VHAEFESA 3 - BIVHILI KHETHWA Mafhungo Madifha

Mushumo wa Paulo kha vhannḓa

¹ Ndi zwine nṋe Paulo nda rabelela inwi vhannḓa ndó hoṋelwa fhano dzhele nga ṅwambo wa Khristo Yesu.

² Ndi fulufhela uri no zwi pfa uri Mudzimu nga vhuthu hawe o dzudzanya uri ndi shume hezwi, a tshi itela inwi.

³ Mudzimu o nnzumbululela tshiphiri tshawe, unga ndo no ḓi ni ṅwalela nga u pfufhifhadza.

⁴ Nahone arali na vhala zwe nda ṅwala ni ḓo kona u ḓivha uri ndi ṱalukanya hani Khristo, tshone tshiphiri tsha Mudzimu.

⁵ Zwiḽa kale vhathu vho vha vha sa athu tshi dzumbululelwa, hone zwino Mudzimu o tshi dzumbululela vhaapostola na vhaporofita vhawe vhakhethwa nga Muya.

⁶ Tshiphiri tshine nda amba khetshi: mafhungo maḓifha a ita uri na vhannḓa vha vhe vhathihi na Khristo, vha wane-vho mukovhe wa ifa, vha vhe miraḓo ya muvhili wa Khristo, vha kovhekane-vho na Majuda zwoṱhe zwe Mudzimu a fulufhedzisa.

⁷ Mudzimu nga vhuthu hawe o nṋea mpho ya u vha muḓinḓa wa u ḓivhadza eneo mafhungo maḓifha nga maanḓa awe ane a bveledza zwingafha nga nṋe.

⁸ Kha vhakhethwa vhoṱhe vha Mudzimu nṋe ndi tou vha muṱuku sa muroho; naho zwo ralo Mudzimu nga vhuthu hawe a nthuma u vhudza vhannḓa mafhungo maḓifha a lupfumo lwa Khristo lu sa vhalei,

⁹ na u sumbedza vhathu vhoṱhe u khunyelela ha tshiḽa tshiphiri tsha Mudzimu. Tsha kale na kale Mudzimu Ene Musiki wa zwoṱhe o vha o tshi dzumba,

¹⁰ uri zwino vhuhulu ha vhuṱali hawe ha tshakha-tshakha a vhu ḓivhadze vhavhusi na vhalangi vha re ngei ṱaḓulu, nga tshivhidzo tshawe.

¹¹ O zwi ita a tshi tevhedza zwe a vha o vhofha tsha kale na kale, zwa vho bveledzwa zwino nga Khristo Yesu Muṋe washu.

¹² Zwenezwo-ha a ri tsha timatima, a ri tsha ofha tshithu, ro no vha na pfanelo ya u dzhena hune Mudzimu a vha hone nge ra vha vhathihi na Khristo nga u mu fulufhela.

¹³ Zwino-ha ndi ni humbela uri ni si kulee nungo nga u vhona ndi tshi tambudzelwa inwi. Hufha zwi zwone zwine na huliswa ngazwo.

U ḓivha uri lufuno lwa Khristo ndi lungafhani

¹⁴ Ndi zwine nda gwadama phanḓa ha Khotsi,

¹⁵ Ene ane muṱa muṅwe na muṅwe ngei ṱaḓulu na fhano fhasi wa pfi ndi wawe,

¹⁶ Ene wa vhugala vhu si na mugumo, uri a ni ṋee maanḓa nga Muya wawe ni vhe na mbilu dzo dziaho,

¹⁷ Khristo a konou fhaṱela khadzo nge na mu fulufhela, lufuno lwaṋu lu ṱoke midzi lu vhe muteo wo khwaṱhaho.

¹⁸ Ndi hone inwi khathihi na vhakhethwa vhoṱhe vha Mudzimu ni tshi ḓo kona u ṱalukanya vhuphara na vhulapfu na vhuhulu na vhudzivha ha lufuno lwa Khristo,

¹⁹ naho lu tshi fhira ṱhalukanyo ya muthu, vhuvhuya hoṱhe ha Mudzimu vhu vhuye vhu khunyelele kha inwi.

²⁰ Mudzimu kha a rendwe – Ene ane nga maanḓa awe a shumaho kha riṋe a kona u ita zwi fhiraho kule-kule zwine ra nga zwi humbela kana ra zwi anganya –

²¹ Mudzimu nga a rendwe nga tshivhidzo na nga Khristo Yesu zwi tshi ya nga mirafho na mirafho, zwino na lini na lini. Amen.