NUMERI 23 - BIVHILI KHETHWA Mafhungo Madifha

¹ Biliamu a amba na Balaka a ri, “Nga vha mphaṱele aḽiṱari ṱhanu na mbili fhano, vha nnḓisele mboho ṱhanu na mbili na thutha ṱhanu na mbili.”

² Balaka a ita zwe a vhudzwa nga Biliamu, ene na Biliamu vhuvhili havho vha ṋekedza tshiṱhavhelo tsha mboho na thutha kha aḽiṱari iṅwe na iṅwe.

³ Ndi hone Biliamu a tshi amba na Balaka a ri, “Nga vha ime hafha tsini ha tshiṱhavhelo tshavho, nṋe ndi imele nga thungo, khamusi Yahavee u ḓo ḓa a ṱangana na nṋe. Ndi ḓo vha vhudza zwine a nnzumbululela zwone.” Biliamu a ṱuwa e eṱhe a yo ima lukwarani.

⁴ Nangoho Mudzimu a ṱangana nae, Biliamu a ri, “Ndo fhaṱa aḽiṱari ṱhanu na mbili, kha iṅwe na iṅwe yadzo nda ṋekedza tshiṱhavhelo tsha mboho na thutha.”

⁵ Muṋe washu a longa malaedzwa awe mulomoni wa Biliamu a mu vhudza uri a humele ha Balaka a yo mu vhudza ayo malaedzwa.

⁶ Biliamu a huma a wana Balaka a tshee o ima tsini ha tshiṱhavhelo tshawe, e na vhahulwane vhoṱhe vha Muaba.

⁷ Biliamu a bula vhuporofita a ri, “Balaka o nnḓisa ndi tshi bva Aramu, khosi ya Muaba ya nthamba ndi thavhani dza vhubvaḓuvha. A ri, ‘Iḓa u nteketelele Jakopo, iḓa u panzhilele Israele.’

⁸ Ndi nga teketela hani vhe Mudzimu a si vha teketele? Ndi nga panzhilela hani vhe Mudzimu a si vha panzhilele?

⁹ Ndi vha vhona ndi miṱumbani ya makwara, ndi vha sedza ndi zwikwarani. Ndi vhona lushaka lwo ḓikhethaho, lu no vhona lu sa fani na dziṅwe tshakha.

¹⁰ Ndi nnyi ane a nga vhala buse ḽa Jakopo kana a ḓivha na tshipiḓa zwatsho tsha Vhaisraele? Nga ndi fe-vho lwa vha si na muhoyo, ngavhe ndi tshi fa unga vhone!”

¹¹ Ndi hone Balaka a tshi vhudza Biliamu a ri, “Vho nnyitani? Ndo vha ḓisa fhano uri vha teketele maswina anga, hone tshe vhone vha ita ho vha u vha shudufhadza.”

¹² Biliamu a fhindula a ri, “Ndi amba zwenezwo fhedzi zwine nda vhudzwa nga Yahavee.”

Vhuporofita ha Biliamu ha vhuvhili

¹³ Ndi hone Balaka a tshi vhudza Biliamu a ri, “Nga ri ṱuwe roṱhe ri ye huṅwe fhethu hune vha nga kona u vhona Vhaisraele vhoṱhe, ngauri fhano vha tou vhona vhaṅwenyana, a vha vha vhoni vhoṱhe. Nga vha nteketelele vhone vhe henefho fhethu.”

¹⁴ Balaka a dzhia Biliamu a mu isa tshiingamoni muṱumbani wa thavha ya Phisiga. Na henefho a fhaṱa aḽiṱari ṱhanu na mbili, a ṋekedza tshiṱhavhelo tsha mboho na thutha kha aḽiṱari iṅwe na iṅwe.

¹⁵ Biliamu a amba na Balaka a ri, “Nga vha ime hafha tsini ha tshiṱhavhelo tshavho, nṋe ndi yo ṱangana na Mudzimu hafhaḽaa.”

¹⁶ Muṋe washu a ṱangana na Biliamu, a mu vhudza zwine a fanela u zwi amba, a mu humisela ha Balaka uri a mu vhudze malaedzwa awe.

¹⁷ Ndi hone a tshi humela ha Balaka a wana a tshee o ima tsini ha tshiṱhavhelo tshawe e na vhahulwane vha Muaba. Balaka a vhudzisa a ri, “Yahavee o ri mini?”

¹⁸ Biliamu a bula vhuporofita hovhu a ri, “Balaka, takuwa u thetshelese, iwe ṅwana wa Tsiphoro, mpfe!

¹⁹ Mudzimu ha ngi muthu, ha zwifhi, a si muthu wa ṋama, ha shanduki. A amba tshithu, ha tshi iti kani? A fulufhedzisa tshithu, a nga kundwa u tshi khunyeledza naa?

²⁰ Ndo laiwa uri ndi shudufhadze. Mudzimu o shudufhadza, nṋe ndi nga si zwi shandukise.

²¹ Kha ḽa Jakopo a hu vhonali khombo, kha ḽa Israele a hu na maṱungu. Yahavee Mudzimu wavho u navho, vhukati havho hu pfala muḓalo wa u ṱanganedza Khosi.

²² Mudzimu o vha pfulusa Egipita, u vha lwela unga ṋari.

²³ Jakopo a nga si loiwe, Vhaisraele vha nga si panzhilelwe; zwino hu tshi ambiwa Jakopo na Vhaisraele hu ḓo pfi, ‘Vhonani zwe Mudzimu a ita!’

²⁴ Lushaka ulu lu takuwa unga ndau ya tsadzi, vha takuwa unga ndau i sa aweli i sa athu ḽa tshe ya ponda, ya nwa malofha a tshe ya vhulaha.”

²⁵ Ndi hone Balaka a tshi amba na Biliamu a ri, “Vha songo tsha vha teketela, vha songo tsha vha shudufhadza, kha vha sokou ḓifhumulela!”

²⁶ Biliamu a fhindula a ri, “A tho ngo vha vhudza uri ndo fanela u ita zwoṱhe zwine Yahavee a amba?”

Vhuporofita ha Biliamu ha vhuraru

²⁷ Balaka a vhudza Biliamu a ri, “Nga vha ḓe ndi vha ise huṅwe fhethu. Khamusi Mudzimu u ḓo zwi takalela uri vha nteketelele vhone vhe henefho.”

²⁸ Balaka a dzhia Biliamu a mu isa muṱumbani wa thavha ya Phioro, yo ingamelaho phanga.

²⁹ Biliamu a mu vhudza a ri, “Nga vha mphaṱele aḽiṱari ṱhanu na mbili henefhano, vha nnḓisele mboho ṱhanu na mbili na thutha ṱhanu na mbili.”

³⁰ Balaka a ita zwe Biliamu a amba, a ṋekedza tshiṱhavhelo tsha mboho na thutha kha aḽiṱari iṅwe na iṅwe.