NUMERI 11 - BIVHILI KHETHWA Mafhungo Madifha

Mudugumo wa Thabera

¹ Vhathu vha thoma u gungulela Muṋe washu nga zwine zwa vha dina. Muṋe washu a zwi pfa, a sinyuwa a posa mulilo vhukati havho, wa duga vhukati havho wa fhisa sia ḽiṅwe ḽa mishasha.

² Vhathu vha lilela Mushe uri vha lamulelwe, Mushe a rabela Muṋe washu, mulilo wa dzima.

³ Ndi zwe afho fhethu ha pfi Thabera (Mudugumo), ngauri henefho mulilo wa Muṋe washu wo duga vhukati havho.

Mushe a tshi nanga vharangaphanḓa vha 70

⁴ Ho vha hu na vhaṅwe vhatsinda vhane vha tshimbila na Vhaisraele. Vhenevho vha pfa vha tshi tamesa ṋama, na Vhaisraele vhone vhaṋe vha thoma u lila vha ri, “Arali ro vha ri tshi nga wana ṋama zwashu!

⁵ Ngei Egipita ro vha ri tshi ḽa khovhe dzoṱhe dzine ra funa, ri sa rengi. Ri kha ḓi elelwa maranga na mabvani na nyala ya maṱari na galikhi.

⁶ Huno zwino ro kulea nungo. A ri na tshine ra ḽa, ri tou ḽa mana fhedzi misi yoṱhe!”

⁷ (Mana o vha a tshi nga mbeu tsekene, a muvhala wa tshirulwane tshi no nga tshitshena.

^8-9 O vha a tshi wela mishashani vhusiku a tshi wa na ṅwando. Nga matshelo ḽi tshi tsha vhathu vha tshimbila vha tshi a doba, vha a kuya kana vha a sinḓa mutulini a ita vhukhopfu, vha konou u a bika vha ita zwigaku. Muthu a tshi ḽa o vha a tshi nga vhurotho ho bagwaho nga mapfura a muolivi.)

¹⁰ Mushe a pfa vhathu vhoṱhe vha tshi khou lila vho ima nga zwigwada miṋangoni ya mishasha yavho. Muṋe washu a vha sinyutshela, na Mushe zwa mu dina,

¹¹ a vhudzisa Muṋe washu a ri, “Ndi mini u tshi nnḓisela khombo yo raliho? Wo ntsinyutshela zwine wa nkhwesa muhwalo wa vhathu avha vhoṱhe?

¹² Kani-ha ndi nṋe we nda vhifha muvhilini nga havha vhathu? Ndi nṋe ndo vha bebaho naa? Ndi mini u tshi ri ndi vha takule, unga muongi a tshi takula lutshetshe, ndi vha ise shangoni ḽe wa fulufhedzisa vhomakhulukuku wavho nga muano?

¹³ Ndi ḓo wanafhi ṋama ine nda nga ṋea vhathu vhangafhangafha? Vha ḓi dzula vha tshi nndilela vha tshi ri, ‘Ri fhe ṋama ri ḽe!’

¹⁴ Vhathu avha vhoṱhe ndi nga si vha hwale ndi ndoṱhe, muhwalo uyu u a nndemela.

¹⁵ Arali u tshi ḓo nnyita nga u rali, nkhathutshele u mbo ḓi mmbulaha zwino, uri ndi si tsha ṱwa ndi tshi tambula.”

¹⁶ Muṋe washu a amba na Mushe a ri, “Nnḓisele vhahulwane vha Israele vha 70 vhane wa ḓivha vhe vharangaphanḓa na magota a vhathu, u vha ḓise kha Nṋe denndeni ya u ṱangana na Nṋe, uri vha ime henefho na iwe.

¹⁷ Nṋe ndi ḓo tsa nda amba na iwe henefho, na vhone ndi ḓo vha ṋea-vho Muya we nda mu longa kha iwe. Vha ḓo u ṱhaḓula muhwalo wa vhathu havha, uri iwe u si u hwale u woṱhe.

¹⁸ Zwino vhudza vhathu u ri, ‘Ḓikumululeni ni ḓilugisele ḽa matshelo, ni ḓo vuwa ni tshi wana ṋama na ḽa. Yahavee o ni pfa ni tshi lila ni tshi ri ni tama ṋama na uri ngei Egipita zwo vha zwi khwiṋe. Zwino ndi ḓo ni ṋea ṋama na ḽa.

¹⁹ A ni nga i ḽi ḓuvha ḽithihi kana mavhili kana maṱanu kana fumi kana mahumi mavhili fhedzi,

²⁰ ni ḓo i ḽa ṅwedzi woṱhe, ya vhuya ya ni nukhela, na si tsha i funa. Hezwo zwi ḓo itea nge na landula Yahavee ane a dzula na inwi, na mu gungulela na ri ngavhe ri songo pfuluwa Egipita.’ ”

²¹ Mushe a amba na Muṋe washu a ri, “Ndí fhano ndi na vhanna vha 600 000 vha no bva pfumo, vhaṅwe ndi sa vhali, zwino iwe wa ri u ḓo vha ṋea ṋama vha ḽa ṅwedzi woṱhe!

²² Arali vha ṱhavhelwa masambi a nngu na a kholomo vha nga ḽa vha fura naa? Arali vha fashelwa khovhe dzoṱhe dza lwanzheni vha nga ḽa vha fura?”

²³ Muṋe washu a fhindula a ri, “Tshanḓa tshanga ndi tshipfufhi kani? Zwino ndi hone u tshi ḓo vhona arali zwe nda amba zwi tshi ḓo itea kana zwi sa nga itei!”

²⁴ Ndi hone Mushe a tshi bvela nnḓa a vhudza vhathu zwe Muṋe washu a amba. A kuvhanganya vhahulwane vhavho vha 70, a vha imisa u mona na dennde ya u ṱangana na Mudzimu.

²⁵ Ndi hone Muṋe washu a tshi tsela fhasi e kha gole a amba nae. Vhahulwane avho a vha ṋea-vho Muya we a ṋea Mushe. Musi Muya a tshi ḓa khavho, vha nyanyuwa vha porofita, hone vha si tsha dovha.

²⁶ Vhavhili vha avho vhahulwane vha 70, Elidadi na Medada, vho vha vho sala mishashani, vhá songo ya denndeni ya u ṱangana na Muṋe washu naho vho vha vho ṅwalwa na vhaḽa vhaṅwe. Henefho mishashani Muya a ḓa khavho, vha thoma u porofita.

²⁷ Muṅwe muṱhanngana a gidima a yo vhudza Mushe uri Elidadi na Medada vha khou porofita mishashani.

²⁸ Ndi hone Joshua ṅwana wa Nunu we a vha e mushumeli wa Mushe tshee a vha muṱhanngana, a tshi amba a ri, “Mushe muṋe wanga, a vha vha kaidzi zwavho?”

²⁹ Mushe a fhindula a ri, “Ni khou lwela nṋe kani? Nṋe ndi ri ngavhe Muṋe washu a tshi ṋea vhathu vhawe vhoṱhe Muya wawe, vhoṱhe vha porofita!”

³⁰ Ndi hone Mushe na vhaḽa vhahulwane vha 70 vha Israele vha tshi humela mishashani.

Muṋe washu a tshi wisa dzikhwali

³¹ Zwino Muṋe washu a ruma muya wa khada khwali dzi tshi bva lwanzheni, wa ita uri dzi kavhe fhasi u mona na mishasha lune dza ita thulwi i no swika mitha u ya nṱha, dza ḓala dza swika vhukule vhune ha nga ita lwendo lwa ḓuvha ḽoṱhe matungo oṱhe.

³² Zwenezwo ḓuvha ḽoṱhe heḽo na vhusiku hoṱhe na nga matshelo ḓuvha ḽoṱhe, vhathu vha ṱwa vha tshi fara khwali; a hu na we a kuvhanganya dzi sa swiki khilogiramu dza tshigidi. Vha dzi anea u mona na mishasha uri dzi ome.

³³ Musi ṋama i tshee milomoni yavho, Muṋe washu a vha sinyutshela a vha ḓisela dwadze ḽi ofhisaho.

³⁴ Henefho fhethu ha pfi Kibrotho Hataava (Zwalo-zwa-vha-miḽo) nge ha swiṱwa vhathu vhe vha vha vha tshi tamesa ṋama.

³⁵ U bva henefho vhathu vha fhirela Hatserotho, vha ṱoka mishasha henefho.