VHAHEBERU 2 - BIVHILI KHETHWA Mafhungo Madifha

Mashudu mahulu

¹ Ndi zwine ra fanela u nambatela eneaḽa e ra a pfa, ri sa dzinginyei, uri ri si kumbwe.

² Mulayo we wa swikiswa kha vhomakhulukuku washu nga vharuṅwa wo vha u sa pfukwi; we a vhuya a u pfuka a si u tevhedze o mbo ḓi rwiwa nga ṱhamu yo mu fanelaho.

³ Zwino-ha riṋe ri ḓo ponyoka hani arali ri sa londi u tshidzwa hohu hungafhangafha? Ro thoma u hu ḓivhadzwa nga Muṋe washu Ene muṋe, zwa sala zwi tshi khwaṱhiswa nga vhe vha mu pfa.

⁴ Mudzimu a dovha a ḓadzisa hovhu vhuṱanzi nga u ita maḓembe na zwimangadzo na nga mishumo ya tshakha-tshakha i no sumbedza maanḓa awe, na nga u kovhela vhathu mpho dza Muya Mukhethwa nga u funa hawe.

Murangaphanḓa wa u ri isa u tshidzwani

⁵ Shango ḽi ḓaho ḽine ra khou ḽi amba, Mudzimu ho ngo vhuya a vhea vharuṅwa uri vha ḽi vhuse.

⁶ Huṅwe Maṅwalo a tshi ṱanziela a ri, “Nṋa muthu ene u tou vha mini Iwe Mudzimu u tshi vhuya wa mu humbula? Ṅwana wa muthu ndi mini ane wa vhuya wa mu londa?

⁷ Wo mu ṱukufhadza e fhirwi nga vharuṅwa tshifhinganyana, wa mu ambadza khare ya vhugala na khuliso,

⁸ wa mu ita khosi ya zwoṱhe.” Hu tshi pfi Mudzimu o mu ita khosi ya zwoṱhe zwi amba uri a hu na tsho salaho. Hone ri tshi sedza zwine muthu a vha zwone zwino, ri vhona a sa athu vha “khosi ya zwoṱhe”.

⁹ Ane ra mu vhona ndi Yesu we a vha o ṱukufhadzwa a tambula nga lufu e fhirwi nga vharuṅwa tshifhinganyana, uri nga khathutshelo ya Mudzimu a fele vhoṱhe, a konou ambadzwa khare ya vhugala na khuliso.

¹⁰ Mudzimu we zwithu zwoṱhe zwi re hone zwa sikelwa u hulisa Ene Musiki wazwo, o funa u isa vhana vhanzhi vhugalani. Ndi zwe a vhona zwo fanela Yesu o vha zhakelaho nḓila ya u tshidzwa a tshi tambudzwa, uri a vhe Mutshidzi o khunyelelaho.

¹¹ Ene Yesu ane vhathu a vha ita vhakhethwa, na vhenevho vhane a vha ita vhakhethwa, ndi vha Khotsi muthihi. Ndi zwine a si shone a tshi ri ndi vharathu vhawe.

¹² Ndi amba fhaḽa hune a amba na Mudzimu a ri, “Ndi ḓo u ḓivhadza kha vharathu vhanga, nda u renda tshivhidzoni.”

¹³ A dovha a ri, “Ndi ḓo dzula ndi tshi fulufhela Mudzimu.” A ḓi dovha a ri, “Ndi fhano, ndi na vhana vhe Mudzimu a nṋea.”

¹⁴ Vhunga avho vhana vhe vhathu vha ṋama, na Yesu Ene muṋe a vha muthu wa ṋama unga vhone. A tshi ralo ho vha hu u itela uri diabolo mulangi wa lufu a kulwe nungo nga lufu lwa Yesu.

¹⁵ Ngauralo Yesu a vhofholola vhe vha vha vhe dziphuli vhutshilo havho hoṱhe nga u ofha lufu.

¹⁶ Zwi khagala uri vhe a vha phalala a si vharuṅwa, ndi vhaḓuhulu vha Abrahamu.

¹⁷ Zwi amba uri o vha o fanela u fana na vharathu vhawe tshoṱhe, uri a kone u vha tshifhe muhulu wa mbilutshilidzi a fulufhedzeaho e ṋenḓila yavho kha Mudzimu, uri a kone u pfumelela lushaka.

¹⁸ Vhuṱungu he a vhu pfa a tshi lingwa ho mu konisa u tikedza vhane vha lingwa nga diabolo.