NUMERI 15 - BIVHILI KHETHWA Mafhungo Madifha

Milayo ya nduvho

¹ Muṋe washu a ṋea Mushe

² ndayo hedzi dzine Vhaisraele vha fanela u dzi tevhedza musi vha tshi swika shangoni ḽe a vha a tshi khou yo vha fha ḽone:

³ Arali ni tshi ṋekedza Muṋe washu tshiṱhavhelo, tshi nga vha tshi tshiṱhavhelo tshi fhiswaho kana tsha u khunyeledza muano kana ya vha nduvho ine muthu a tou i ṋekedza nga u funa hawe kana ya vha nduvho vhuṱamboni haṋu vhune na ḓi vhu ita, ni nga ṋekedza mboho kana nngu kana mbudzi, nduvho iyo i nukhelelaho i takadza Muṋe washu.

^4-5 Muthu ane a ṋekedza Muṋe washu nngu kana mbudzi ya tshiṱhavhelo tshi fhiswaho, tshifuwo tshiṅwe na tshiṅwe tshi ḓe na khilogiramu ya vhukhopfu ho vangwaho ḽitha nthihi ya mapfura a muolivi zwi vhe nduvho ya thoro, khathihi na ḽitha ya waini.

⁶ Arali hu tshi ṋekedzwa thutha hu ṋekedzwe na khilogiramu mbili dza vhukhopfu ho vangwaho mapfura a muolivi a ḽitha na hafu, i vhe nduvho ya thoro,

⁷ khathihi na waini ya ḽitha na hafu. I ḓo vha nduvho i nukhelelaho i takadzaho Muṋe washu.

⁸ Arali tshi tshiṱhavhelo tsha mboho tshi fhiswaho kana tsha u khunyeledza muano kana nduvho ya u konana na Mudzimu,

⁹ hu ṋekedzwe na nduvho ya thoro, khilogiramu tharu dza vhukhopfu ho vangiwaho mapfura a muolivi a ḽitha mbili,

¹⁰ khathihi na ḽitha mbili dza waini. I ḓo vha nduvho i nukhelelaho i takadzaho Muṋe washu.

¹¹ Hezwo ndi zwone zwine zwa ḓo ṋekedzwa na mboho kana thutha kana nngu kana mbudzi iṅwe na iṅwe.

¹² Musi hu tshi ṋekedzwa zwifuwo zwo vhalaho, na nduvho ine ya zwi fhelekedza i ḓi engedzwa-vho i eḓanele.

¹³ Muṅwe na muṅwe o bebelwaho Israele a ite zwenezwo musi a tshi ṋekedza nduvho ya zwiḽiwa, nduvho i nukhelelaho i takadzaho Muṋe washu.

¹⁴ Na kha mirafho i ḓaho, mutsinda kana muṅwe-vho ane a dzula na inwi tshifhinganyana kana tshoṱhe, arali a tshi ṋekedza nduvho ine ya fhiswa nga mulilo, nduvho i nukhelelaho i takadzaho Muṋe washu, a ite zwenezwo vhukumakuma zwine na ita.

¹⁵ Vhathu vha vhe na milayo i fanaho, ya inwi na vhatsinda vhane vha dzula na inwi, heyo ndi ndayo ya lini na lini ya mirafho ine ya kha ḓi ḓa. Inwi na vhatsinda ni ḓo fana maṱoni a Yahavee,

¹⁶ ni ḓo vhuswa nga milayo na ndayo dzi fanaho, inwi na vhatsinda vhane vha dzula na inwi.

Goroi ya u thoma ndi ya Muṋe washu

¹⁷ Muṋe washu a ṋea Mushe

¹⁸ ndayo hedzi uri dzi tevhedzwe nga Vhaisraele musi vha tshi swika shangoni ḽe a vha a tshi khou yo vha ṋea ḽone: A ri

¹⁹ musi goroi yo liṅwaho henefho i tshi ḽiwa, iṅwe i vhetshelwe thungo i ṋekedzwe Muṋe washu.

²⁰ Musi ni tshi baga vhurotho, mukonde wa u thoma wa vhurotho ha u thoma ho bagiwaho nga goroi ntswa i ṋekedzwe Muṋe washu. I ṋekedzwe unga goroi ine na tou fhula.

²¹ Na nga mirafho i ḓaho, ni ṋekedze Muṋe washu iyo nduvho ya zwiliṅwa zwaṋu zwa u thoma.

Zwipfumelo

²² Zwino arali na tshenuwa nó kundwa u tevhedza iṅwe ya idzo ndayo dze Muṋe washu a dzi ṋea Mushe, hone ní songo ita nga khole,

²³ kana na kundwa u khunyeledza zwoṱhe zwe Muṋe washu a ni laya nga Mushe u bva ḽeneḽo ḓuvha ḽa u thoma na ngavhuya, zwa vhofha na vhaḓuhulu vhaṋu –

²⁴ arali uho vhukhakhi ho itwa nga u shaya nḓivho ha tshivhidzo, tshi fanela u ṋekedza mboho i vhe tshiṱhavhelo tshi fhiswaho, u nukhelela hatsho hu ḓo takadza Muṋe washu, tshi ṋekedzwe na nduvho ya thoro yo teaho na nduvho ya waini. Vha dovhe vha ṋekedze mbokoṱo i vhe nduvho ya tshipfumelo.

²⁵ Tshifhe a pfumelele tshivhidzo tsha Vhaisraele, ndi hone vha tshi ḓo hangwelwa vhutshinyi havho, ngauri uho vhukhakhi vha ḓo vha vha songo vhu ita nga khole nahone vho ḓisa nduvho yavho ya tshipfumelo ya vha nduvho ya zwiḽiwa i ṋekedzwaho Muṋe washu.

²⁶ Tshivhidzo tshoṱhe tsha Vhaisraele na vhatsinda vhane vha dzula navho vha ḓo hangwelwa vhutshinyi havho, nge muṅwe na muṅwe a ita uho vhukhakhi.

²⁷ Arali muthu a khakha hu si nga khole, o fanela u ṋekedza phambala ya ṅwaha muthihi i vhe nduvho ya tshipfumelo.

²⁸ Henefho aḽiṱarini tshifhe u ḓo ita maitele a u pfumelela uyo munna vhutshinyi hawe, ndi hone a tshi ḓo vha o hangwelwa.

²⁹ Ndayo yeneyo i fanela u tevhedzwa nga muṅwe na muṅwe ane a tshinya a sa iti nga khole, a nga vha muthu o bebwaho Israele kana mudzulapo wa mutsinda.

³⁰ Huno ane a tshinya nga khole, a nga vha o bebwa kha ḽa Israele kana e mutsinda, u na mulandu wa u nyadza Yahavee, onoyo nga a tumulwe tshivhidzoni,

³¹ nge a nyadza ipfi ḽa Yahavee, a pfuka ndayo dzawe. A tshi tumulwa ndi mulandu wawe.

Munna we a pfuka mulayo wa Sabatha

³² Ho vhuya ha ri Vhaisraele vha tshi kha ḓi vha sogani, ha wanala munna a tshi khou reḓa khuni nga Sabatha.

³³ Munna uyo a dzhiwa a iswa ha Mushe na Aroni na tshivhidzo tshoṱhe,

³⁴ a lindiwa, ngauri vho vha vha sa ḓivhi zwine a fanela u itwa zwone.

³⁵ Ndi hone Muṋe washu a tshi vhudza Mushe a ri, “Munna uyo nga a vhulawe, vhathu vhoṱhe nga vha mu ise nnḓa ha mishasha vha mu kanḓe nga matombo a fe.”

³⁶ Ndi hone vhathu vhoṱhe vha tshi mu isa nnḓa ha mishasha, vha mu kanḓa nga matombo a fa, nga he Muṋe washu a vha laya.

Ndayo dza zwivhuvhi kha zwiambaro

³⁷ Muṋe washu a laya Mushe

³⁸ uri a vhudze Vhaisraele a ri, “Rungelelani zwivhuvhi khuḓani dza zwiambaro zwaṋu, kha tshivhuvhi tshiṅwe na tshiṅwe ni rungelele thambo ya muvhala wa denga. Izwo zwi itwe nga mirafho yoṱhe i kha ḓi ḓaho.

³⁹ Zwivhuvhi izwo zwi ḓo vha tshihumbudzo. Ni tshi zwi vhona ni ḓo elelwa ndayo dzanga na dzi tevhedza, ndi hone ni sa ḓo mpfuralela na tevhela nyemulo dza mbilu dzaṋu na maṱo aṋu.

⁴⁰ Zwivhuvhi izwo zwi ḓo ni humbudza u tevhedza ndaela dzanga dzoṱhe, na ḓo konou vha vhathu vho ḓikumedzaho Mudzimu waṋu.

⁴¹ Ndi Nṋe Yahavee Mudzimu waṋu, ndo ni pfulusa Egipita uri ndi vhe Mudzimu waṋu. Ndi Nṋe Yahavee Mudzimu waṋu.”