VHAEFESA 4 - BIVHILI KHETHWA Mafhungo Madifha

Vhuthihi na u aluwa ha muvhili wa Khristo

¹ Zwino-ha nṋe ndo hoṋelwaho fhano dzhele nge nda vha wa Muṋe washu ndi a ni ṱuṱuwedza ndi ri: Tshilani nga nḓila ine ya sumbedza uri no vhidzwa nga Mudzimu.

² Ni dzule ni tshi ḓiṱukufhadza, ni vha vhulenda, ni sa fheli mbilu, ni sumbedzane lufuno nga u konḓelelana,

³ ni fungelele u dzula ni vhathihi, Muya ó ni vhofhekanya nga mulalo.

⁴ Muvhili ndi muthihi, na Ene Muya ndi muthihi, vhunga na tshilavhelelwa tshe Mudzimu a ni vhidzela tshone tshi tshithihi.

⁵ Na Muṋe washu ndi muthihi; na lutendo ndi luthihi; na ndovhedzo ndi nthihi;

⁶ na Mudzimu ndi muthihi, Ene Khotsi ashu roṱhe, a re Muṋe washu roṱhe, a shumaho nga riṋe roṱhe e kha riṋe roṱhe.

⁷ Muṅwe na muṅwe washu o ṋewa mpho yawe nga he Khristo a mu tela ngaho.

⁸ Maṅwalo a ri, “A tshi gonya ṱaḓulu o ṱuwa na muduba wa mathubwa awe, a ṋea vhathu dzimpho.”

⁹ Hu tshi pfi, “O gonya” hu ambiwani? A zwi ambi uri o thoma a tsela fhasi-fhasi shangoni naa?

¹⁰ Zwenezwo hoyo we a tsela fhasi u tshee onoyo we a dovha a gonya nṱha-nṱha ha maṱaḓulu a vha Ene muḓalahoṱhe.

¹¹ Ndi Ene mukovhi wa mpho hedzi: vhaṅwe o vha ita vhaapostola, vhaṅwe a vha ita vhaḓivhadzi vha zwe Mudzimu a dzudzanya, vhaṅwe vha vha vha u tshimbila vha tshi ḓivhadza mafhungo maḓifha, vhaṅwe vha vha vhalisa na vhafunzi.

¹² Mpho idzo o vha kovhela uri vha kone u gudisa vhathu vha Mudzimu mushumo wavho wa u fhaṱa muvhili wa Khristo.

¹³ Ndi hone roṱhe ri tshi ḓo vhuya ra vha vhathihi tshoṱhe kha lutendo lwashu na kha u ṱalukanya hashu Murwa wa Mudzimu, ra vha vhathu vho vhinaho vho swikaho kha tshivhino tsha Khristo.

¹⁴ A ri tsha ḓo vha vhana; a ri tsha ḓo nga magabelo ra vhudzulelwa ngeno na ngei nga muya wa pfunzo iṅwe na iṅwe ya vhafhuri vhane vha xedza vhathu nga vhumbulu na vhukwila havho.

¹⁵ Riṋe tshashu nga hu vhe u ima ngohoni nga muya wa lufuno, ndi hone vhuthihi hashu na Khristo ṱhoho yashu vhu tshi ḓo ḓi khwaṱha vhu tshi ya, nga nḓila dzoṱhe.

¹⁶ Muvhili woṱhe u simuwa henefho kha Ene a re ṱhoho, miraḓo yoṱhe ya anḓana ya khwaṱhisana ya vha tshithu tshithihi, muṅwe na muṅwe u tshi shuma mushumo wawo, ya fhaṱana, lufuno lwa ḓi aluwa.

Kutshilele kwa kale na kuswa

¹⁷ Ndi tshi amba lwa u tou ombedzela nga ḽa Muṋe washu ndi ri: ni songo tsha tshila sa vhannḓa vhane mihumbulo yavho i si vhuedze tshithu,

¹⁸ mbilu dzavho dza vha dzo swifhalelwaho; a vha na vhutshilo vhune Mudzimu a ri ṋea, ngauri vho omisa dziṱhoho, na u pfa a vha pfi;

¹⁹ na u shona a vha tsha shona; vho no tou ḓikumedza vhuḓabaḓaba, vha ita zwoṱhe zwi nengisaho vha sa pfeleli.

²⁰ Hone hezwo a si zwone zwe na funzwa zwone ni tshi ḓivhadzwa a Khristo.

²¹ A thi ri no ri u pfa a tshi ambiwa na vha vhafunziwa vhawe, na funzwa ngoho i wanalaho kha Yesu?

²² Zwino-ha laṱani kutshilele kwaṋu kwa kale na muthu waṋu mulala wa musi no tshinyala nga nyemulo dzaṋu dzi ni fhuraho,

²³ mbilu dzaṋu na ṱhalukanyo dzaṋu dzi shanduke tshoṱhe dzi vhe ntswa,

²⁴ ni ambare muthu muswa we a tshi sikwa ha vha u fanyisa Mudzimu, e muvhuya vhukuma, e mukhethwa vhukuma.

²⁵ Zwino-ha laṱani mazwifhi ni dzule ni tshi vhudzana ngoho nga tshaṋu, ngauri roṱhe ri miraḓo ya muvhili muthihi.

²⁶ Arali na tshenuwa no sinyuwa ni vhone mbiti dzaṋu dzi sa ḓo ni khakhisa, nahone ḽi songo vhuya ḽa kovhela ni tshee no sinyuwa,

²⁷ ni sa ḓo vulela diabolo nḓila.

²⁸ We a vha e fobvu a laṱe vhufobvu, a tou ḓishumela nga zwanḓa zwawe a wane zwiḽiwa nga nḓila yo fanelaho, uri a ḓo kona u farisa na vhashai.

²⁹ Hu songo tsha pfala maṱamba a tshi bva mulomoni waṋu, kha hu pfale maipfi a u farisa vhaṅwe ane a vha fhaṱa, a ḓisela vhathetshelesi mashudu.

³⁰ Ni songo vhaisa Muya Mukhethwa wa Mudzimu, ngauri ndi Ene luswayo lu sumbaho uri ni vha Mudzimu, ha vha u khwaṱhisa vhuṱanzi ha uri ḓuvha ḽi ḓo vhuya ḽa swika ḽine na ḓo rengululwa ngaḽo.

³¹ Laṱani zwa u dinalea na dzimbiti na u sinyutshelana na u zhambelana na u semana na vhunwa;

³² tshaṋu faranani nga vhuthu ni vhe na mbilu thethe, ni hangwelane unga na Mudzimu o ni hangwela nga Khristo.