NUMERI 3 - BIVHILI KHETHWA Mafhungo Madifha

Vhana vha Aroni vha vhatuka

¹ Vhana vha Aroni na Mushe musi we Muṋe washu a amba na Mushe thavhani ya Sinai ndi havha:

² Aroni o vha e na vhana vhaṋa vha vhatuka: Tanzhe ndi Nadaba, ha tevhela Abihu na Eliasara na Ithamara.

³ Vho ḓodzwa mapfura, vha vhumbwa vhotshifhe,

⁴ hone Nadaba na Abihu vho ḓo fa musi vha tshi khou ṋekedza Muṋe washu mulilo u si mukhethwa musi vhe phangani ya Sinai. Vho fa vha si na vhana, zwenezwo Eliasara na Ithamara vha shuma vhe vhotshifhe Aroni a tshi kha ḓi tshila.

Vhalivi vha tshi vhewa uri vha shume vhe vhotshifhe

⁵ Muṋe washu o vhudza Mushe a ri,

⁶ “Ḓisa vha tsinde ḽa Livi u vha vhee vha farisane na tshifhe Aroni.

⁷ Vha ḓo shuma mishumo ya dennde ya u ṱangana na Nṋe vho imela Aroni na vhathu vhoṱhe.

⁸ Vha ḓo londola thundu yoṱhe ya dennde ya u ṱangana na Nṋe, vha shumela vhaṅwe Vhaisraele.

⁹ Vhalivi u vha kumedze Aroni na vhana vhawe, ndi vhone Vhaisraele vhane vha fanela u kumedzwa ene tshoṱhe.

¹⁰ Iwe u vhee Aroni na vhana vhawe uri vha shume mushumo wa vhutshifhe, hone arali muṅwe a vhuya a linga u ḓidzhenisa kha mushumo wonoyo, u ḓo vhulawa.”

¹¹ Muṋe washu a vhudza Mushe a ri,

¹² “Nṋe muṋe ndo nanga Vhalivi kha Vhaisraele vhudzuloni ha matanzhe oṱhe a vhatuka vhane vha bebwa nga musadzi muṅwe na muṅwe wa Muisraele. Vhalivi ndi vhanga,

¹³ ngauri matanzhe oṱhe ndi anga. Zwiḽa ndi tshi vhulaha matanzhe oṱhe Egipita, ndo ḓikhethela tanzhe ḽiṅwe na ḽiṅwe ḽa Israele, ḽa muthu na ḽa tshifuwo. Oṱhe ndi anga. Ndi Nṋe Yahavee.”

Hu tshi vhaliwa Vhalivi

¹⁴ Muṋe washu o laya Mushe e phangani ya Sinai a ri,

¹⁵ “Vhala Vhalivi zwi tshi ya nga mitupo yavho na miṱa yavho, vhala munna muṅwe na muṅwe na mutukana u thoma kha wa ṅwedzi muthihi.”

¹⁶ Mushe a mbo vha vhala unga o laiwa nga Muṋe washu.

¹⁷ Madzina a vhana vha Livi vha vhatuka ndi Gerisoni na Kehathi na Mirari.

¹⁸ Madzina a vhana vha Gerisoni ndi Libini na Shimei.

¹⁹ Madzina a vhana vha Kehathi ndi Amuramu na Izhara na Hebroni na Uziele.

²⁰ Madzina a vhana vha Mirari ndi Mahali na Mushi. Ndi vhone vhomakhulukuku wa mitupo yavho.

²¹ Mutupo wa Gerisoni wo vha wo vhumbiwa nga muṱa wa Libini na wa Shimei.

²² Tshivhalo tshoṱhe tsha vhatuka vho vhaliho u thoma kha wa ṅwedzi muthihi tsho vha 7 500.

²³ Vha mutupo hoyo vho vha vho fanela u ṱoka mishasha yavho murahu ha dennde ya u ṱangana na Muṋe washu, thungo ya vhukovhela.

²⁴ Muhulwane wa uyo mutupo o vha e Eliasafu ṅwana wa Laele.

²⁵ Vho vha vha tshi londola dennde ya u ṱangana na Muṋe washu na lupila lwayo lwa ngomu na lwa nnḓa na luvhemba lune lwa nembeledzwa muṋangoni,

²⁶ na vhupila ha muṱa une wa mona na dennde ya u ṱangana na Muṋe washu na aḽiṱari na luvhemba lune lwa nembeledzwa muṋangoni wa muṱa na thambo dzazwo. Vho vha vha tshi shuma zwoṱhe zwa thundu iyo.

²⁷ Mutupo wa Kehathi wo vha u tshi vhumbiwa nga muṱa wa Amuramu na wa Izhara na wa Hebroni na wa Uziele.

²⁸ Vhoṱhe vhanna na vhatuka vhe vha vhaliwa u thoma kha wa ṅwedzi muthihi vho vha 8 600.

²⁹ Vha mutupo hoyo vho vha vha tshi fanela u ṱoka mishasha yavho sia ḽa tshipembe ḽa dennde ya u ṱangana na Muṋe washu.

³⁰ Muhulwane wa uyo mutupo o vha e Elitsafani ṅwana wa Uziele.

³¹ Vho vha vha tshi londola mbulungelo ya mulanga na ṱafula na tshivheambone na dziaḽiṱari na midzio ine vhotshifhe vha i shumisa Hukhethwa, na luvhemba lune lwa nembeledzwa muṋangoni wa Hukhethwakhethwa. Vho vha vha tshi shuma mishumo yoṱhe ya thundu idzo.

³² Murangaphanḓa wa vhahulwane vha Vhalivi o vha e Eliasara ṅwana wa tshifhe Aroni. O vha a tshi langa vhane vha shuma fhethu hukhethwa.

³³ Mutupo wa Mirari wo vha wo vhumbiwa nga muṱa wa Mahali na wa Mushi.

³⁴ Vhanna vhoṱhe na vhatukana vha no fhira ṅwedzi muthihi vhe vha vhaliwa vho vha vhe 6 200.

³⁵ Vha mutupo hoyo vho vha vha tshi fanela u ṱoka mishasha yavho sia ḽa devhula ḽa dennde ya u ṱangana na Muṋe washu. Muhulwane wa uyo mutupo o vha e Tsuriele ṅwana wa Abihaili.

³⁶ Vho vha vha tshi londola thikho dza dennde ya u ṱangana na Muṋe washu na mbalelo dza mabaphathi na phuphu na zwiraho, vha shuma na u zwi kwea. Vho vha vha tshi shuma zwoṱhe zwine zwa kwamana na thundu dzenedzo.

³⁷ Vho vha vha tshi londola na dzithanda na zwiraho na khokho na dzithambo dza muṱa wa nnḓa.

³⁸ Mushe na Aroni na vhana vhawe vho vha vha tshi fanela u ṱoka mishasha yavho phanḓa ha dennde ya u ṱangana na Muṋe washu sia ḽa vhubvaḓuvha. Vhone vho vha vhe vha u londola Hukhethwa vha tshi itela Vhaisraele. Muṅwe-vho ane a vhuya a linga u sendela tsini na Hukhethwa o vha a tshi vhulawa.

³⁹ Vhanna vhoṱhe vha Vhalivi na vhatukana vha no fhira ṅwedzi muthihi vhe vha vhaliwa nga Mushe zwi tshi ya nga mitupo nga he Muṋe washu a mu laya, vho vha vhe 22 000.

Vhalivi vha tshi dzhia vhuimo ha matanzhe a matsinde oṱhe

⁴⁰ Muṋe washu a amba na Mushe a ri, “Vhala matanzhe oṱhe a Vhaisraele a vhanna na vhatukana u thoma kha wa ṅwedzi muthihi, u ṅwale mutevhe wa madzina avho.

⁴¹ Nṋe nṱoḓele Vhalivi vha vhe vhanga vhudzuloni ha matanzhe oṱhe a Vhaisraele, na zwifuwo zwa Vhalivi vhudzuloni ha matanzhe oṱhe a zwifuwo zwa Vhaisraele. Ndi Nṋe Yahavee.”

⁴² Mushe a tenda, a vhala matanzhe oṱhe a vhanna na vhatukana,

⁴³ vha ṅwedzi muthihi na u fhira, vhoṱhe vho vha 22 273.

⁴⁴ Muṋe washu a amba na Mushe a ri,

⁴⁵ “Nṱoḓele Vhalivi vha vhe vhanga vhudzuloni ha matanzhe oṱhe a Vhaisraele, na zwifuwo zwa Vhalivi vhudzuloni ha zwifuwo zwavho. Vhalivi ndi vhanga. Ndi Nṋe Yahavee.

⁴⁶ Zwino ngauri matanzhe a Vhaisraele a vhatuka a fhira Vhalivi nga u anda nga vhathu vha 273, u fanela u rengulula havho vhana vha vhatuka vha re vhanzhi.

⁴⁷ Muṅwe na muṅwe u mu rengulule nga mangwende maṱanu a siliva, u tshi tevhedza tshikalo tsha hukhethwa,

⁴⁸ tshelede iyo u i fhe Aroni na vhana vhawe.”

⁴⁹ Mushe a thetshelesa, a dzhia

⁵⁰ mangwende a 1 365 a siliva,

⁵¹ a a ṋea Aroni na vhana vhawe nga he Muṋe washu a mu laya.