VHAHEBERU 10 - BIVHILI KHETHWA Mafhungo Madifha

¹ Mulayo u tou vha murunzi zwawo wa zwivhuya zwine zwa kha ḓi ḓa, a si tshifanyiso tshazwo vhukuma. Ṅwaha muṅwe na muṅwe hu sokou dzulelwa u ṋekedzwa zwipfumelo zwenezwo. Naho zwo ralo a zwi koni u ita vhaṋekedzi vhazwo vhavhuya vho khunyelelaho,

² ndi musi vha tshi ḓo vha vho no guma vha si tsha ṋekedza, ngauri vho vha vha tshi ḓo vha vho kumululwa vhutshinyi lwonolwo luthihi zwa vha zwo fhela, vha si tsha pfa vhe na milandu mvaloni dzavho.

³ Zwipfumelo izwo zwo vha zwo tou itelwa u dzula zwi tshi humbudza vhathu vhutshinyi havho ṅwaha muṅwe na muṅwe.

⁴ Ndi uri malofha a mboho na mbudzi ha koni u thutha vhutshinyi ha vhathu.

⁵ Ndi zwe Khristo a tshi ḓa fhano shangoni a ri, “A u ṱoḓi zwiṱhavhelo na nduvho; tshine tsha u takadza ndi muvhili uyu we wa mpha.

⁶ Phukha dzi fhiswaho aḽiṱarini, na zwipfumelo, a zwi u takadzi.

⁷ Ndi zwe nda ri, ‘Ndi fhano Mudzimu wanga. Ndo ḓela u ita zwine wa funa. Na Buguni zwo ṅwalwa nga u ralo hu tshi ambiwa Nṋe.’ ”

⁸ O thoma a ri, “A u ṱoḓi zwiṱhavhelo na nduvho na zwifuwo zwi fhiswaho aḽiṱarini, na zwipfumelo, na u u takadza a zwi u takadzi.” U ralo naho Mulayo u tshi ri zwi ṋekedzwe.

⁹ O no ralo a konou ri, “Ndi fhano Mudzimu wanga, ndo ḓela u ita zwine wa funa.” Asizwo-ha, o sudzulusa zwipfumelo zwiḽa zwa u ranga a ḓisa tsha Khristo vhudzuloni hazwo.

¹⁰ Nge Mudzimu a funa zwi tshi ralo ro itwa vhakhethwa nga nduvho i re muvhili wa Yesu Khristo yo ṋekedzwaho luthihi zwa vha zwo fhela.

¹¹ Tshifhe muṅwe na muṅwe ene u ḓi ima a tshi ita mushumo wawe wa vhutshifhe a tshi ṋekedza zwiṱhavhelo zwenezwiḽa lu sa gumi, naho zwo ralo zwa ḓi kundwa u thutha vhutshinyi.

¹² Hone Khristo o ṋekedza tshipfumelo tshithihi fhedzi tsha mbo ḓi vha tsho eḓana, a konou yo dzula thungo ya tshauḽa tsha Mudzimu vha vhusa vhoṱhe,

¹³ ó lindela uri maswina awe a vhuye a itwe vhukando ha milenzhe yawe.

¹⁴ Vhane a vha ita vhakhethwa o vha ita vho khunyelelaho lini na lini nga nduvho yeneyo nthihi fhedzi.

¹⁵ Muya Mukhethwa na Ene u ri ṱanziela nga u ralo. U thoma nga u ri,

¹⁶ “Muṋe wazwo u ri, ‘Asuyu-ha mulanga une nda ḓo vhofha na Vhaisraele ho no fhela eneo maḓuvha: Ndi ḓo vhea ndaela dzanga mbiluni dzavho, nda tou dzi ṅwala mvaloni dzavho.’ ”

¹⁷ O no ralo a dovha a ri, “Vhutshinyi havho na vhuvhi havho a thi tsha ḓo vhu elelwa na kathihi.”

¹⁸ Zwino tshipfumelo tshi kha ḓi ṱoḓelwani? Hufha ro no hangwelwa.

Kha ri sendele tsini na Mudzimu

¹⁹ Zwino-ha vha hashu, vhunga Yesu o ri fela ro no wana nḓila ya u dzhena Hukhethwakhethwa ri sa timatimi.

²⁰ O ri phulela nḓila ntswa i tshilaho, ra fhira vhukati ha lupila lune lwa vha muvhili wawe.

²¹ Zwino vhunga ro no vha na Tshifhe muhulwane a langaho muṱa wa Mudzimu,

²² kha ri sendele-ha tsini na Mudzimu ri na mbilu dzi si na muhoyo, na fulufhelo ḽo khwaṱhaho. Hufha mbiluni ri tshi pfa ri si na valuvalu, na mivhili yashu yo ṱamba nga maḓi a si na tshika.

²³ Nga ri futelele-ha u bula zwe ra zwi fulufhela, ngauri we a ri fulufhedzisa zwone u a fulufhedzea.

²⁴ Nga ri ṱuṱuwedzane uri ri vhe na lufuno ri ite zwivhuya.

²⁵ Tshivhidzo tshi tshi kuvhangana ri vhe hone misi yoṱhe. Hafhu vhaṅwe vho no vha na dzema ḽa u sa ya. Ndi zwone, kha ri ṱuṱuwedzane u ya, zwihulu ni tshi vhona ḓuvha ḽa khaṱhulo ḽi tshi vho sendela.

U gunea na u konḓelela

²⁶ Arali ra futelela u tshinya nga khole ngeno ro no ḓivha ngoho, a hu tshee na tshine tsha nga ri pfumelela,

²⁷ tsho salaho ndi u lindela khaṱhulo i ofhisaho na mulilo u dugaho une wa ḓo lozwa vhane vha lwa na Mudzimu.

²⁸ Arali muthu a pfuka Mulayo wa Mushe hú na ṱhanzi mbili kana tharu, tshawe ndi u vhulawa, ha khathutshelwi.

²⁹ Zwino muthu ane a nyadza Murwa wa Mudzimu, a nyefula malofha a khwaṱhisaho mulanga e a mu ita mukhethwa, a nyefula Muya ane ra wana ngae tshilidzi tsha Mudzimu, onoyo u ḓo rwiwa nga ṱhamu nngafhani?

³⁰ Hufha ri tshi mu ḓivha we a ri, “Ndifhedzo ndi yanga; ndi Nṋe a no ḓo lifhedza.” A dovha a ri, “Muṋe wazwo u ḓo haṱula lushaka lwawe.”

³¹ U wela zwanḓani zwa Mudzimu a tshilaho zwi ofhisa hani!

³² Edzonu elelwa misi iḽa ni tshi kha ḓi bva u vhonetshelwa nga tshedza tsha Mudzimu, ni tshi tambudzwa zwihulu na ḓi konḓelela.

³³ Huṅwe no semekanywa na tambudzwa na tou itwa ṱano, huṅwe na shengela nga u ḓibaḓekanya na avho vha no khou ralo u tambudzwa.

³⁴ No kovhekana madambudzo na avho vhe vha vha vho hoṋelwa dzhele, nangwe ni tshi thubelwa thundu dzaṋu na ḓi sokou ṱanzwa maṱo no ḓitakalela, ni tshi ḓivha uri ni na zwa khwiṋe zwa lini na lini.

³⁵ Zwó ralo dzulani ni na tshivhindi; zwi na pfufho khulu.

³⁶ Tshaṋu futelelani u ita zwine Mudzimu a funa, ni sa fheli mbilu, ndi hone ni tshi ḓo wana zwe a ni fulufhedzisa.

³⁷ Maṅwalo a ri, “Hu tshee ho sala tshifhinga tshiṱukuṱuku hu tshi ḓa ane a pfi u ḓo ḓa. Ha tsha ḓo lenga.

³⁸ Muḓinḓa wanga a fulufhedzeaho u ḓo tshila nge a mpfulufhela. Hone arali a huma nga tsha murahu a thi tsha mu takalela.”

³⁹ Hone riṋe a ri ngi havho vhane vha huma nga tsha murahu vha lovha; ri na lutendo, ri ḓo tshila.