NUMERI 30 - BIVHILI KHETHWA Mafhungo Madifha

Ndayo dza miano

¹ Mushe o ṋea vharangaphanḓa vha matsinde a Vhaisraele ndayo hedzi a ri,

² “Arali munna a fulufhedzisa Muṋe washu tshithu nga muano kana a ana a ri u ḓo ḓiilisa tshithu, a songo pfuka zwe a fulufhedzisa, nga a ite zwoṱhe zwe a ri u ḓo zwi ita.

³ “Musidzana arali a kha ḓi dzula muṱani wa khotsi awe, a ita muano a ri u ḓo ṋea Muṋe washu tshiṅwe tshithu kana a fulufhedzisa u ḓiilisa tshiṅwe tshithu,

⁴ khotsi awe a zwi pfa a si mu dzivhise, o fanela u ita zwoṱhe zwe a ana na zwe a fulufhedzisa.

⁵ Huno arali khotsi awe a ri u zwi pfa a mu dzivhisa, zwenezwo muano a u tsha shuma. Muṋe washu a nga si mu vhone mulandu, hufha o dzivhiswa nga khotsi awe!

⁶ “Arali musidzana o fulufhedzisa Muṋe washu tshithu nga muano, a nga vha o u ita nga u tou funa kana a sa londi, kana o fulufhedzisa u ḓiilisa tshiṅwe tshithu, a sala a tshi dzewa,

⁷ munna wawe a ri u zwi pfa a si mu dzivhise, o fanela u khunyeledza zwoṱhe zwe a ana na zwe a fulufhedzisa.

⁸ Huno arali munna wawe a ri u zwi pfa a mu hanisa a tshi khunyeledza uyo muano, zwenezwo muano a u tsha shuma. Muṋe washu a nga si mu vhone mulandu.

⁹ “Tshilikadzi kana musadzi o ṱaliwaho o fanela u khunyeledza tshiṅwe na tshiṅwe tshine a ana na zwoṱhe zwe a fulufhedzisa a ri u ḓo ḓiilisa zwone.

¹⁰ “Arali musadzi o vhingwaho a fulufhedzisa Muṋe washu tshithu nga muano, kana a ana a ri u ḓo ḓiilisa tshiṅwe tshithu,

¹¹ munna wawe a ri u zwi pfa a si mu dzivhise, o fanela u ita zwoṱhe zwe a ana na zwe a fulufhedzisa.

¹² Hone arali munna wawe a ri u zwi pfa a mu dzivhisa u khunyeledza uyo muano, zwenezwo muano a u tsha shuma. Muṋe washu a nga si mu vhone mulandu, ngauri u ḓo vha e munna we a mu kundisa u khunyeledza uyo muano.

¹³ Munna wawe u na pfanelo ya u khwaṱhisa kana u pfuvhisa muano ufhio na ufhio kana zwoṱhe zwe uyo musadzi a fulufhedzisa uri u ḓo ḓidzivhisa zwone.

¹⁴ Huno arali uyo munna a pfa zwa uyo muano a si mu dzivhise musi wonoyo, uyo musadzi o fanela u ita zwoṱhe zwe a ana na zwe a fulufhedzisa. Munna o khwaṱhisa muano nge a ri u zwi pfa a si hane.

¹⁵ Huno arali ngavhuya munna a vho pfuvhisa uyo muano, u na mulandu.”

¹⁶ Hedzo ndi dzone ndayo dze Muṋe washu a laya Mushe zwi tshi ambelwa miano ine ya itwa nga musadzi o vhingwaho kana musidzana ane a kha ḓi dzula muṱani wa khotsi awe.