VHAEFESA 1 - BIVHILI KHETHWA Mafhungo Madifha

Theshano

¹ Ndi nṋe Paulo we nda vha muapostola wa Khristo Yesu nge Mudzimu a zwi funa. Ndi ṅwalela inwi vhakhethwa vha Mudzimu ngeo Efesa vha fulufhedzeaho kha Khristo Yesu. Ndi khou ni resha ndi ri:

² Ngavhe Mudzimu Khotsi ashu, na Muṋe washu Yesu Khristo vha tshi ni itela vhuthu na vha na mulalo.

Mashudu ane ra ṋewa nge ra vha vhathihi na Khristo

³ Nga hu rendwe Mudzimu, Khotsi a Muṋe washu Yesu Khristo, Ene we nga Khristo a ri ṋea mashudu oṱhe a zwa muya a bvaho ṱaḓulu.

⁴ Zwiḽa shango ḽi sa athu na u sikiwa o vha o no ḓi ri nanga nga Khristo, uri a tshi ri sedza a vhone ri vhakhethwa ri sa solisei. Nga lufuno lwawe

⁵ o vha o no dzula o ri ta u vha vhathihi na Yesu Khristo uri ri vhe vhana vhawe. Hezwo o zwi ita nge a tou zwi funa Ene muṋe,

⁶ uri ri kone u renda vhuthu hawe vhungafhangafha he a ri itela nga Murwa mufunwa wawe.

⁷ Onoyo Murwa o ri rengulula nga malofha awe uri ri hangwelwe u khakha hashu. Ngoho vhuthu ha Mudzimu ndi vhuhulu!

⁸ O ri kovhela hone lwa u tou wa muwa nga vhuṱali vhuhulu na ṱhalukanyo.

⁹ A ita zwe a vha o dzudzanya nga u funa hawe, a ri dzumbululela tshiphiri tsha zwe a vha o ḓiimisela u zwi ita nga Khristo,

¹⁰ a konou zwi khunyeledza ngae musi tshifhinga tsho swika. Zwino-ha tshe a vha o ḓiimisela ndi u ṱanganya tsiko yoṱhe ya zwi re ṱaḓulu na fhano fhasi uri zwoṱhe zwi vhuswe nga ṱhoho nthihi, Ene Khristo.

¹¹ Mudzimu u tshimbidza zwoṱhe nga hune a tou funa Ene muṋe. Zwenezwo o dzula o zwi dzudzanya u bva mathomoni, a ri ta uri ri vhe mukovhe wawe nga u vha vhathihi na Khristo.

¹² Hezwo o zwi itela uri riṋe Majuda vhe ra vha vha u ranga u ṱulutshela Khristo ri rende vhugala ha Mudzimu.

¹³ Na kha inwi vhannḓa zwo ralo: musi ni tshi pfa mafhungo maḓifha ane na tshidzwa ngao, ane a vha yone ngoho ye ra laedzwa, no fulufhela Khristo, Mudzimu a tshi ni swaya nga luswayo lwawe nga u ni ṋea Muya Mukhethwa we na fulufhedziswa.

¹⁴ Muya ndi Ene tshiga tsha u khwaṱhisa uri ri ḓo wana mukovhe we Mudzimu a ri fulufhedzisa, musi a tshi ḓo vhofholola tshoṱhe vha re vhawe, uri vhugala hawe vhu rendwe ngazwo.

Thabelo ya Paulo

¹⁵ Ndi tshi pfa uri ni fulufhela hani Muṋe washu Yesu na uri ni funa hani vhakhethwa vhoṱhe vha Mudzimu,

¹⁶ a thi litshi u mu livhuha. Ndi dzula ndi tshi ni rabelela

¹⁷ uri Khotsi wa vhugala a re Mudzimu wa Muṋe washu Yesu Khristo a ni ṋee vhuṱali vhune ha bva kha Muya, a ni dzumbululele Mudzimu ni mu ḓivhe,

¹⁸ maṱo a mbilu dzaṋu a vhonetshelwe, ni kone u ṱalukanya zwe Mudzimu a ni fulufhedzisa musi o ni vhidza, na uri vhugala ha mukovhe we Mudzimu a vhetshela vhakhethwa vhawe ndi vhungafhani,

¹⁹ na vhuhulu ha maanḓa awe. Maanḓa a Mudzimu ndi a shumaho, ha imedzanwi nao, ha na mugumo, a fhira zwoṱhe. Eneo maanḓa a shumaho kha riṋe vhane ra mu fulufhela ndi one

²⁰ e a vusa ngao Khristo vhafuni, a mu dzudza thungo ya tshanḓa tshawe tshauḽa hangei ṱaḓulu vha vhusa vhoṱhe.

²¹ Zwenezwo Khristo u vho vhusa vhavhusi vhoṱhe, vharuṅwa na thuṅwa na vhalangi vhadzo na vha maanḓa na vhahulwane, kana vhahulwane vhafhio na vhafhio, vha tshifhinga tshino na tshi ḓaho, u a vha vhusa vhoṱhe.

²² Mudzimu o ita zwoṱhe vhukando hawe, a mu vhumba ṱhoho ya tshivhidzo i re nṱha ha zwoṱhe.

²³ Tshivhidzo tshone ndi muvhili wa Khristo; ndi tshone tshine a vha o khunyelelaho ngatsho, Ene-vho ndi Mukhunyeledzi wa zwoṱhe hoṱhe-hoṱhe.