NUMERI 36 - BIVHILI KHETHWA Mafhungo Madifha

Ifa ḽa mukovhe wa vhasadzi vho dzewaho

¹ Vhahulwane vha miṱa ya mutupo wa Giliadi ṅwana wa Makhiri, ṅwana wa Manase, ṅwana wa Josefa, vha ya ha Mushe na vhaṅwe vharangaphanḓa na vhahulwane vha miṱa ya Vhaisraele,

² vha ri, “Muṋe washu o vha laya uri vha kovhe shango nga u ita madeṅwa. A vha laya na uri mukovhe wa shaka ḽashu Tselofihadi u ṋewe vhananyana vhawe.

³ Zwino arali vha dzewa nga vhanna vha maṅwe matsinde a Vhaisraele, mukovhe wavho u vho ḓo vha wa tsinde ḽeneḽo, mukovhe wo kovhelwaho riṋe wa vho ḓo fhungudzea.

⁴ Hu ḓo ri nga ṅwaha wa u vhuedzedza thundu, musi thundu yoṱhe yo rengiswaho i tshi vhuedzedzwa ha muṋe wayo wa u ranga, mukovhe wa vhananyana vha Tselofihadi u ḓo engedza wa tsinde ḽa vho vha dzeaho, wa vha wo bviswa tshoṱhe kha tsinde ḽashu.”

⁵ Ndi hone Mushe a tshi laya Vhaisraele nga ndayo heino i bvaho ha Muṋe washu, a ri, “Zwine vha tsinde ḽa Manase vha amba ndi zwone,

⁶ zwenezwo Muṋe washu u ri vhananyana vha Tselofihadi vha nga ḓi dzewa nga ane vha tou funa, hone a vhe e wa tsinde ḽa havho.

⁷ Mukovhe wa Muisraele muṅwe na muṅwe u ḓo ḓi dzula u wa tsinde ḽa hawe.

⁸ Musadzi muṅwe na muṅwe ane a kovhelwa ifa ḽa tsinde ḽa Vhaisraele o fanela u dzewa nga munna wa tsinde ḽeneḽo. Ngauralo Muisraele muṅwe na muṅwe u ḓo wana ifa ḽa vhokhotsi awe,

⁹ uyo mukovhe wa si pfukele kha ḽiṅwe tsinde. Tsinde ḽiṅwe na ḽiṅwe ḽi ḓo vha na mukovhe waḽo.”

^10-11 Ndi hone Mahala na Thiritsa na Hogola na Milikha na Nua, vhananyana vha Tselofihadi, vha tshi ita zwe Muṋe washu a laya Mushe, vha dzewa nga dzikhaladzi dzavho.

¹² Vha dzewa nga vha mitupo ya tsinde ḽa Manase ṅwana wa Josefa, mikovhe yavho ya ḓi dzula kha tsinde ḽa khotsi avho.

¹³ Heyo ndi yone milayo na ndayo dze Muṋe washu a ṋea Vhaisraele nga Mushe vhe midavhini ya Muaba tsini na mulambo wa Jorodani u livhana na Jerikho.