho na zwipfumelo.

² Vhane vha pambuwa, hone hu si nga khole, a nga si vha fhelele mbilu, ngauri na ene muṋe u a ḓi shaya nungo.

³ Ndi zwine a tshi pfumelela lushaka a thoma nga u pfumelelwa ene muṋe.

⁴ Nahone a hu na ane a nga sokou ḓiita tshifhe nga u funa hawe, tshawe ndi u tou vhidzwa nga Mudzimu, sa Aroni.

⁵ Sa zwenezwo na Khristo ho ngo sokou ḓivhea kha vhuhulwane hovhu ha u vha tshifhe muhulu, ndi Mudzimu we a tou a amba nae a ri, “U Murwa wanga, ndo u beba ṋamusi.”

⁶ Huṅwe fhethu a dovha a ri, “U tshifhe wa lini na lini nga vhutshifhe vhu no nga ha Melkitsedeke.”

⁷ Zwiḽa Khristo a tshee fhano shangoni o vha a tshi rabela a humbela Mudzimu, a tshi ṱavha na mukosi muhulu, a ita na u rothisa miṱodzi, a tshi vhidzelela Mudzimu ane a vha Ene a konaho u tshidza lufuni. Nazwino Mudzimu o mu pfa nga u vhona khuliso yawe khulu.

⁸ Yesu naho e Murwa wa Mudzimu, nga u tambudzwa hawe o ḓi guda uri u pfa Mudzimu zwi amba mini.

⁹ Musi o no khunyeledza zwe a ḓela zwone, a vho vha Ene mudzi wa u tshidzwa hu sa gumi ha vhoṱhe vhane vha mu pfa,

¹⁰ Mudzimu a konou mu vhea uri a vhe tshifhe muhulu nga vhutshifhe vhu no nga ha Melkitsedeke.

Khombo ya u gunea

¹¹ Ri na manzhi ane ra nga amba nga hovhu vhutshifhe ha Melkitsedeke, a ro tou konḓa u ṱalutshedza ngauri ni vhathu vha sa ṱavhanyi u pfa.

¹² Hone-ha naho zwino no vha no fanela no no vha vhafunzi vha vhaṅwe, ni kha ḓi ṱoḓa muṅwe wa u dovha u ni funzedza marangaphanḓa a mafhungo a Mudzimu. Ni kha ḓi mama, mugade u kha ḓi ni kunda.

¹³ Matsina ane a kha ḓi mama ndi lushie, ha athu kona u ṱalukanya zwine Mudzimu a funa.

¹⁴ Mugade wone ndi wa vho dziaho, vho no ḓiḓowedzaho u ṱalukanya zwi re zwone na zwi si zwone.