VHAHEBERU 3 - BIVHILI KHETHWA Mafhungo Madifha

Yesu u fhira Mushe nga vhuhulwane

¹ Vharathu vhanga, ni vhakhethwa vha Mudzimu, no vhidzelwa zwa ngei ṱaḓulu, ndi zwone, mihumbulo yaṋu kha i dzule yo livha Yesu, Ene Muḓinḓa wa Mudzimu, Tshifhe Muhulu ane ra mu ṱanzilela.

² Ene o vha a tshi fulufhedzea kha we a mu vhea mushumoni hoyu, u ḓi nga na Mushe o vha a tshi fulufhedzea muṱani woṱhe wa Mudzimu.

³ A thi ri mufhaṱi wa nnḓu u huliswa u fhira nnḓu yone iṋe? Na Yesu o fanela u huliswa u fhira Mushe sa zwenezwo.

⁴ Hafhu muṱa muṅwe na muṅwe u na muthomi wawo. Zwino-ha muthomi wa zwoṱhe ndi Mudzimu.

⁵ Mushe o vha e ṋegota zwawe a fulufhedzeaho muṱani woṱhe wa Mudzimu, a tshi ṱanziela zwe Mudzimu a vha a tshi kha ḓi ḓo zwi amba,

⁶ hone Khristo u a fulufhedzea unga Murwa a langaho muṱa wa Khotsi awe. Zwino muṱa wonoyo ndi riṋe, tenda ra nambatela zwe ra fulufhela, ra zwi zuwa ri sa ofhi.

Vhuawelo ha vhathu vha Mudzimu

⁷ Ndi zwone, ipfani zwine Muya Mukhethwa a amba a tshi ri, “Ṋamusi ni tshi pfa ipfi ḽa Mudzimu

⁸ ni songo ita tshipimbi sa zwiḽa ni tshi nṱunga, ni tshi nndinga ngei phangani,

⁹ fhaḽa he vhomakhulukuku waṋu vha nkolela naho vho vhona zwe nda ita

¹⁰ mahumi maṋa a miṅwaha. Ndi zwe havha vhathu nda vha nyala, nda ri, ‘Mbilu dzavho dzi dzula dzo bva nḓilani, nḓila dzanga a vha dzi londi.’

¹¹ Nda vhuya nda tou ana ndo sinyuwa nda ri, ‘Vha nga si dzhene he nda vha ndi tshi ḓo vha awedza!’ ”

¹² Vharathu vhanga, ni vhone uri hu si vhe na muṅwe waṋu a re na mbilu mmbi ya u landula na u shandukela Mudzimu a tshilaho.

¹³ Ipfi heḽi ḽi no ri, “ṋamusi” ḽi tshi kha ḓi pfala nḓevheni dzaṋu ni dzule ni tshi ṱuṱuwedzana maḓuvha oṱhe, uri hu si vhe na muthihi waṋu ane a nga fhurwa a tshinya a vho ḓo ita tshipimbi.

¹⁴ A thi ri ri maḽaifa na Khristo, tenda ra nambatela lutendo lwashu lwe ra thoma nalwo ri sa dzinginyei u vhuya u swika vhufheloni.

¹⁵ Ndi zwine Maṅwalo a ri, “Ṋamusi ni tshi pfa ipfi ḽa Mudzimu ni songo ita tshipimbi sa zwiḽa ni tshi nṱunga.”

¹⁶ Avho vhe vha pfa ipfi ḽa Mudzimu vha mu ṱunga ndi vhonnyi? A si vhoṱhe vhaḽa vhe vha endedzwa nga Mushe vha tshi bva Egipita naa?

¹⁷ Vhe Mudzimu a vha nyala mahumi maṋa a miṅwaha ndi vhonnyi? A si vhaḽa vhe vha tshinya vha fhedza nga u fela henefho phangani naa?

¹⁸ Zwiḽa Mudzimu a tshi ana a ri, “Vha nga si dzhene he nda vha ndi tshi ḓo vha awedza,” o vha a tshi amba vhonnyi? O vha a sa ambi vhaḽa vha mu nyadzaho naa?

¹⁹ Zwi khagala: tsho vha kundisaho u dzhena ndi u landula Mudzimu.