NUMERI 13 - BIVHILI KHETHWA Mafhungo Madifha

Dziṱholi

¹ Muṋe washu a amba na Mushe a ri,

² “Nanga murangaphanḓa muthihi kha tsinde ḽiṅwe na ḽiṅwe ḽa Vhaisraele, u vha rume vha yo ṱola shango ḽa Kanana, ḽine nda khou ṋea Vhaisraele.”

^3-15 Mushe a thetshelesa, a ruma vharangaphanḓa vha tshi bva sogani ḽa Pharani. Vhenevho ndi havha: Tsinde Murangaphanḓa Rubeni Shamua ṅwana wa Zakhuru Simioni Shafati ṅwana wa Hori Juda Khalebe ṅwana wa Jefune Isakhara Igala ṅwana wa Josefa Efraimi Hoshea ṅwana wa Nunu Benyamini Phalati ṅwana wa Rafu Zebuloni Gadiele ṅwana wa Sodi Manase Gadi ṅwana wa Susi Dani Amiele ṅwana wa Gemali Ashere Sethuru ṅwana wa Mikaele Nafuthali Nahabi ṅwana wa Vofusi Gadi Geuele ṅwana wa Makhi

Tsinde Murangaphanḓa

¹⁶ Ndi dzone ṱholi dze Mushe a dzi ruma u yo ṱola shango. Mushe a ri dzina ḽa Hoshea ṅwana wa Nunu ḽi vho pfi Joshua.

¹⁷ Mushe a tshi vha ruma u yo tandula shango ḽa Kanana a vha vhudza a ri, “Ni tshi bva fhano ni livhe devhula ni dzhene Negeve, ni konou livha mivhunduni.

¹⁸ Ni tandule uri iḽo shango ḽo tou ita hani, vhathu vha no dzula henefho ndi vhangana, na uri vha na maanḓa mangafhani.

¹⁹ Na sedza arali shango ḽi ḽavhuḓi kana ḽi si ḽavhuḓi, ni dovhe ni sedze arali vhathu avho vha tshi dzula ḓoroboni dzi si na luhura kana vha tshi dzula miḓini yo tangedzwaho nga mitsheṱo.

²⁰ Ni sedze arali mavu aḽo o vhibvela kana lu lukwara, ḽi na miri kana ḽi si na. Ni tshi vhuya ni ite maanḓa uri ni vhuye na mitshelo ya shango ḽeneḽo.” (Tsho vha tshi tshifhinga tshine nḓirivhe dza thoma u vhibva.)

²¹ Ndi hone avho vhanna vha tshi livha thungo ya devhula, vha tandula shango u bva phangani ya Tsini thungo ya tshipembe u vhuya u swika Rehobo, tsini ha Phara ya Hamathi thungo ya devhula.

²² Vho thoma nga u dzhena Negeve vha swika Hebroni, he ha vha hu tshi dzula vha mitupo ya Ahimani na Sheshai na Thalamai, vha lutsinga lwa Anaki. (Hebroni wo ri u fhaṱiwa ha fhela miṅwaha miṱanu na mivhili ha konou fhaṱiwa Tsuani u re Egipita.)

²³ Vha swika Govhani ḽa Eshkolo, henefho vha rema davhi ḽe ḽa vha ḽi na tshiṱokola tsha nḓirivhe, vha ita mutingati vha tshi hwala tsho nembelela kha thanda. Vha dzhia na magranada na mahuyu.

²⁴ Hafho fhethu ho vha hu tshi pfi Govhani ḽa Eshkolo (Tshiṱokola) nge Vhaisraele vha fula tshiṱokola tsha nḓirivhe henefho.

²⁵ Musi vho no fhedza maḓuvha a 40 vha tshi khou tandula iḽo shango, avho vhanna vha dziṱholi vha humela

²⁶ ha Mushe na Aroni na vhathu vhoṱhe vha Israele vhe Kadeshe sogani ḽa Pharani. Vha swikisa vhuṱanzi ha zwe vha zwi vhona, vha sumbedza vhathu mitshelo ye vha vhuya nayo,

²⁷ vha vhudza Mushe vha ri, “Ro tandula shango ra wana ḽi tshi tou ela mukhaha na ṋotshi, mitshelo yaḽo ngei.

²⁸ Hone vhathu vhane vha dzula khaḽo vha ro vha na maanḓa, miḓi yavho ndi mihulu vhukuma nahone yo tangedzwa nga mitsheṱo. Ro ita na u vhona vhaḓuhulu vha Anaki vha miswonḓa henefho.

²⁹ Negeve hu dzula Vhaamaleke, zwivhangani hu dzula Vhahithi na Vhajebusi na Vhaamori; tsini ha Lwanzhe lwa Phandamashango, na u tsa na mulambo wa Jorodani, hu dzula Vhakanana.”

³⁰ Khalebe a kwengweledza vhathu vhe vha vha vha tshi khou gungulela Mushe, a ri, “Nga ri mbo ḓi gonya zwino ri dzhie iḽo shango, vhukuma ri ḓo zwi kona.”

³¹ Hone vhaṅwe vhanna vhe vha vha vho ṱuwa na Khalebe vha ri, “Aiwa nandi, a ri na nungo dzine ra nga imedzana navho, vhathu vha hafho fhethu vha ri fhira nga maanḓa.”

³² Zwenezwo vha anḓadza mafhungo o shandeaho vhukati ha Vhaisraele vha tshi amba iḽo shango ḽe vha vha vho ya u ḽi tandula, vha ri, “Shango heḽiḽa a ḽi dzulwi, ḽi tou ḽa vhadzulapo vhaḽo nahone muṅwe na muṅwe we ra mu vhona ndi mulapfulapfu,

³³ ra ita na u vhona miswonḓa henefho, vha lutsinga lwa Anaki. Ra pfa ri vhaṱuku sa nzie, na vhone vha vhona ro tou ralo.”