NUMERI 17 - BIVHILI KHETHWA Mafhungo Madifha

Lubaḓa lwa Aroni

¹ Muṋe washu a amba na Mushe a ri,

² “Vhudza Vhaisraele vha u fhe mbaḓa dza 12, murangaphanḓa wa tsinde ḽiṅwe na ḽiṅwe a ḓise luthihi. U ṅwale dzina ḽa munna muṅwe na muṅwe kha lubaḓa lwawe,

³ u konou ṅwala dzina ḽa Aroni kha lubaḓa lwo imelaho Livi. Murangaphanḓa wa tsinde ḽiṅwe na ḽiṅwe u ḓo vha na lubaḓa luthihi.

⁴ Mbaḓa idzo u dzi ise denndeni ya u ṱangana na Nṋe, u dzi vhee phanḓa ha mbulungelo ya mulanga, hune nda ṱangana na inwi.

⁵ Mbaḓa ya munna we nda mu nanga i ḓo ṱuma lurere. Ndi ḓo pfuvhisa zwine Vhaisraele vha dzula vha tshi u gungulela nga u ralo.”

⁶ Ndi hone Mushe a tshi amba na Vhaisraele, muṅwe na muṅwe wa vharangaphanḓa vhavho a mu ṋea lubaḓa, lubaḓa luthihi lwó imela tsinde ḽithihi, dza ita fumi na mbili, lubaḓa lwa Aroni lwa vhewa nadzo.

⁷ Ndi hone Mushe a tshi vhea mbaḓa idzo dzoṱhe phanḓa ha Muṋe washu denndeni ya mbulungelo ya mulanga.

⁸ Nga matshelo Mushe a tshi dzhena denndeni ya mbulungelo ya mulanga, a vhona uri lubaḓa lwa Aroni, lwe lwa vha lwo imela tsinde ḽa Livi, lwo ṱuma lurere. Lwo vha lwo kulukusha, lwa fhufhumisa, lwa aṋwa maalimondo o vhibvaho!

⁹ Mushe a dzhia mbaḓa dzoṱhe a dzi sumbedza Vhaisraele. Vha vhona zwe zwa itea, murangaphanḓa muṅwe na muṅwe a dzhia lubaḓa lwawe.

¹⁰ Muṋe washu a amba na Mushe a ri, “Vhuedzedza lubaḓa lwa Aroni phanḓa ha mbulungelo ya mulanga ya Yahavee. Lu vhulungwe lu dzule lu tshi humbudza mavhanga ayo uri vha sa litsha u gungula vha ḓo fa.”

¹¹ Mushe a ita zwe Muṋe washu a mu laya.

Mushumo wa vhotshifhe na Vhalivi

¹² Vhaisraele vha vhudza Mushe vha ri, “Zwino ndi hone ro fhela! Vhukuma ro lovha!

¹³ Arali ane a sendela tsini ha dennde ya u ṱangana na Muṋe washu a tshi fa, zwino roṱhe ndi tshifa ro fa!”