RUTE 3 - BIVHILI KHETHWA Mafhungo Madifha

Maano a Naumi

¹ Ḽiṅwe ḓuvha Naumi a amba na Rute mazwale wawe a ri, “Ṅwananga, ndi funa u ni ṱoḓela munna uri ni vhe na muṱa waṋu.

² A thi ri Buasi uḽa we na ṱwa na vhashumi vhawe ndi shaka ḽashu? Nga madekwana u ḓo vha a khou yo fhula baḽi luvhatani.

³ Ṱambani ni ḓole zwinukheleli ni ambare ni tsele luvhatani. Hone a songo ni vhona a sa athu ṅwata na u nwa.

⁴ Ni sedze fhethu hune a lala hone, ni konou sendela ni fukule nguvho ni lale tsini ha milenzhe yawe; ene u ḓo ni vhudza tshine na fanela u ita.”

⁵ Rute a tenda a ri, “Ndi ḓo ita zwoṱhe zwine vha mmbudza.”

⁶ Ndi hone a tshi tsela luvhatani, a tshi swika a ita zwenezwiḽa zwe mazwale vha mu laya.

⁷ Buasi o ri u ḽa na u nwa, mbilu yawe ya takala, a yo lala tsini ha thulwi ya baḽi, Rute a ḓa a tshi tou ṋengeledza, a fukula nguvho ya Buasi a lala tsini ha milenzhe yawe.

⁸ Vhukati ha vhusiku Buasi a karuwa, a rembuluwa a pfa hu na musadzi o lalaho tsini ha milenzhe yawe,

⁹ a vhudzisa a ri, “Ndiwe nnyi?” Rute a ri, “Ndi nṋe Rute muṋe wanga, ndi khou humbela uri vha mmbavhalele, ngauri vha shaka ḽashu.”

¹⁰ Buasi a fhindula a ri, “Muṋe washu u ḓo ni shudufhadza ṅwananga; ndi hone no sumbedza u fulufhedzea u fhira na zwiḽa zwa u thoma, ngauri a no ngo ṱaha na vhaṱhannga, vha vhashai kana vho pfumaho.

¹¹ Zwino-ha ṅwananga, ni songo ḽa mbilu, ndi ḓo ita zwoṱhe zwine na humbela; vhathu vhoṱhe fhano ha hashu vha ni ḓivha ni musadzisadzi.

¹² Ni amba zwone, nṋe ndi shaka ḽaṋu, ndi fanela u ni londola. Hone hu na muṅwe munna a re shaka ḽa tsini u fhira nṋe.

¹³ Eḓelani zwaṋu fhano. Arali matshelo onoyo a tshi ḓo tenda u ni dzea, ndi zwone; arali a sa funi ndi ana nga Muṋe washu a tshilaho ndi ri ndi ḓo ni dzea. Inwi eḓelani zwaṋu fhano ḽi vhuye ḽi tshe.”

¹⁴ Nangoho Rute a eḓela henefho tsini ha milenzhe ya Buasi, ḽi sa athu vhonadza a mbo vuwa uri a si vhonwe nga muthu, ngauri Buasi o vha o mu vhudza a ri, “Ndi khwiṋe vha sa zwi ḓivhi uri ho ḓa musadzi a eḓela fhano luvhatani.”

¹⁵ Rute a sa athu ṱuwa Buasi a ri a bvule nguvho a i ṱharamudze. Rute a ita nga u ralo, Buasi a shela baḽi ine ya nga swika khilogiramu dza 25, a mu hwesa.

¹⁶ Buasi a humela muḓini, Rute ene a humela ha mazwale wawe. Vha mu vhudzisa uri o tshimbila hani, a vha hanelela zwoṱhe zwe Buasi a mu itela,

¹⁷ a ri, “Vho ita na u nṋea khilogiramu dza 25 idzi dza baḽi, ngauri vho ri ndi songo humela kha vhone ndi songo fara tshithu.”

¹⁸ Naumi a ri, “Zwino sokonu lindela ṅwananga, ni ḓo vhona uri hu ḓo itea mini. Uḽa munna a nga si rudze mbilu, mafhungo u ḓo a dzudzanya ṋamusi.”