VHAEFESA 5 - BIVHILI KHETHWA Mafhungo Madifha

¹ Vhunga ni vhana vha funwaho vha Mudzimu, edzani Ene.

² Vhutshilo haṋu nga vhu langwe nga lufuno, sa zwe Khristo a ri funa a vhuya a kumedza vhutshilo hawe a tshi itela riṋe, zwa nga nduvho na tshiṱhavhelo tshi fhiswaho tshi takadzaho Mudzimu.

³ Vhunga ni vhakhethwa vha Mudzimu ilani vhupombwe na zwa vhuaḓa na u funesa lupfumo. Hezwo zwithu na phungo yazwo i songo vhuya ya pfala kha inwi.

⁴ Zwiito zwi shonisaho na mirubo i sa ḓivhalei na maṱamba zwi songo vhuya zwa pfala. Tshaṋu nga hu vhe u livhuha Mudzimu.

⁵ Hafhu ni zwi ḓivhe uri ane a ita vhupombwe kana a ita zwa vhuaḓa na u funesa lupfumo a nga si vhe na tshawe muvhusoni wa Khristo na Mudzimu; u funesa lupfumo zwi fana na u rerelela midzimu.

Kutshilele kwa vha re tshedzani

⁶ Ni songo tenda u fhurwa nga zwiambo zwi si na mushumo; ndi zwone zwine zwa ḓo itisa uri Mudzimu a rwe vha sa pfi.

⁷ Vho raloho ni songo vhuya na vha na vhukonani navho.

⁸ Na inwi kale no vha ni tshi dzula swiswini; zwino nó no vha vha Muṋe washu no bvela tshedzani. Zwo ralo tshilani sa vha re tshedzani,

⁹ ngauri mitshelo ya tshedza ndi vhuthu na vhuvhuya na ngoho.

¹⁰ Dzulani ni tshi londolosa uri tshi takadzaho Muṋe washu ndi tshifhio.

¹¹ Zwithu zwine vhathu vha ita zwi si na mushumo ni songo vhuya na vha khazwo; hezwo zwi itwa nga vha re swiswini, tshaṋu kha hu vhe u zwi bvisela khagala.

¹² (Zwine vha ita tshiphirini zwi shonisa na u tou bula.)

¹³ Hone zwithu zwoṱhe zwi vhonala tshine zwa vha tshone zwo bviselwa tshedzani.

¹⁴ Tshiṅwe na tshiṅwe tsho bviselwaho tshedzani tshi vhonala zwavhuḓi. Ndi zwine ri tshi imba ra ri, “Iwe wo lalaho, karuwa! Karuwa u vuwe vhafuni, Khristo a u vhonetshele.”

¹⁵ Zwenezwo sedzani kutshilele kwaṋu. Ni songo tshila sa matsilu, ni tshile sa vha na ṱhalukanyo.

¹⁶ Ni songo tamba nga tshifhinga tshe Mudzimu a ni ṋea; maḓuvha o vhifha haano,

¹⁷ ṱalifhani-ha ni luse u ḓivha zwine Muṋe washu a funa ni tshi ita, ni songo nga matsilu.

¹⁸ Ni songo nwa na kambiwa ni sa ḓo ita zwa vhuḓabaḓaba; tshaṋu hu vhe u ḓala Muya Mukhethwa;

¹⁹ imbelanani dziphisalema na nyimbo dza u renda Mudzimu na dzine na funzwa nga Muya; mbilu dzaṋu nga dzi rende Muṋe washu nga nyimbo na phisalema.

²⁰ Dzulani ni tshi livhuha Mudzimu Khotsi ni tshi humbula zwoṱhe zwe a ni itela, ni tshi mu livhuha nga dzina ḽa Muṋe washu Yesu Khristo.

²¹ Vhunga ni vha ofhaho Khristo, hulisanani, muṅwe na muṅwe a ḓiite muṱuku kha vhaṅwe.

Vhanna na vhasadzi

²² Inwi vhasadzi ipfani vhanna vhaṋu unga ni tshi pfa Muṋe washu.

²³ Munna ndi ṱhoho ya musadzi wawe u ḓi nga na Khristo e ṱhoho ya tshivhidzo, a dovha a vha Mutshidzi watsho, tshone tshi muvhili wawe.

²⁴ Ndi zwine vhasadzi vha fanela u thetshelesa vhanna vhavho vha ita zwoṱhe zwine vha vha vhudza, unga na tshivhidzo tshi tshi thetshelesa Khristo.

²⁵ Na inwi vhanna funani vhasadzi vhaṋu unga Khristo o funa tshivhidzo a vhuya a tou tshi fela,

²⁶ uri a tshi ṱanzwe nga maḓi na ipfi, a tshi ite tshikhethwa,

²⁷ uri a tshi imise phanḓa hawe a tshi ṱanganedze tsho ṱamiwa nga vhugala, tshi si na tshimomo kana makovhi na zwi ngaho zwenezwo, tshi tshikhethwa tsho fhelela.

²⁸ Vhanna kha vha fune vhasadzi vhavho unga vha tshi funa mivhili yavho; u funa musadzi ndi u ḓifuna.

²⁹ Ndi nnyi ane a nga vhuya a vhenga muvhili wawe? Tshine a ita ndi u u fusha na u u londola, unga na Khristo a tshi ralo tshivhidzo tshawe;

³⁰ ngauri riṋe ri miraḓo ya muvhili wawe.

³¹ Maṅwalo a tshi ṱanziela a ri, “Ndi zwine munna a ḓo ṱutshela khotsi awe na mme awe a vhofhekana na musadzi wawe, vhenevho vhavhili vha vho vha ṋama nthihi.”

³² Henefho hu ambiwa tshiphiri tshihulu-ha, huno nṋe ndi zwi ambela vhuthihi ha Khristo na tshivhidzo.

³³ Ndi zwone: munna muṅwe na muṅwe kha a fune musadzi wawe unga ene muṋe, musadzi ene a hulise munna wawe.