NZUMBULULO 18 - BIVHILI KHETHWA Mafhungo Madifha

U phusukanywa ha Babele

¹ Izwo zwo no fhira nda vhona muṅwe muruṅwa a tshi tsa a tshi bva makoleni. O vha e na maanḓa mahulu, a tshi penya lwe a vhonetshela ḽifhasi ḽoṱhe.

² A vhidzelela nga ipfi ḽihulu a ri, “Wo fhalala! Muḓi muhulu wa Babele wo fhalala! Wo no tou vha tshiṱaha tsha madimoni; hu vho dzula mimuya yoṱhe ya dzitshika. Zwiṋoni zwoṱhe zwo iledzwaho zwi dzula hone, [khathihi na dziphukha dzoṱhe dzo iledzwaho], dzi nengisaho.

³ Tshakha dzoṱhe dzo nwa waini i kambaho ya vhupombwe hawo. Mahosi a shango o ita vhupombwe nawo; vhashavhi vha shango vho pfuma nga lupfumo lwawo lu si na vhukono!”

⁴ Nda dovha nda pfa ḽiṅwe ipfi ḽi bvaho ṱaḓulu ḽi tshi ri, “Ibvani vhathu vhanga! Ibvani khawo! Ni songo ḓibaḓekanya na vhutshinyi hawo, ni sa ḓo welwa-vho nga madambudzo o u livhaho.

⁵ Vhutshinyi hawo ho khokhwa u guma makoleni. Mudzimu ho ngo hangwa zwiito zwawo zwivhi.

⁶ U lifhedzeni-ha zwe wa ita vhaṅwe, ni u lifhedze ni ite kavhili zwe wa ita. Ḓadzani dzhomela ḽawo kavhili, u nwe waini yeneyo ye wa vha ingela!

⁷ U shengedzeni u gomele, zwi nge vhugala na miḓifho ye wa ḓiitela! U dzula u tshi ḓifhima u tshi ri, ‘Ndo thukha hafhano nṋe mufumakadzi! A thi tshilikadzi; ndi nga si vhuye nda shengela.’

⁸ Nga zwenezwo u ḓo welwa nga mabulayo nga ḓuvha ḽithihi: He dwadze, he u teta, he nḓala, he u swa nga mulilo! Muṋe washu Mudzimu a u haṱulaho u na maanḓa!”

Mahosi a tshi lilela Babele

⁹ Mahosi a ḽifhasi e a ita zwa dzinyemulo na vhupombwe nawo, vha tshi vhona u tshi khou swa ho ṱangana buluvhutsi, vha ṱavha mukosi vha lilela uyo muḓi,

¹⁰ vha ima kule nga u ofha u tambula nawo, vha ri, “Yawee! Zwi ofhisa hani! Babele muḓi muhulu wa maanḓa u tshi tou lozwiwa kathihi fhedzi!”

Vhoramabindu vha tshi lilela Babele

¹¹ Na vhoramabindu vha ḽifhasi vha ṱavha mukosi vha u lilela, ngauri a hu tshee na ane a kha ḓi renga thundu dzavho

¹² dza musuku na siliva na matombo a mutengo muhulu na nungu na lukhaha na malabi a muridili na siliga na malabi matswuku na tshakha dzoṱhe dza basha ḽa madzanga na tshakha dzoṱhe dza zwithu zwa madzanga zwi itwaho nga ṋanga dza nḓou na basha ḽa mutengo muhulu na musina na tsimbi na mmabulu

¹³ na sinamoni na zwilungi na zwinukheleli na zwiḓolo zwi nukhelelaho na zwioro na waini na mapfura a muolivi na vhukhopfu na goroi na kholomo na nngu na dzibere na dzigariki na dziphuli, ha vhuya ha tou rengwa na vhathu.

¹⁴ Vha ḓo lila vha ri, “Khaṋo ye wa vha u tshi emula yo ngalangala; na lupfumo lwau na madzanga zwo fhela. A u tsha ḓo dovha wa zwi wana.”

¹⁵ Vhoramabindu vhe vha pfuma nga u vhambadza hedzo thundu afho muḓini uyo vha ḓo ima kule nga u ofha u shengela nawo, vha ṱavha mukosi vha lila

¹⁶ vha ri, “Yawee! Zwi ofhisa hani zwa uḽa muḓi muhulu! Wo vha wo ambara lukhaha na muridili na tswuku, wa ḓiṱama nga madzanga a musuku na matombo a mutengo muhulu na nungu.

¹⁷ Zwino asizwo-ha, wo tshinyalelwa nga lupfumo lwawo lwoṱhe kathihi fhedzi!” Vhalangi vha zwikepe vhoṱhe na vhanameli vhazwo na vhatshimbidzi vhazwo na vhaṅwe vhoṱhe vha no tshila nga zwa lwanzheni vha ima kule,

Vhatshimbidzi vha zwikepe vha tshi lilela Babele

¹⁸ vha tshi vhona u tshi khou swa ho ṱangana buluvhutsi vha lila vha ṱavha mukosi vha ri, “Ndi ufhio muḓi we wa vhuya wa hula sa hoyu?”

¹⁹ vha ḓishela buse dziṱhohoni vha lila vha ṱavha mukosi vha ri, “Yawee! Zwi ofhisa hani zwa uyu muḓi muhulu! Vhoṱhe vha re na zwikepe zwi tshimbilaho lwanzheni vho pfuma nga lupfumo lwawo, kathihi fhedzi wa ṱangulwa lupfumo lwawo lwoṱhe!”

²⁰ “Iwe ḽiṱaḓulu, takalela zwenezwo! Takalani vhakhethwa vha Mudzimu na vhaapostola na vhaporofita! Mudzimu o u lifhedza zwe wa ita.”

Muḓi wo fhalala tshoṱhe

²¹ Zwenezwo muṅwe muruṅwa wa maanḓa a doba tombo ḽi linganaho na guyo ḽihulu a ḽi posa lwanzheni a ri, “Muḓi muhulu wa Babele u ḓo lozwiwa lwa tshiṱuhu nga u tou rali u si tsha dovha wa vhonala.

²² Hafhano kha iwe a hu tsha ḓo dovha ha pfala nyimbo dza haripa na vhaimbi, na dza vhalidzi vha zwiṱiringo na phalaphala! Na mutsila ufhio na ufhio ha tsha ḓo dovha a vhonala hafhano. Naho u mutsindo wa guyoni a u tsha ḓo dovha wa pfala.

²³ A hu tsha ḓo dovha ha duga luvhone. Fhano kha iwe a hu tsha ḓo dovha ha pfala maipfi a muselwa na mukwasha. Vhoramabindu vhau vho vha vhe vhone vhavhusi vha shango ḽoṱhe, wa fhura tshakha dzoṱhe nga malingo au!”

²⁴ Henefho Babele ho wanala malofha a vhaporofita na vhakhethwa vha Mudzimu na a vhoṱhe vhe vha vhulawa fhano shangoni. Ndi zwe wa lozwelwa zwone.