NUMERI 34 - BIVHILI KHETHWA Mafhungo Madifha

Masakha a shango

¹ Muṋe washu a ṋea Mushe

² ndayo hedzi dza Vhaisraele a ri, “Musi ni tshi dzhena Kanana, shango ḽine nda khou ni ṋea ḽone, masakha a shango ḽaṋu a ḓo vha haya:

³ Masakha a thungo ya tshipembe a ḓo thoma phangani ya Tsini a tshimbila na masakha a Edomo. A ḓo thoma vhubvaḓuvha hune Lwanzhe lwa Muṋo lwa guma hone thungo ya tshipembe.

⁴ Zwino a konou livha tshipembe a tshi ya Pharani ya Phame a fhirela phanḓa a swika Tsini a vhuya a swika tshipembe Kadeshe Barania. Zwenezwo a livha vhukovheladevhula u ya Hatsara Adara a fhirela Atsimoni,

⁵ u bva henefho a ḓo livha govhani na masakhani a Egipita a fhelela Lwanzheni lwa Phandamashango.

⁶ “Masakha a vhukovhela a ḓo vha Lwanzhe lwa Phandamashango.

⁷ “Masakha a devhula a ḓo tou tswi u bva Lwanzheni lwa Phandamashango u ya thavhani ya Horo,

⁸ u bva henefho a livha Pharani ya Hamathi. A ḓo fhirela phanḓa a tshi ya Tsedada,

⁹ a fhirela Zifironi, a guma Hatsara Enani.

¹⁰ “Masakha a vhubvaḓuvha a ḓo tou tswi a tshi bva Hatsara Enani a tshi ya Shefamu.

¹¹ U bva henefho a ḓo konou livha tshipembe a tshi ya Harabele, vhubvaḓuvha ha Aini, a fhirela mivhunduni khunzikhunzini ya vhubvaḓuvha ya dzivha ḽa Khinirethe,

¹² a konou fhirela tshipembe a tshi tsa na mulambo wa Jorodani a tshi ya Lwanzheni lwa Muṋo. “Haya a ḓo vha one masakha a shango ḽaṋu thungo dzoṱhe.”

¹³ Ndi hone Mushe a tshi vhudza Vhaisraele a ri, “Heḽo ndi ḽone shango ḽine na ḓo wana nga u ita madeṅwa, shango ḽe Muṋe washu a ḽi ṋea matsinde maṱanu na maṋa na hafu.

¹⁴ Tsinde ḽa Rubeni na ḽa Gadi na hafu ya tsinde ḽa Manase vha vhubvaḓuvha vho no ḓi kovhelwa shango ḽavho, zwi tshi ya nga miṱa yavho,

¹⁵ vhubvaḓuvha ha Jorodani, u livhana na Jerikho.”

Vharangaphanḓa vhe vha hweswa mushumo wa u kovhekanya shango

¹⁶ Muṋe washu a amba na Mushe a ri,

¹⁷ “Tshifhe Eliasara na Joshua ṅwana wa Nunu vha ḓo kovhekanya vhathu shango.

¹⁸ U dzhie na murangaphanḓa muthihi kha tsinde ḽiṅwe na ḽiṅwe a farise vha tshi kovha shango.”

^19-28 Vhanna vho nangwaho nga Muṋe washu ngevha: Tsinde Murangaphanḓa Juda Khalebe ṅwana wa Jefune Simioni Samuele ṅwana wa Amihudu Benyamini Elidadi ṅwana wa Khisiloni Dani Buki ṅwana wa Jogoli Manase Haniele ṅwana wa Efodo Efraimi Kemuele ṅwana wa Shifitani Zebuloni Elitsafani ṅwana wa Pharanakha Isakhara Phalatiele ṅwana na Azani Ashere Ahihudu ṅwana wa Shelomi Nafuthali Phedahele ṅwana wa Amihudu

Tsinde Murangaphanḓa

²⁹ Havho ndi vhone vhanna vhe Muṋe washu a vha hwesa mushumo wa u kovhela Vhaisraele mikovhe yavho shangoni ḽa Kanana.