VHAHEBERU 1 - BIVHILI KHETHWA Mafhungo Madifha

Ipfi ḽa Mudzimu nga Murwa wawe

¹ Zwiḽa kale Mudzimu o amba na vhomakhulukuku washu lunzhi nga nḓila dzo fhambanaho nga vhaporofita,

² hone misi ino ya vhufhelo o amba na riṋe nga ane a vha Murwa wawe. O sika zwoṱhe ngae, a konou mu vhea muḽaifa wa zwoṱhe.

³ Hu vhonala lupenyo lwa Mudzimu khae; zwoṱhe zwine Mudzimu a vha zwone o tou zwi kokotolo. O tika tsiko yoṱhe nga ipfi ḽawe ḽa maanḓa. O ri u ṱanzwa vhathu vhutshinyi havho a yo dzula ngei ṱaḓulu thungo ya tshauḽa tsha Ramaanḓaoṱhe vha vhusa vhoṱhe,

⁴ a hudzwa a fhira vharuṅwa u ḓi nga na dzina ḽo mu fanelaho ḽi tshi fhira madzina avho.

Vhuhulu ha Murwa vhu fhira ha vharuṅwa

⁵ Ndi ufhio muruṅwa we Mudzimu a vhuya a mu vhudza a ri, “U Murwa wanga, ndo u beba ṋamusi”? a dovha a ri, “Ndi ḓo vha khotsi awe, Ene a vha Murwa wanga”?

⁶ Hone musi Mudzimu a tshi ḓisa uyo Murwa wawe wa tanzhe fhano shangoni o ri, “Vharuṅwa noṱhe vha Mudzimu mu luvheni.”

⁷ A tshi amba vharuṅwa u ri, “Mudzimu u ita vharuṅwa vhawe maḓumbu, vhaḓinḓa vhawe a vha ita khavhu dza mulilo.”

⁸ Hone a tshi amba Murwa u ri, “Khuluṋoni yau Iwe Mudzimu i ḓo ima lini na lini, u vhusa u sa ṱaluli.

⁹ Zwi re zwone u a zwi funa, vhuvhi hone u a vhu vhenga. Ndi zwe Mudzimu a re Mudzimu wau a u vhumba khosi ho ṱangana mifhululu, wa fhira khonani dzau dzoṱhe.”

¹⁰ A dovha a ri, “Iwe Muṋe wa zwoṱhe, zwiḽa mathomoni wo tea ḽifhasi, wa vhumba ḽiṱaḓulu nga zwanḓa zwau.

¹¹ Zwone zwi ḓo ṱahala unga tshiambaro tsha kale, Iwe wa ḓi sala.

¹² U ḓo zwi peta unga nguvho, wa dovha wa ambara zwiṅwe zwa vho nga ndi zwiambaro. Hone Iwe a u shanduki; vhutshilo hau a vhu gumi.”

¹³ Ndi ufhio muruṅwa we Mudzimu a vhuya a amba nae a ri, “Dzula hafha thungo ya tshauḽa tshanga ri vhuse roṱhe, ndi vhuye ndi ite maswina au vhukando ha milenzhe yau”?

¹⁴ Hone vharuṅwa ndi vhonnyi? A si mimuya zwayo naa i shumelaho Mudzimu, a i ruma u yo shumela vhane vha ḓo tshidzwa?