NUMERI 24 - BIVHILI KHETHWA Mafhungo Madifha

¹ Zwino Biliamu a vhuya a vhona uri Muṋe washu u funa a tshi shudufhadza Vhaisraele, a si tsha thoma u ṱuwa unga zwiḽa a tshi ri a thome a dzumbululelwe, ó tou rembuluwa a lavhelesa phangani.

² Biliamu a tshi sedza a vhona Vhaisraele vho ṱoka mishasha zwi tshi ya nga matsinde avho. Muya wa Mudzimi a ḓa khae,

³ a bula vhuporofita a ri, “Hovhu ndi vhuporofita ha Biliamu ṅwana wa Bioro, ndi vhuporofita ha muthu ane iṱo ḽawe ḽa vhona ḽa phuletshedza,

⁴ ndi vhuporofita ha muthu ane a pfa maipfi a Mudzimu, a no vhona bono ḽi no bva ha Ramaanḓaoṱhe, muthu ane a ri o shuvhama, maṱo a bonyolowa.

⁵ Iwe Jakopo, dennde dzau dzo naka hani, vhudzulo hau ho naka hani, iwe Israele!

⁶ Dzo adza na magovha, dzi nga miṱanga tsini ha mulambo, dzi nga zwikhopha zwa mabindamutshe zwo ṱavhiwaho nga Yahavee, dzi nga mikedara i re tsini ha maḓi.

⁷ Hu ḓo ela maḓi a tshi bva kha mvuvhelo dzavho; mbeu yavho i ḓo wana maḓi manzhi. Khosi yavho i ḓo fhira Agaga, muvhuso wavho u ḓo vha muhulu.

⁸ Mudzimu o vha pfulusa Egipita, vha na nungo dzi no nga dza ṋari. Vha mila tshakha dzi lwaho navho, vha vunḓekanya marambo avho, vha vha runga nga misevhe yavho.

⁹ Vha a tumba, vha shuvhama unga ndau, vha nga ndau ya tsadzi, vha nga vuswa nga nnyi? Ngavhe hu tshi shudufhadzwa vhane vha ni shudufhadza, vhane vha ni teketela ngavhe vha tshi teketelwa!”

¹⁰ Balaka a sinyutshela Biliamu. A putela Biliamu mavili a ri, “Ndo vha vhidzela u teketela maswina anga, zwino vho no vha shudufhadza luraru lwoṱhe.

¹¹ Zwino nga vha ṱuwe vha mbo ḓi ya hayani! Ndo vha ndo vha fulufhedzisa uri ndi ḓo vha pfufha zwihulu, hone Yahavee o vha kundisa u wana iyo pfufho.”

¹² Biliamu a fhindula Balaka a ri, “Hufha ndo vhudza vhaḓinḓa vhe vha vha ruma ha nṋe nda ri,

¹³ ‘Naho Balaka a nṋea pfamo yawe yo ḓala siliva na musuku, ndi nga si kone u ita tshithu nga u funa hanga nda pfuka ndaela ya Yahavee, tshi nga vha tshivhuya kana tshivhi.’ Ndo fanela u amba zwenezwo fhedzi zwine Yahavee a mmbudza uri ndi ambe.”

Vhuporofita ha Biliamu ha u fhedzisela

¹⁴ Biliamu a vhudza Balaka a ri, “Zwino ndi khou humela ha vha hashu, hone ndi sa athu ṱuwa nga vha litshe ndi vha vhudze zwine Vhaisraele vha ḓo ita vhathu vhavho misi i ḓaho.”

¹⁵ Ndi hone Biliamu a tshi bula vhuporofita a ri, “Hovhu ndi vhuporofita ha Biliamu ṅwana wa Bioro, ndi vhuporofita ha muthu ane a maṱo awe a vhona a phuletshedza,

¹⁶ ndi vhuporofita ha muthu ane a pfa maipfi a Mudzimu, muthu ane a vha na nḓivho i no bva kha Waṱaḓuluṱaḓulu, muthu a no vhona bono ḽi no bva kha Ramaanḓaoṱhe, ane a lala o ruḓa maṱo.

¹⁷ Ndi a mu vhona, hone hu si zwino, ndi a mu ṱalela, hone ndi sa sedzi tsini. Hu ḓo ḓa ṋaledzi i tshi bva kha Jakopo, hu ḓo vuwa luḓo lwa vhuhosi lu tshi bva kha Israele. U ḓo pwashekanya ṱhoho dza vha Muaba, a devhekanya madethele a vhana vhoṱhe vha Sethe.

¹⁸ Vhaedomo vha ḓo kundwa, Vhaseiri maswina a Israele vha ḓo shandukiswa, hone Vhaisraele vha ḓo vha na maanḓa.

¹⁹ Hu ḓo ḓa muvhusi a tshi bva kha vha Jakopo, a lozwa vho ponyokaho lufu afho muḓini.”

²⁰ Zwino Biliamu kha bono ḽawe a vhona Vhaamaleke a bula vhuporofita a ri, “Amaleke o vha e wa u thoma kha dzitshakha, hone u ḓo guma nga u lovha.”

²¹ Biliamu a vhona Vhakeni kha bono ḽawe a porofita a ri, “Hune wa dzula hone wo tsireledzea, wo fhaṱa tshiṱaha tshau luwani,

²² naho zwo ralo Vhakeni vha ḓo lozwiwa, musi Ashuru a tshi ni isa vhuthubwani.”

²³ Ndi hone a tshi dovha a bula vhuṅwe vhuporofita a ri, “Yawee, ndi nnyi ane a nga tshila arali Mudzimu a tshi rali?

²⁴ Hu ḓo tala zwikepe zwi tshi bva khunzikhunzini dza Kithimi, zwa kunda Ashuru na Ebere, hone na vhone vha ḓo lovha tshoṱhe.”

²⁵ Ndi hone Biliamu a tshi takuwa a humela hayani, na Balaka a fara nḓila yawe.