NUMERI 28 - BIVHILI KHETHWA Mafhungo Madifha

Nduvho dzi no ḓi ṋekedzwa

¹ Muṋe washu a vhudza Mushe

² uri a laye Vhaisraele uri vha ṋekedze Mudzimu nduvho dza zwiḽiwa, i vhe nduvho i nukhelelaho ine ya mu takadza, i ṋekedzwe nga zwifhinga zwo vhewaho.

³ Nduvho dza zwiḽiwa dzine dza fanela u ṋekedzwa Muṋe washu ngedzi: nduvho yo fhiswaho ya nga misi ndi thuthana mbili dza ṅwaha muthihi dzi si na luvhadzi.

⁴ Thuthana ya u thoma i ṋekedzwe nga matsheloni, ya vhuvhili i ṋekedzwe nga madekwana,

⁵ iṅwe na iṅwe i ṋekedzwe na nduvho ya thoro ya vhukhopfu ha khilogiramu nthihi, ho vangiwa ḽitha nthihi ya mapfura avhuḓivhuḓi a muolivi.

⁶ Heyo ndi nduvho ya misi yoṱhe ine ya tou fhiswa tshoṱhe, ndi ye ya ranga u ṋekedzwa thavhani ya Sinai ya vha nduvho ya zwiḽiwa, nduvho i nukhelelaho i takadzaho Yahavee.

⁷ Nduvho ya waini ine ya ṋekedzwa na thuthana ya u ranga, ndi ḽitha nthihi ya waini i tshi tou tevhulelwa fhasi u mona na aḽiṱari.

⁸ Nga madekwana hu ṋekedzwe thuthana ya vhuvhili nga maitele a no fana na a nduvho ya matsheloni, khathihi na nduvho yayo ya waini. Na yone ndi nduvho ya zwiḽiwa, nduvho i nukhelelaho i takadzaho Yahavee.

Nduvho i no ṋekedzwa nga Sabatha

⁹ Nga ḓuvha ḽa Sabatha hu ṋekedzwe thuthana mbili dza ṅwaha muthihi dzi si na luvhadzi na khilogiramu mbili dza vhukhopfu dzo vangiwaho mapfura a muolivi i vhe nduvho ya thoro, hu ṋekedzwe na nduvho ya waini.

¹⁰ Nduvho heyo yo fhiswaho yo fanela u ṋekedzwa nga Sabatha iṅwe na iṅwe, i ingiwe kha nduvho ya misi yoṱhe ine ya ṋekedzwa na nduvho yayo ya waini.

Nduvho ine ya ṋekedzwa nga ḓuvha ḽa u ranga ḽa ṅwedzi

¹¹ Mathomoni a ṅwedzi muṅwe na muṅwe Yahavee a ṋekedzwe nduvho i fhiswaho: mbohwana mbili na thutha nthihi na thuthana ṱhanu na mbili dza ṅwaha muthihi, dzoṱhe dzi vhe dzi si na luvhadzi.

¹² Nduvho ya thoro hu ṋekedzwa vhukhopfu ho vangiwaho mapfura a muolivi: mboho iṅwe na iṅwe i ṋekedzwe na vhukhopfu ha khilogiramu tharu; thutha i ṋekedzwe na vhukhopfu ha khilogiramu mbili;

¹³ thuthana iṅwe na iṅwe i ṋekedzwe na vhukhopfu ha khilogiramu nthihi. Nduvho hedzo dzi fhiswaho ndi nduvho dza zwiḽiwa, nduvho i nukhelelaho i takadzaho Muṋe washu.

¹⁴ Nduvho ya waini yo teaho ndi ḽitha mbili dza waini dzine dza ṋekedzwa na mboho iṅwe na iṅwe, thutha i ṋekedzwe na ḽitha nthihi na hafu dza waini, thuthana nthihi i ṋekedzwe na ḽitha nthihi ya waini. Heyo ndi ndayo ya nduvho i fhiswaho ine ya ṋekedzwa nga ḓuvha ḽa u ranga ḽa ṅwedzi muṅwe na muṅwe ṅwaha woṱhe.

¹⁵ Nduvho i fhiswaho ya misi yoṱhe na nduvho yayo ya waini i ingiwe nga nduvho ya mbokoṱo i vhe nduvho ya tshipfumelo.

Nduvho dzine dza ṋekedzwa vhuṱamboni ha Vhurotho vhu si na mbilisa

¹⁶ Vhuṱambo ha Paseka ha u hulisa Yahavee vhu itwe nga ḓuvha ḽa 14 ḽa ṅwedzi wa u ranga.

¹⁷ Nga ḓuvha ḽa 15 hu thoma vhuṱambo ha Vhurotho vhu si na mbilisa ha fhedza maḓuvha maṱanu na mavhili, maḓuvha eneo hu ḽiwe vhurotho vhu si na mbilisa.

¹⁸ Nga ḓuvha ḽa u ranga ḽa vhuṱambo uho ni kuvhangane ni luvhe, hu songo shumiwa na mushumo na muthihi.

¹⁹ Hu ṋekedzwe Yahavee tshiṱhavhelo tshi fhiswaho tshi vhe nduvho ya zwiḽiwa: mbohwana mbili na thutha nthihi na thuthana ṱhanu na mbili dza ṅwaha muthihi dzi si na luvhadzi.

²⁰ Hu ṋekedzwe nduvho ya thoro yo tewaho ya vhukhopfu ho vangiwaho mapfura a muolivi: mboho iṅwe na iṅwe i ṋekedzwe na vhukhopfu ha khilogiramu tharu, thutha i ṋekedzwe na vhukhopfu ha khilogiramu mbili,

²¹ thuthana iṅwe na iṅwe i ṋekedzwe na vhukhopfu ha khilogiramu nthihi.

²² Hu ṋekedzwe na mbokoṱo nthihi i vhe nduvho ya tshipfumelo, ngauralo hu ḓo vha ho itwa maitele a u ni pfumelela.

²³ Hezwo zwi ṋekedzwe zwi tshi ingiwa kha nduvho dzi fhiswaho dza misi yoṱhe dza matsheloni.

²⁴ Ngauralo hu ṋekedzwe Yahavee nduvho ya zwiḽiwa hu vhuye hu fhele maḓuvha maṱanu na mavhili, iyo ndi nduvho ine ya nukhelela i no mu takadza. Hezwo zwi ṋekedzwe zwi tshi ingiwa kha nduvho ya misi yoṱhe i fhiswaho na nduvho ya waini.

²⁵ Nga ḓuvha ḽa vhuṱanu na vhuvhili ni kuvhangane ni luvhe, ni songo shuma mushumo na muthihi.

Nduvho dzine dza ṋekedzwa vhuṱamboni ha Khaṋo

²⁶ Musi no fhedza vhege ṱhanu na mbili nó ḽa Paseka, nga ḓuvha ḽa u ranga ḽa vhuṱambo ha Khaṋo, musi ni tshi ṋekedza Muṋe washu nduvho ya mavhele maswa, ni kuvhangane ni luvhe, ni songo shuma na mushumo na muthihi.

²⁷ Ṋekedzani nduvho i fhiswaho i vhe nduvho i nukhelelaho ine ya takadza Muṋe washu: mbohwana mbili na thutha nthihi na thuthana ṱhanu na mbili dza ṅwaha muthihi, dzoṱhe dzi vhe dzi si na luvhadzi.

²⁸ Ni ṋekedze nduvho ya thoro yo tewaho ya vhukhopfu ho vangiwaho mapfura a muolivi: mboho iṅwe na iṅwe i ṋekedzwe na vhukhopfu ha khilogiramu tharu, thutha i ṋekedzwe na vhukhopfu ha khilogiramu mbili,

²⁹ thuthana iṅwe na iṅwe i ṋekedzwe na vhukhopfu ha khilogiramu nthihi.

³⁰ Ni ṋekedze na mbokoṱo nthihi i vhe nduvho ya tshipfumelo.

³¹ Ni ṋekedze hezwo na nduvho ya zwiḽiwa zwi tshi ingiwa kha nduvho i fhiswaho ya misi yoṱhe na nduvho ya thoro. Zwifuwo zwoṱhe zwi ṋekedzwe zwi si na luvhadzi.