NUMERI 22 - BIVHILI KHETHWA Mafhungo Madifha

Khosi ya Muaba i tshi vhidzisa Biliamu

¹ Vhaisraele vha fhirela phanḓa vha ṱoka mishasha midavhini ya Muaba vhubvaḓuvha ha Jorodani, u livhana na Jerikho.

² Musi khosi ya Muaba, Balaka ṅwana wa Tsiphoro, a tshi pfa zwe Vhaisraele vha ita Vhaamori,

³ na uri Vhaisraele vho vha vhe vhangana, ene na vhathu vhawe vhoṱhe vha farwa nga nyofho.

⁴ Vhamuaba vha vhudza vhahulwane vha Vhamidiani vha ri, “Gogo heḽi ḽi ḓo ṱuwa ḽi tshi lozwa zwoṱhe zwo ri tangaho, unga phulu i tshi fula hatsi ḓakani.” Khosi ya Muaba misi iyo o vha e Balaka ṅwana wa Tsiphoro.

⁵ Ene a ruma vhaḓinḓa u yo vhidza Biliamu ṅwana wa Bioro, we a vha e Phethoro tsini ha mulambo wa Yufuratha shangoni ḽa Amawa. Vha mu swikisela malaedzwa a no bva kha Balaka a no ri, “Nga vha zwi ḓivhe uri ho ḓa lushaka lu tshi bva Egipita, vhathu vhalwo vha khou ḓala hoṱhe-hoṱhe, vho no ṱoka mishasha masakhani anga.

⁶ Vho anda u fhira riṋe, nga vha ḓe vha nteketelele vhone. Khamusi ndi hone ri tshi ḓo kona u vha kunda ra vha thatha vha ṱuwa shangoni ḽino. Ndi a zwi ḓivha uri vhone ane vha mu shudufhadza u wana mashudu, ane vha teketela u welwa nga khombo.”

⁷ Ndi hone vhahulwane vha Muaba na Midiani vha tshi ṱuwa na tshiṱanze tsha u teketela, vha ya ha Biliamu, vha swikisa malaedzwa a Balaka.

⁸ Biliamu a vha vhudza a ri, “Lalani fhano, matshelo ndi ḓo ni vhudza zwine Yahavee a mmbudza.” Ndi hone vhahulwane vha Muaba vha tshi dzula na Biliamu.

⁹ Mudzimu a ḓa ha Biliamu a mu vhudzisa a ri, “Vhanna avha vha no khou dzula na iwe ndi vhonnyi?”

¹⁰ Biliamu a fhindula a ri, “Balaka khosi ya Muaba, ṅwana wa Tsiphoro, o vha ruma ha nṋe

¹¹ a ri hu na lushaka lu no bva Egipita lwo ḓadzaho shango ḽoṱhe. U ṱoḓa ndi tshi mu teketelela vhone uri a lwe navho, a vha thathe vha ṱuwe.”

¹² Mudzimu a vhudza Biliamu a ri, “U songo ṱuwa na vhanna havha nahone u songo teketela Vhaisraele, ngauri Nṋe ndo vha shudufhadza.”

¹³ Nga matshelo Biliamu a ya ha vhaḓinḓa vha Balaka a ri, “Humelani hayani, Yahavee o hana ndi tshi ṱuwa na inwi.”

¹⁴ Vha humela ha Balaka, vha mu vhudza uri Biliamu o hana u vhuya navho.

¹⁵ Ndi hone Balaka a tshi ruma vhaṅwe vhahulwane vhanzhi vhe vha vha vhe vhaḓivhalea u fhira vhaḽa vha u thoma.

¹⁶ Vha ya ha Biliamu vha swikisa malaedzwa a no ri, “Balaka ṅwana wa Tsiphoro u ri, ‘Hu songo vha na tshi vha kundisaho u ḓa ha nṋe nandi!

¹⁷ Ndi ḓo vha pfufha zwihulu, nda ita zwoṱhe zwine vha amba. Nga vha ḓe vha nteketelele vhathu havha nandi.’ ”

¹⁸ Huno Biliamu a fhindula a ri, “Naho Balaka a mpha siliva yoṱhe na musuku woṱhe zwi re pfamoni yawe, ndi nga si kone u pfuka ndaela ya Yahavee Mudzimu wanga nangwe hu kha mafhungo maṱuku.

¹⁹ Huno lalani fhano, u ḓi nga vhaḽa vhaṅwe, uri ndi ḓivhe arali Yahavee e na zwiṅwe zwine a ṱoḓa u mmbudza.”

²⁰ Vhusiku honoho Mudzimu a ḓa ha Biliamu a ri, “Vhunga avha vhanna vho ḓa u u vhidza, ṱuwa navho, hone u ite zwenezwo fhedzi zwine nda u vhudza.”

²¹ Ndi hone Biliamu a tshi vuwa nga matsheloni a adza maalo kha donngi yawe, a ṱuwa na vhahulwane vha Muaba.

Biliamu a tshi kaidzwa nga donngi

²² Mudzimu o vha o sinyuwa nge Biliamu a vha a tshi khou ya. Musi Biliamu o namela donngi yawe, a tshi khou fhelekedzwa nga vhashumi vhawe vhavhili, muruṅwa wa Muṋe washu a ima gondoni a mu thivhela nḓila.

²³ Musi donngi i tshi vhona muruṅwa o ima henefho o ṱomola banga, ya pambuwa nḓilani ya dzhena masimuni. Biliamu a rwa iyo donngi a i vhuedzedza gondoni.

²⁴ Ndi hone muruṅwa a tshi ima he nḓila ya sekena, vhukati ha masimu mavhili a minḓirivhe, hu re na mutsheṱo wa matombo masia oṱhe.

²⁵ Donngi i tshi vhona muruṅwa, ya mbo ḓi ṱuwa yo livha mutsheṱo, ya pwanyeledza mulenzhe wa Biliamu na mutsheṱo. Biliamu a dovha a i rwa.

²⁶ Muruṅwa a dovha a fhirela phanḓa, a ima fhethu ho sekenaho hu si na fhethu hu fhireaho sia ḽa tshauḽa kana tshamonde.

²⁷ Donngi i tshi vhona muruṅwa wa Muṋe washu ya tou lala fhasi. Biliamu a fhela mbilu, a thoma u rwa iyo donngi nga ṱhamu.

²⁸ Ndi hone Muṋe washu a tshi ṋea donngi maanḓa a u kona u amba, ya amba na Biliamu ya ri, “Ndo vha tshinyani? Vho nthwelani vha ita luraru?”

²⁹ Biliamu a fhindula a ri, “Ndi nge wa nnyita tsilu! Arali ndo vha ndi na banga ndo vha ndi tshi ḓo u shidzha zwino.”

³⁰ Donngi ya fhindula ya ri, “Kani a si nṋe donngi yavho ye vha ḓi i namela u swika ṋamusi? Ndo no vhuya nda vha ita zwo raliho naa?” Biliamu a fhindula a ri, “A u athu.”

³¹ Ndi hone Muṋe washu a tshi bonyolosa maṱo a Biliamu a vhona muruṅwa wa Muṋe washu o ima gondoni o ṱomola banga ḽawe. Biliamu a wa nga tshifhaṱuwo.

³² Muruṅwa wa Muṋe washu a mu vhudzisa a ri, “Ndi mini wo rwa donngi yau luraru nga u rali? Ndo ḓa fhano u u thivhela, ngauri wo vha u songo fanela u fara lwendo ulu.

³³ Hone donngi yau yo mmbona ya pambuwa nḓilani luraru. Arali yo vha i songo pambutshela thungo, vhukumakuma ndo vha ndi tshi ḓo vha ndo u vhulaha zwino, donngi nda i litsha.”

³⁴ Biliamu a fhindula muruṅwa wa Muṋe washu a ri, “Ndo tshinya. A tho ngo zwi ḓivha uri iwe wo ima nḓilani uri u nthivhele. Zwino arali u sa zwi takaleli ndi ḓo humela hayani.”

³⁵ Huno muruṅwa wa Muṋe washu a vhudza Biliamu a ri, “Ṱuwa na vhanna havho, hone u ambe zwenezwo fhedzi zwine nda u vhudza.” Ndi hone Biliamu a tshi ṱuwa na vhahulwane vha Balaka.

³⁶ Musi Balaka a tshi zwi pfa uri Biliamu u khou ḓa, a yo mu ṱanganedza Ara, muḓi une wa vha mulamboni wa Arinoni masakhani a ḽa Muaba.

³⁷ Balaka a vhudza Biliamu a ri, “Ndi mini vha songo ḓa ndi tshi vha vhidza lwa u thoma? Vho vhona unga ndi nga si vha pfufhe lu vha fushaho?”

³⁸ Biliamu a fhindula a ri, “Ndo ḓa khavho zwino. Hone ndi na maanḓa-ḓe? Ndi amba zwenezwo fhedzi zwine Mudzimu a mmbudza.”

³⁹ Ndi hone Biliamu a tshi ṱuwa na Balaka vha ya Kiriathi Hutsotho,

⁴⁰ henefho Balaka a vhulaha kholomo na nngu, iṅwe ṋama a i ṋea Biliamu na vhahulwane vhe a vha e navho.

Vhuporofita ha Biliamu ha u thoma

⁴¹ Nga matshelo Balaka a dzhia Biliamu a gonya nae Tshikwara tsha Baali; e henefho o vha a tshi kona u vhona Vhaisraele kha sia ḽithihi.