NUMERI 35 - BIVHILI KHETHWA Mafhungo Madifha

Miḓi ye ya kovhelwa Vhalivi

¹ Muṋe washu a amba na Mushe midavhini ya Muaba tsini ha Jorodani u livhana na Jerikho a ri,

² “Vhudza Vhaisraele uri kha mashango e vha kovhelwa vho fanela u ṋea Vhalivi miṅwe miḓi ine vha ḓo dzula khayo na pfulo u mona na iyo miḓi.

³ Heyo miḓi i ḓo vha ya Vhalivi, vha ḓo dzula khayo. Pfulo i ḓo vha ya kholomo dzavho na masambi a nngu na zwiṅwe zwifuwo.

⁴ Pfulo i ḓo ita mitha dza 450 u bva mutsheṱoni wa muḓi

⁵ uri hu vhe na fhethu ha tshikwea hune ha ita mitha dza 900 masia oṱhe, vhubvaḓuvha, tshipembe, vhukovhela, devhula, muḓi u vhe vhukati.

⁶ Vhalivi vha ṋewe miḓi miṱanu na muthihi ya vhushavhelo hune muthu a nga kona u shavhela hone arali a tshenuwa o vhulaha muṅwe a songo humbula. Vha dovhe vha ṋewe miṅwe miḓi ya 42,

⁷ na mashango ayo a pfulo, yo ṱangana i vhe miḓi ya 48.

⁸ Tshivhalo tsha miḓi ya Vhalivi kha tsinde ḽiṅwe na ḽiṅwe zwi ḓo ya nga vhuhulwane ha shango ḽa tsinde ḽeneḽo.”

Miḓi ya vhushavhelo

⁹ Muṋe washu a vhudza Mushe

¹⁰ uri a vhudze Vhaisraele a ri, “Musi ni tshi wela mulambo wa Jorodani, ni tshi dzhena shangoni ḽa Kanana,

¹¹ ni nange miḓi ya vhushavhelo hune muthu a nga kona u shavhela hone arali a tshenuwa o vhulaha muṅwe a songo humbula.

¹² Henefho u ḓo vha o tsireledzea kha shaka ḽa uyo ḽine ḽa funa u lifhedza. Muthu ane a pomokwa ha pfi o vhulaha muthu, a songo vhulawa á sa athu sengiswa khoroni.

¹³ Nangani miḓi miṱanu na muthihi,

¹⁴ miraru vhubvaḓuvha ha Jorodani, miraru shangoni ḽa Kanana.

¹⁵ Heyo i ḓo vha miḓi ya vhushavhelo ya Vhaisraele na vhatsinda vho ḓaho u dzula tshifhinganyana kana u dzula tshoṱhe. Muthu ane a vhulaha muṅwe á songo humbula a nga shavhela kha muṅwe wayo.

^16-18 “Huno arali munna a vhulaha muṅwe nga tshihali tsha tsimbi kana tombo kana thanda, u na mulandu wa u vhulaha muthu, onoyo a vhulawe.

¹⁹ Shaka ḽa tsini ḽa uyo mufu ḽi na pfanelo ya u vhulaha iyo phondi. Arali a mu wana a mu vhulahe.

²⁰ “Arali munna a tshi vhenga muṅwe a mu vhulaha nga u mu wisela fhasi kana nga u mu posa nga tshiṅwe tshithu,

²¹ kana nga u mu rwa nga vili, u na mulandu wa u vhulaha muthu, onoyo nga a vhulawe. Shaka ḽa tsini ḽa uyo mufu ḽi na pfanelo ya u vhulaha iyo phondi. Arali a mu wana nga a mu vhulahe.

²² “Huno arali muthu a vhulaha muṅwe ane a si mu vhenge, hu nga kha ḓi vha nga u tou mu wisela fhasi kana nga u mu kovhola nga tshiṅwe tshithu, hone hu si nga khole,

²³ kana a posa tombo á songo ranga a sedza, a tshenuwa o vhulaha muthu á songo humbula u mu huvhadza, nahone e si swina ḽawe,

²⁴ mafhungoni o raloho khoro nga i haṱule vha tshi sedza mulandu vha lamule muvhulahi na mulifhedzi.

²⁵ Khoro i fanela u tsireledza uyo munna a re na mulandu wa u vhulaha muthu uri a si lifhedzwe nga shaka ḽa mufu, nahone vho fanela u mu vhuedzedza muḓini wa vhushavhelo he a vha o shavhela hone. O fanela u dzula henefho hu vhuye hu fe tshifhe muhulu wa tshifhinga tshenetsho.

²⁶ Arali uyo munna a re na mulandu wa u vhulaha muthu a bva afho muḓini wa vhushavhelo he a shavhela hone,

²⁷ shaka ḽa mufu ḽa ṱangana nae ḽa mu vhulaha, u lifhedza ha u ralo a si vhupondi.

²⁸ Munna a re na mulandu wa u vhulaha muthu o fanela u dzula muḓini wa vhushavhelo hu vhuye hu fe tshifhe muhulu, ó no fa a nga ḓi humela hayani.

²⁹ Ndayo hedzo dzi kwama inwi na vhaḓuhulu vhaṋu vhoṱhe hune na dzula hone.

³⁰ “Munna ane a pomokwa u fanela u wanala e na mulandu a vhulawa arali hu na ṱhanzi mbili kana dzi fhiraho idzo, ha vhulawi arali o vhonwa nga ṱhanzi nthihi fhedzi.

³¹ Phondi a i lifhi, i tou vhulawa.

³² Arali munna o shavhela muḓini wa vhushavhelo, ni songo mu tendela a tshi lifha uri a humele hayani tshifhe muhulu a sa athu fa.

³³ Arali na ita nga u ralo, shango ḽine na dzula khaḽo ni ḓo ḽi shata tshika. Vhupondi vhu kumadza shango, nahone a hu na maṅwe maitele a u kumulula shango ḽe muthu a vhulawa khaḽo arali hu si u vhulaha phondi.

³⁴ Shango ḽine na dzula khaḽo ni songo ḽi kumadza, ngauri ndi Nṋe Yahavee, ndi dzula na Vhaisraele.”