NUMERI 21 - BIVHILI KHETHWA Mafhungo Madifha

Vhaisraele vha tshi lozwa Vhakanana vha Arada

¹ Musi khosi ya Vhakanana ya Aradi, thungo ya tshipembe kha ḽa Kanana, i tshi zwi pfa uri Vhaisraele vha khou ḓa vho fara nḓila ya Atharimu, ya vha dia ya thuba vhaṅwe vhavho.

² Ndi hone Vhaisraele vha tshi anela Muṋe washu muano vha ri, “Arali wa kumedza vhathu avha zwanḓani zwashu, ri ḓo u kumedza vhone tshoṱhe na miḓi yavho, ra vha lozwa.”

³ Muṋe washu a thetshelesa khumbelo yavho, a vha farisa vha kunda Vhakanana. Ndi hone Vhaisraele vha tshi vha lozwa tshoṱhe, vha phusukanya miḓi yavho, afho fhethu vha ri hu pfi Horoma (Ndozwo).

Ṋowa yo itwaho nga musinaseṱha

⁴ Vhaisraele vha ṱuwa thavhani ya Horo vho fara gondo ḽo livhaho Lwanzheni lwa Dziṱhanga, vha tshi ri vha tou mona na shango ḽa Edomo. Huno vhathu vhe nḓilani vha fhela mbilu,

⁵ vha amba mavhi nga Mudzimu na Mushe, vha gungula vha ri, “Ndi mini no ri pfulusa Egipita uri ri fele fhano phangani? A hu na zwiḽiwa! A hu na maḓi! Zwiḽiwa hezwi zwi sa furisi ri nga si tsha zwi konḓelela!”

⁶ Ndi hone Muṋe washu a tshi vha rambela ṋowa dzi re na vhuṱungu, dza vha luma ha fa Vhaisraele vhanzhi.

⁷ Vhathu vha ḓa ha Mushe vha ri, “Ro tshinya nge ra amba mavhi nga Mudzimu na nga vhone. Zwino nga vha rabele uri Muṋe washu a ṱuwise ṋowa hedzi.” Mushe a rabelela vhathu.

⁸ Muṋe washu a vhudza Mushe uri a ite ṋowa, a i fhahee kha thanda; muthu we a lumiwa a i lavhelesa, u ḓo tshila.

⁹ Ndi hone Mushe a tshi ita ṋowa ya musinaseṱha, a i fhahea kha thanda. Muthu ó lumiwa nga ṋowa o vha a tshi ri u sedza iyo ṋowa ya musinaseṱha a tshila.

U bva thavhani ya Horo u ya govhani ḽa Vhamuaba

¹⁰ Vhaisraele vha fhirela phanḓa, vha ṱoka mishasha yavho Obothi.

¹¹ Musi vho no ṱuwa afho fhethu, vha yo ṱoka mishasha matumbani a Abarimu a re phangani vhubvaḓuvha ha shango ḽa Muaba.

¹² Vha konou ṱoka mishasha govhani ḽa Zerede.

¹³ Vha takuwa henefho vha fhirela phanḓa, vha ṱoka mishasha thungo ya devhula ha mulambo wa Arinoni, sogani, hune ha thoma shango ḽa Vhaamori. (Mulambo wa Arinoni ndi one masakha a Vhamuaba na Vhaamori.)

¹⁴ Ndi zwine Bugu ya Nndwa dza Muṋe washu ya ri, “... Wahebe u re dzinguni ḽa Sufa, na magovha, mulambo wa Arinoni,

¹⁵ na zwigodi zwa magovha ane a vhuya a swika Ari, a livha na masakhani a Muaba.”

¹⁶ Vha takuwa henefho vha livha fhethu hune ha pfi Bidzi, henefho Muṋe washu a vhudza Mushe a ri, “Kuvhanganya vhathu, Nṋe ndi ḓo vha fha maḓi.”

¹⁷ Zwenezwo Vhaisraele vha imba luimbo holu vha ri, “Bidzi, maḓi au nga a gubunyee; riṋe ri ḓo a resha nga luimbo –

¹⁸ bidzi ye ya bwiwa nga vhavhusi na vharangaphanḓa vha vhathu, yo bwiwa nga luḓo lwa vhuhosi, na nga mbaḓa dzavho.” Vha takuwa phangani vha livha Mathana,

¹⁹ vha takuwa henefho vha livha Nahaliele, vha takuwa Mahaliele vha livha Bamothi,

²⁰ vha takuwa Bamothi vha livha govhani shangoni ḽa Muaba, he muṱumba wa thavha ya Phisiga wa ingamela phanga.

Khosi Sihoni na khosi Ogo vha tshi kundwa nga Vhaisraele

²¹ Ndi hone Vhaisraele vha tshi ruma vhaḓinḓa ha Sihoni khosi ya Vhaamori vha yo mu vhudza vha ri,

²² “Nga vha litshe ri fhire nga shangoni ḽavho. A ri nga pambuwi gondoni ra dzhena masimuni avho kana masimuni a minḓirivhe, a ri nga nwi maḓi a bvaho bidzini dzavho, ri ḓo tou longondo nga gondo ra vhuya ra bva shangoni ḽavho.”

²³ Huno Sihoni a si tende Vhaisraele vha tshi fhira shangoni ḽawe. A kuvhanganya mmbi yawe a bva a ya Jahatsi hu re sogani, a yo lwa na Vhaisraele.

²⁴ Hone Vhaisraele vha mu kunda nndwani vha dzhia shango ḽawe u bva mulamboni wa Arinoni u swika devhula ha Jaboko, hone vho ḽi dzhia u swika nga Vhaamoni fhedzi, ngauri masakha a Vhaamoni o vha o tsireledzwa vhukuma.

²⁵ Vhaisraele vha thuba miḓi yoṱhe ya Vhaamori, khathihi na Hesheboni na ḓorobo dzoṱhe dzi re tsini nawo, vha dzula khadzo.

²⁶ Hesheboni wo vha u musanda wa Sihoni khosi ya Vhaamori, o vha o lwa na khosi ya u ranga ya Muaba, a thuba shango ḽawe ḽoṱhe u swika nga mulambo wa Arinoni.

²⁷ Ndi zwine vharendi vha imba vha ri, “Iḓani Hesheboni, nga u fhaṱwe; muḓi wa Sihoni nga u vuswe.

²⁸ Muḓini wa Hesheboni ho bva mulilo, muḓini wa Sihoni ha bva khavhu, ya fhisa Ara muḓi wa Muaba, vhadzulapo vha zwivhangani zwa Arinoni.

²⁹ Iwe Muaba wo welwa nga khombo! Inwi vharereleli vha Khemosho, no lozwiwa! O ṅala vhatukana vhawe vhanna vha Muaba vha vha tshavhi, vhananyana vhawe vha thubwa nga Sihoni khosi ya Vhaamori.

³⁰ Ro vha pfula nga misevhe, vha lovha u bva Hesheboni u swika Diboni. Ro vha rambaladza u swika Nofa, tsini ha Medeba.”

³¹ Ndi hone Vhaisraele vha tshi dzula shangoni ḽa Vhaamori,

³² Mushe a ruma dziṱholi muḓini wa Jazere. Vhaisraele vha thuba ḓorobo dzi re tsini nawo, vha thatha Vhaamori vha dzulaho henefho.

³³ Ndi hone Vhaisraele vha tshi huma vha fara gondo ḽi yaho Bashani. Ogo khosi ya Bashani a bva na mmbi yawe yoṱhe uri a yo ṱangana navho a lwe navho Edrei.

³⁴ Muṋe washu a vhudza Mushe a ri, “U songo mu ofha. Ndo u kumedza ene na vhathu vhawe vhoṱhe na shango ḽawe. U mu ite zwenezwo zwe wa ita Sihoni khosi ya Vhaamori, we a vha a tshi vhusa Hesheboni.”

³⁵ Ndi hone Vhaisraele vha tshi vhulaha Ogo na vhana vhawe vha vhatuka na vhathu vhawe vhoṱhe vha si sie na muthihi a tshi tshila, vha dzhia shango ḽawe ḽa vha ḽavho.