VHAHEBERU 13 - BIVHILI KHETHWA Mafhungo Madifha

Tshikhriste

¹ Vhunga ni vhathihi, dzulani ni tshi funana.

² Ni takalele vhaeni; hafhu hu na vhaṅwe vhe vha ri u ralo vha ṱanganedza vharuṅwa vha sa zwi ḓivhi.

³ Ni songo hangwa vha re dzhele, ni nge ni navho henengei. Na vha no khou tambudzwa ni vha londole, vhunga na inwi ni tshi nga ḓi kona u pfa vhuṱungu sa vhone.

⁴ Roṱhe ro fanela u hulisa mbingano. Munna na musadzi vha dzudzane nga u fulufhedzea, ngauri khaṱhulo ya Mudzimu i ḓo wela phombwe dzoṱhe.

⁵ Ni songo tshilela tshelede; ni fushee nga zwenezwo zwine na vha nazwo; Mudzimu Ene muṋe o ri, “A thi nga u litshi, a thi nga u laṱedzi.”

⁶ Zwino-ha kha ri rudze mbilu ri ri, “Mudzimu ndi mulamuleli wanga, ndi kha ḓi ofhani? Muthu a nga nnyitani?”

⁷ Humbulani vharangaphanḓa vhaṋu vhe vha ni vhudza mafhungo a Mudzimu, ni sedze kutshilele kwavho na kufele kwavho, ni kande ṋayoni dza lutendo lwavho.

⁸ Yesu Khristo ha shanduki, u tshee onouḽa wa mulovha, na ṋamusi, na lini na lini.

⁹ Zwenezwo ni songo tenda u sokou kumbiwa nga pfunzo dzo shandeaho dzi sa fheli. Zwi re zwone ndi uri mbilu dzashu dzi khwaṱhiswe nga vhuthu ha Mudzimu, hu si nga u tevhedza milayo ya zwiḽiwa. Vha vhuswaho nga milayo heyo a i vha farisi tshithu.

¹⁰ Zwiḽiwa zwi bvaho aḽiṱarini yashu, vhotshifhe vha shumaho denndeni khethwa a vho ngo tendelwa u zwi ḽa.

¹¹ Nga Mulayo wa Mushe tshifhe muhulu u ḓisa malofha a zwifuwo zwa zwipfumelo fhethu hukhethwa, mitumbu yone ya fhiswa ngei nnḓa ha mishasha.

¹² Ndi zwe na Yesu a vhulahelwa nnḓa ha khoro, uri a kumulule lushaka nga malofha awe.

¹³ Zwino-ha kha ri mu tevhele ngei nnḓa ha mishasha uri ri nyadzwe-vho nae.

¹⁴ Fhano a ri na vhupo vhu re hashu, ro lindela vhune ha ḓo ḓa.

¹⁵ Zwino nga ri dzule ri tshi ṋekedza Mudzimu nduvho nga u mu renda nga Yesu Khristo, ndi amba khuliso dza vhane vha bula dzina ḽawe,

¹⁶ ni sa litshi u tonda vhathu na u kovhekana navho zwine na vha nazwo; ndi dzone nduvho dzine Mudzimu a dzi takalela.

¹⁷ Vharangaphanḓa vhaṋu vha a ni linda, nahone Mudzimu u ḓo vha sengisela inwi. Vha thetsheleseni-ha ni vha hulise, ndi hone vha tshi ḓo shuma nga dakalo vha si na tsha u vhilaela ngatsho. Arali na vha konḓisela mushumo ni ḓo vhuelwa ngani?

¹⁸ Ri rabeleleni, ngauri ri na ngoho ya uri mvalo dzashu dzo ṱamba; tshine ra tshi tama ndi u dzula ri tshi ita zwi re zwone.

¹⁹ Ndi zwine nda ni humbela ndo tou khwaṱhisa uri ni nthabelele, uri ndi si kundiswe u vhuelela ngeo nga u ṱavhanye u ḓa.

Thabelo ya u onesana

²⁰ Muṋe washu Yesu ndi Mulisa muhulu wa dzinngu. Mudzimu Ṋemulalo o mu vusa vhafuni nga malofha a khwaṱhisaho mulanga u sa gumi.

²¹ Ngavhe Ene a tshi ni konisa u ita zwivhuya zwoṱhe uri ni dzule ni tshi ita zwine a zwi funa, a ri ite zwine a funa ri tshi vha zwone nga Yesu Khristo, ane vhugala ha vha hawe lini na lini. Amen.

Nyonesano

²² Vha hashu, ndi a ni humbela ndi tshi ni ṱuṱuwedza nga u rali uri ni si fhele mbilu. Hufha ndo ni ṅwalela maipfi a si gathi.

²³ Mafhungo asia: Timoti wa hashu o bva dzhele. Arali a ṱavhanya u swika ri ḓo ḓa roṱhe.

²⁴ Vharangaphanḓa vhaṋu vhoṱhe, na vhathu vha Mudzimu vhoṱhe vha vhe hone. Vhane vha bva henengeo Italia vha ri ni vhe hone.

²⁵ Ngavhe Mudzimu a tshi ni itela vhuthu noṱhe.