NUMERI 12 - BIVHILI KHETHWA Mafhungo Madifha

Miriamu a tshi rwiwa nga Mudzimu

¹ Mushe o vha o dzea musadzi wa Mukushu, Miriamu na Aroni vha mu sola

² vha ri, “Muṋe washu o amba nga mulomo wa Mushe fhedzi naa? Riṋe ho ngo amba nga milomo yashu naa?” Muṋe washu a pfa zwe vha amba.

³ (Mushe o vha e munna wa u ḓiṱukufhadza, a tshi ḓiṱukufhadza u fhira vhathu vhoṱhe vha ḽifhasi.)

⁴ Muṋe washu a mbo ḓi amba na Mushe na Aroni na Miriamu a ri, “Inwi vhuraru haṋu iḓani denndeni ya u ṱangana na Nṋe.” Vha ya,

⁵ Muṋe washu a tsela fhasi e kha phuphu ya gole, a ima muṋangoni wa dennde, a vhidzelela a ri, “Aroni! Miriamu!” Vhuvhili havho vha sendela vha ima phanḓa,

⁶ Muṋe washu a ri, “Zwino thetshelesani ndi ni vhudze! “Arali hu na muporofita wa Yahavee kha inwi ndi ḓidzumbululela ene nga mabono, nda amba nae nga miloro.

⁷ Hone ndi tshi amba na muḓinḓa wanga Mushe a thi ambi nga u ralo, ndi kona u mu fulufhedza muṱani wanga woṱhe.

⁸ Ene ndi amba nae zwi tshi tou pfala ro livhana zwifhaṱuwo, ndi sa ambi nga dzithai, na tshifhaṱuwo tshanga o no tshi vhona! Zwino ndi mini ni sa tati u sola muḓinḓa wanga Mushe?”

⁹ Muṋe washu a mbo ṱuwa ó sinyuwa,

¹⁰ na gole ḽa mbo takuwa denndeni, lukanda lwa Miriamu lwa mbo ḓi phapha vhulwadze vhu ofhisaho, lwa tshena sa gabugu. Aroni a tshi mu lavhelesa a vhona o phapha uho vhulwadze,

¹¹ a amba na Mushe a ri, “Yawee muṋe wanga, vha songo litsha ri tshi rwiwa nga ṱhamu nga mulandu wa tshivhi tshe ra ita nga vhutsilu hashu.

¹² Vha songo mu litsha a nga ṅwana o bebwaho o fa ane a tshi bva thumbuni ya mme awe hafu ya ṋama ya vha yo ḽiwa.”

¹³ Ndi hone Mushe a tshi lilela Muṋe washu a ri, “Yawee, Mudzimu, mu fhodze nandi!”

¹⁴ Muṋe washu a fhindula a ri, “Arali khotsi awe o vha o mu pfela mare khofheni, o vha a si nga shoni a fhedza maḓuvha maṱanu na mavhili naa? Zwino litshani a dzule nnḓa ha mitsheṱo a fhedze vhege, a konou vhuiswa.”

¹⁵ Miriamu a bviselwa nnḓa ha mishasha a dzula hone a fhedza maḓuvha maṱanu na mavhili, vhathu vha si tsha fhirela phanḓa a vhuya a vhuedzedzwa mishashani.

¹⁶ Ndi hone vha tshi pfuluwa Hatserotho vha yo ṱoka mishasha sogani ḽa Pharani.