NUMERI 18 - BIVHILI KHETHWA Mafhungo Madifha

¹ Muṋe washu a vhudza Aroni a ri, “Ha khakhea tshithu hukhethwa, ndi mulandu wau na vhana vhau na vhaṅwe Vhalivi, hone mulandu wa u khakhela vhutshifhe u ḓo hwaliwa nga iwe na vhana vhau ni noṱhe.

² Vhidza mashaka au, vha tsinde ḽa Livi, vha shume na iwe, vha u farise musi iwe na vhana vhau ni tshi khou shuma denndeni ya mbulungelo ya mulanga.

³ Vho fanela u khunyeledza mushumo wavho na pfanelo dzavho dza dennde nga u farisa, hone vha songo sendela tsini ha zwithu zwikhethwa na aḽiṱari. Arali vha sendela tsini hazwo, noṱhe iwe na vhone ni ḓo fa.

⁴ Nga vha shume na iwe vha khunyeledze pfanelo dzavho dza mishumo yoṱhe ya dennde ya u ṱangana na Nṋe, hone ni songo shuma na muthu a songo teaho.

⁵ Iwe na vhana vhau no fanela u khunyeledza pfanelo dza fhethu hukhethwa na aḽiṱari, uri ndi si tsha dovha nda sinyutshela Vhaisraele.

⁶ Ndi Nṋe we nda khetha mashaka au Vhalivi kha Vhaisraele uri vha vhe tshifhiwa tshau. Vho kumedzwa Nṋe, uri vha kone u shuma mishumo yavho denndeni ya u ṱangana na Nṋe.

⁷ Huno iwe na vhana vhau fhedzi, inwi ni khunyeledze pfanelo dza vhutshifhe kha zwa aḽiṱari na zwi re ngomu fhethu hukhethwa. Hezwo zwithu zwi londolwe nga inwi, ngauri ndo ni ṋea tshifhiwa tsha vhutshifhe. Muthu a songo fanelaho ane a vhuya a sendela tsini ha zwithu zwikhethwa u ḓo vhulawa.”

Mukovhe wa vhotshifhe

⁸ Muṋe washu a amba na Aroni a ri, “Ndi khou u ṋea misumo yoṱhe ine Vhaisraele vha nnduvha ngayo. Ndi khou zwi ṋea iwe na vha lutsinga lwau uri zwi vhe mukovhe wau lini na lini.

⁹ Kha nduvho khethwa-khethwa dzi sa fhiswi aḽiṱarini, dzau ndi hedzi: nduvho dza thoro, nduvho dza tshipfumelo na nduvho dza mulifho. Zwoṱhe zwine zwa ṋekedzwa Nṋe zwí nduvho khethwa ndi zwau na vhana vhau.

¹⁰ Hezwo zwithu u zwi ḽele hukhethwa, zwi ḽiwe nga vhanna fhedzi, u zwi sedze zwi zwikhethwa.

¹¹ “Na misumo yoṱhe i imiselwaho nṱha ine Vhaisraele vha bvisa vha i ṋekedza Nṋe ndi yau. Ndi khou zwi ṋea iwe na vhana vhau vha vhatuka na vha vhasidzana lini na lini. Vhoṱhe vha muṱa wau vho kumululwaho vha nga ḓi zwi ḽa.

¹² “Ndi u ṋea zwavhuḓi zwi fhiraho zwoṱhe kha zwibveledzwa zwa u ranga zwine Vhaisraele vha nṋea ṅwaha muṅwe na muṅwe: mapfura a muolivi na waini na goroi.

¹³ Zwoṱhe ndi zwau. Vhoṱhe vha muṱa wau vho kumululwaho vha nga ḓi zwi ḽa.

¹⁴ “Zwoṱhe zwa Israele zwine zwa kumedzwa Nṋe tshoṱhe ndi zwau.

¹⁵ “Tanzhe ḽiṅwe na ḽiṅwe ḽa ṅwana kana ḽa tshifuwo ḽine Vhaisraele vha ḽi ṋekedza Nṋe ndi ḽau. Hone iwe wo fanela u ṱanganedza mulifho wa u rengulula tanzhe ḽiṅwe na ḽiṅwe ḽa ṅwana, u lixwe nga tanzhe ḽa tshifuwo tsho kumululwaho.

¹⁶ Vhana vha ḓo rengululwa vhe na ṅwedzi muthihi nga mutengo wo vhewaho wa mangwende maṱanu a siliva, hu tshi tevhedzwa zwikalo zwa hukhethwa.

¹⁷ Hone tanzhe ḽa kholomo na ḽa nngu na mbudzi ayo ha rengululwi, ndi anga tshoṱhe, a itwe zwiṱhavhelo. Handulula aḽiṱari nga malofha azwo, u fhise mapfura azwo i vhe nduvho ya zwiḽiwa; ndi nduvho i nukhelelaho i ntakadzaho.

¹⁸ Ṋama yazwo yone ndi yau, u ḓi nga ya tshiakha na ya tshizwa tsha mulenzhe wa tshauḽa zwa misumo i imiselwaho nṱha.

¹⁹ “Misumo yoṱhe ine Vhaisraele vha nṋekedza ndi i ṋea iwe na vhana vhau vha vhatuka na vha vhasidzana lini na lini. Hoyo ndi mulanga u sa vhofhololwi we nda vhofha na iwe na vhaḓuhulu vhau.”

²⁰ Muṋe washu a amba na Aroni a ri, “Iwe a u nga wani thundu dzine dza ḓo vha dzau, nahone a u nga wani mukovhe wa shango ḽa Israele une wa ḓo vha wau. Mukovhe wau ndi Nṋe Yahavee.”

Mukovhe wa Vhalivi

²¹ Muṋe washu a ri, “Vhalivi vhone ndo vha ṋea tshafumi tshiṅwe na tshiṅwe tshine Vhaisraele vha nṋekedza. Hoyo ndi wone muholo wavho vha tshi shuma u londola dennde ya u ṱangana na Nṋe.

²² Vhaṅwe Vhaisraele vha songo tsha sendela tsini ha dennde ya u ṱangana na Nṋe, vha sa ḓo ḓiovhela ṱhamu ya lufu.

²³ U bva zwino ndi Vhalivi fhedzi vhane vha ḓo londola dennde ya u ṱangana na Nṋe, vha hwala pfanelo dzoṱhe dzayo. Heyo ndi ndayo ya misi yoṱhe ine ya kwama na vhaḓuhulu vhau. Vhalivi a vha nga vhi na mukovhe wa shango kha ḽa Israele,

²⁴ ngauri mukovhe wavho ndo vha ṋea tshafumi tshine Vhaisraele vha nṋekedza wa vha musumo wanga. Ndi zwe nda vha vhudza uri a vha nga vhi na mukovhe wa shango unga vhaṅwe Vhaisraele.”

Tshafumi tsha Vhalivi tshi no ṋewa vhotshifhe

²⁵ Muṋe washu a laya Mushe

²⁶ uri a vhudze Vhalivi a ri, “Musi ni tshi ṱanganedza tshafumi tshi bvaho kha Vhaisraele tshine Muṋe washu a ni ṋea uri tshi vhe tshaṋu, ni ṋee Muṋe washu tshafumi tshatsho u vhe musumo wawe.

²⁷ Musumo hoyo u ḓo dzhiwa u une wa eḓana na nduvho ine ya itwa nga mulimi ya mavhele na waini.

²⁸ Ngauralo u ḓo dovha wa ṋekedza musumo une wa vha wa Muṋe washu u no bva kha zwafumi zwoṱhe zwine na ṱanganedza zwi tshi bva kha Vhaisraele. Musumo hoyo wa Muṋe washu ni u ṋee tshifhe Aroni.

²⁹ Ni u ṋee u tshi bva kha zwavhuḓi zwi fhiraho zwoṱhe zwine na zwi ṱanganedza.

³⁰ Musi no no ṋekedza mukovhe wavhuḓi u fhiraho yoṱhe, zwi salaho zwi ḓo vha zwaṋu, sa mulimi a tshi dzhia zwo salaho kha nduvho ine a i ṋekedza, ya goroi na mapfura a muolivi.

³¹ Inwi na miṱa yaṋu ni nga ḓi ḽa zwo salaho huṅwe na huṅwe, ngauri ndi muholo waṋu wa mushumo une na shuma denndeni ya u ṱangana na Muṋe washu.

³² Arali na zwi ḽa ni nga si vhe na mulandu, tenda ni tshi ḓo vha no ṋekedza Muṋe washu zwavhuḓi zwi fhiraho zwoṱhe. Hone ni vhone ni sa ḓo shata zwifhiwa zwikhethwa zwa Vhaisraele tshika nga u ḽa tshifhiwa tshifhio na tshifhio hu sa athu ṋekedzwa mukovhe u fhiraho zwoṱhe; na ralo ni ḓo vhulawa.”