NZUMBULULO 17 - BIVHILI KHETHWA Mafhungo Madifha

Phombwe yo namelaho ḽivhanda

¹ Ndi hone muṅwe wa vhaḽa vharuṅwa vhaṱanu na vhavhili vho faraho madzhomela maṱanu na mavhili a tshi ḓa ha nṋe a ri, “Iḓa ndi u sumbedze uri iḽa phombwe khulu i ḓo lifhedzwa hani. Ndi amba heiḽa i dzulaho milamboni minzhi,

² ye mahosi a ḽifhasi a ita vhupombwe nayo, na vhathu vha shango vha kambwa nga waini ya vhupombwe hayo.”

³ Nda ri ndi Muyani, muruṅwa a nkhwala a nnyisa phangani. Henengei nda vhona musadzi o namela ḽivhanda ḽitswukutswuku, muvhili waḽo woṱhe wo ṅwalekanywa madzina a u nyefula Mudzimu, ḽi na ṱhoho ṱhanu na mbili na ṋanga dza fumi.

⁴ Uyo musadzi o vha o ambara zwiambaro zwa muridili na zwitswukutswuku, o ḓiṱama nga madzanga a musuku na matombo a mutengo muhulu na nungu, o fara tshinwelo tsha musuku tsho ḓalaho zwi nengisaho na tshika dza vhupombwe hawe.

⁵ Kha muvhombo wawe o ṅwalwa dzina ḽa tshiphiri ḽi no pfi, “Babele muhulu, Mme a dziphombwe, mme a zwi nengisaho zwoṱhe zwi no itwa shangoni”.

⁶ Nda vhona uyo musadzi o kambwa nga malofha a vhathu vha Mudzimu na a vhe vha vhulahelwa u ṱanziela Yesu. Ndi tshi mu vhona nda kanuka zwihulu.

Zwine ḽivhanda ḽa fanyisedzela zwone

⁷ Muruṅwa a mmbudzisa a ri, “Ndi mini u tshi kanuka? Ndi ḓo u dzumbululela tshiphiri tsha uyo musadzi na tsha ḽivhanda ḽe a ḽi namela, ḽa ṱhoho ṱhanu na mbili na ṋanga dza fumi.

⁸ Iḽo ḽivhanda ḽo vhuya ḽa vha hone, fhedzi zwino a ḽi tsha tshila; ḽi ḓo ṱuwa ḽi tshi bva dindini, ḽa fhedza nga u lozwiwa. Vhathu vha dzulaho fhano fhasi vhe madzina avho a si ṅwalwe buguni ya vha tshilaho tshee shango ḽa sikwa, vha ḓo kanuka vha tshi vhona ḽivhanda iḽo ḽe ḽa vhuya ḽa vha hone, fhedzi zwino ḽi si tsheeho, ḽi tshi ḓo dovha ḽa vhonala.”

⁹ Hezwi zwi ṱoḓa vhuṱali na ṱhalukanyo. Idzo ṱhoho ṱhanu na mbili ndi zwikwara zwiṱanu na zwivhili zwine uyo musadzi a dzula khazwo. Dza dovha dza amba mahosi maṱanu na mavhili.

¹⁰ Vhaṱanu vhavho vho no ḓi tekulwa, zwino ho sala hu tshi vhusa muthihi, ha dovha ha vha na muṅwe a sa athu swika. A tshi swika u ḓo tou vhusa tshifhinganyana.

¹¹ Iḽo ḽivhanda ḽe ḽa vha ḽi tshi tshila ḽine zwino ḽi si tsha tshila, ndi ḽone khosi ya vhuṱanu na vhuraru. Ndi muthihi na vhaḽa vhaṱanu na vhavhili. Ḽi ḓo ṱuwa ḽi tshi lozwiwa.

¹² “Idzo ṋanga dza fumi dze wa dzi vhona ndi mahosi a fumi a sa athu vhusa, hone a ḓo tendelwa u vhusa na iḽo ḽivhanda awara nthihi fhedzi.

¹³ Vha ṱoḓa zwithihi zwi no fana: vha ḓo kumedza iḽo ḽivhanda maanḓa avho na muvhuso wavho.

¹⁴ Vha ḓo lwa na Ngwana, hone Yone i ḓo vha kunda i na vhayo vho vhidzwaho, vhanangiwa vha fulufhedzeaho, ngauri ndi Yone Muṋe wa vhaṋe, Khosi ya mahosi.”

U lovha ha iḽa phombwe khulu

¹⁵ A dovha a ri, “Iyo milambo ye wa vhona phombwe yo dzula vhukati hayo ndi magogo a vhathu vha mitupo na tshakha na nyambo dzo fhambanaho.

¹⁶ Idzo ṋanga dza fumi dze wa dzi vhona, na iḽo ḽivhanda, zwi ḓo sala zwi tshi vhenga iḽa phombwe zwa i ṱangula ya sala fhedzi. Zwi ḓo ḽa na ṋama yayo zwa i fhisa nga mulilo.

¹⁷ Mudzimu u langa mbilu dzavho vha ita zwine a funa hezwi vha tshi shumisana vha tshi kumedza maanḓa avho iḽo ḽivhanda uri ḽi vhuse, maipfi a Mudzimu a vhuya a khunyelela.

¹⁸ Uyo musadzi we wa mu vhona ndi uḽa muḓi muhulu u vhusaho mahosi a ḽifhasi.”