TITOSI 2 - BIVHILI KHETHWA Mafhungo Madifha

Pfunzo i songo shandeaho

¹ Inwi hone funzani zwi tshimbilelanaho na pfunzo kwayo.

² Layani vhakalaha vha dzule vho dzivhuluwa, vha vhe na tshileme, vha ḓilange, vha nambatele lutendo lwone-lwone vhe na lufuno, vha tshi konḓelela.

³ Ni dovhe ni laye na vhakegulu uri vha ḓifare lu tamisaho. Vha songo vha vhotshiisaphungo, vha songo vha zwidakwa. Vha vhe vhathu vha konaho u laya,

⁴ uri na vhabvana vha gude u funa vhanna vhavho na vhana vhavho

⁵ na u ḓilanga na u ila zwa vhuaḓa na u shuma nga nungo miṱani sa vhasadzi vhavhuḓi, na u thetshelesa vhanna vhavho; vha sa ralo vhathu vha nga nyefula ipfi ḽa Mudzimu.

⁶ Ni dovhe ni laye na vhavhera uri na vhone vha ḓilange,

⁷ inwi muṋe ni tshi tou vha tsumbo khavho ya mishumo yoṱhe mivhuya, ni tshi vhonala ni si na tshimbevha ni tshi funza, ni na tshileme,

⁸ na pfunzo yaṋu i kwayo i sa hanedzei. Ndi hone vhahanedzi vha tshi ḓo shona nga u kundwa tsha u ri sola ngatsho.

⁹ Phuli kha dzi pfe vhaṋe vhadzo dzi ite zwoṱhe zwine vha dzi vhudza. Dzi shume zwi vha takadzaho dzi si na maṅaṅa.

¹⁰ Dzi songo vha vhatswi, kha dzi vhonale dzi tshi fulufhedzea tshoṱhe. Ndi hone zwoṱhe zwine dza ita zwi tshi ḓo ita uri pfunzo ya Mudzimu Mutshidzi washu i rendwe.

¹¹ Ndi tshi ralo ndi uri Mudzimu o dzumbululela vhathu vhoṱhe vhuthu hawe ha u vha tshidza.

¹² Vhu ri gudisa u laṱa kutshilele kwa u nyadza Mudzimu, na nyemulo dza zwa shango, ra tshila nga u ḓilanga ri vhavhuya vha ofhaho Mudzimu fhano shangoni,

¹³ ró lavhelela mashudu a musi vhugala ha Mudzimu muhulu Mutshidzi washu Yesu Khristo vhu tshi ḓo vhonala.

¹⁴ Ene Yesu Khristo o ḓikumedza lufu a tshi itela riṋe uri a ri vhofholole vhuvhini hoṱhe a ṱanzwe mbilu dzashu ri vhe lushaka lwawe e eṱhe, ro ḓiimisela u shuma mishumo mivhuya.

¹⁵ Hezwo-ha ndi zwine na fanela u zwi amba ni tshi vha ṱuṱuwedza na u vha sumbedza vhukhakhi havho. Ni ambe ni na maanḓa ni sa tendi na muthihi a tshi ni nyadza.